1 Makabe 10
10
Aleksann Epifann I Fer Zonatan Gran-Pret
1Dan lannen 160#10.1 Savedir Septanm-Oktob lannen 152 avan Zezi-Kri., Aleksann Epifann, garson Antyokis, ti debark pre avek lavil Ptolemais ki i ti pran. Bann Zabitan ti rekonnet li koman zot lerwa.
2Kan lerwa Demetriis ti antann sa nouvel, i ti rasanble en gran larme e i ti al atak Aleksann. 3Demetriis ti anvoy en let lape kot Zonatan.
4Annefe, i ti dir dan li menm: Annou depese etabli lape avek li avan ki sa bann zans i fer en lakor lape avek Aleksann kont nou. 5Annefe, i pou rapel tou ditor ki nou'n fer li avek son bann frer ek son pep.
6Demetriis ti donn Zonatan lotorizasyon pour rasanble en larme, fabrik zarm. I ti propoz li vin son alye. I ti osi donn lord liber bann prizonnyen Izraelit ki dan sitadel Zerizalenm.
7Alor, Zonatan ti desann Zerizalenm, e la, devan lepep ek bann ki ti dan sitadel, i ti lir sa let. 8Zot ti tre konsernen kan zot ti tande ki lerwa ti'n donn Zonatan lotorizasyon rasanble en larme. 9Bann solda dan sitadel ti rann bann prizonnyen avek Zonatan ki ti rann zot avek zot fanmir.
10Zonatan ti al reste Zerizalenm ki i ti konmans rekonstri e restore. 11I ti donn lord bann zouvriye pour rekonstri bann miray, antour montanny Siyon avek en miray ros taye, pour donn li en pli bon proteksyon. Bann zonm ti egzekit sa lord.
12Bann etranze ki ti dan bann fortifikasyon ki Bakides ti'n fer konstri, ti sove. 13Sakenn ti abandonn son post e retourn dan son prop pei. 14Me dan Bet-Sour, ti annan en bann Zwif ki ti'n abandonn Lalwa ek bann komannman. Sa lavil ti'n vin zot landrwa kasyet.
15Lerwa Aleksann ti'n antann bann promes ki Demetriis ti'n fer avek Zonatan. I ti'n osi antann nouvel bann laviktwar Zonatan avek son bann frer ek tou bann problenm ki zot in pas ladan. 16Alor, i ti dir:
“Nou pa pou zanmen trouv en zonm parey li. Annou fer li nou zanmi e nou alye.”
17Alor i ti ekri li sa let ki i ti anvoy kot li:
Zonatan I Vin Gran-Pret
18“Delapar lerwa Aleksann, pour son frer Zonatan: 19Nou'n tande ki ou en pwisan gerye ki merit vin en zanmi. 20Ozordi menm, nou nonm ou koman Gran-Pret ou nasyon e nou donn ou tit zanmi lerwa. Ou ava reste nou alye e donn nou ou sipor.”
I ti osi anvoy li en rob mov ek en kouronn annor.
21Alor, pour lokazyon lafet bann Payot, dan setyenm mwan, lannen 160#10.21 Savedir Oktob lannen 152 avan Zezi-Kri., Zonatan ti met lenz sakre Gran-Pret. I ti osi rasanble en larme e ekip zot avek en kantite zarm.
Demetriis I Ofer Zonatan bann Privilez
22Kan Demetriis ti antann sa nouvel, i ti boulverse. I ti dir:
23“Ki mannyer nou'n fer sa? Nou'n les Aleksann reisi fer zanmi avek bann Zwif avan nou e konsolid son pozisyon. 24Mwan osi, mon pou ekri parol lankourazman e promet zot loner ek kado pour mwan kapab ganny zot led.”
25Alor, i ti anvoy zot sa mesaz, “Delapar lerwa Demetriis pour nasyon Zwif. 26I donn nou bokou lazwa pour tande ki zot respekte lakor ki egziste ant nou. Zot in reste touzour nou zanmi e zot pa'n pas lo kote nou bann lennmi. 27Kontinyen reste fidel dan nou lanmitye e nou ava byen rekonpans zot. 28Nou pou donn zot bokou konsesyon lo taks e ofer zot bokou kado. 29Apartir ozordi, tou Zwif pa pou bezwen pey bann taks regilye, ni taks lo disel, ni taks pour lerwa. 30Apartir ozordi, zot nepli annan lobligasyon pey mwan en tyer zot rekolt ek lanmwatye bann fri zot rekolt. Apartir ozordi e pour touzour, mon ofer sa bann konsesyon pei Zide, ensi ki trwa distrik Samari ki fer parti, ek distrik Galile. 31Zerizalenm pou ganny konsidere koman en lavil sen. Ansanm avek son teritwar, zot pa pou bezwen pey ladim lo son reveni, ni taks.
32Mon osi retourn kontrol sitadel dan Zerizalenm avek Gran-Pret. I ava kapab plas zonm ki li menm ava swazir pour garde.
33Mon pou liber tou Zwif ki'n ganny fer prizonnyen dan pei Zida e ki'n ganny anmennen dan nenport parti mon rwayonm. Zot pa pou bezwen pey okenn taks, ni menm lo zot zannimo.
34Okenn Zwif dan mon rwayonm antye pa pou pey taks pandan tou bann zour lafet: Saba, nouvellin, ni dan sa trwa zour avan e apre sak lafet enportan. 35Personn pa pou annan drwa obliz zot pey nanryen, ni trakas zot dan nenport fason.
36Zot ava kapab anrol ziska 30,000 Zwif dan larme lerwa e zot ava ganny menm lapey ki lezot solda dan mon rwayonm. 37Serten parmi zot ava ganny plase dan bann fortifikasyon rwayal enportan, e dan bann post konfyans dan rwayonm. Bann zofisye ek zot bann sef pou ganny swazir parmi zot. Zot ava kapab viv dapre zot prop lalwa, parey lerwa in deside pour zabitan pei Zide.
38Sa trwa distrik Samari#10.38 War verse 30. ki'n ganny azoute avek Zide ava form en sel teritwar, ki ava zis anba lotorite Gran-Pret.
39Mon pe osi donn lavil Ptolemais ek son teritwar pour tanp Zerizalenm. Reveni ki ava ganny rekolte ava ganny servi pour depans dan sanktyer. 40Anplis, sak lannen, mon pou donn 15,000 pyes larzan sorti dan fon rwayal apropriye. 41Larzan rezerv dan fon ki bann fonksyonner pa ti peye dan bann lannen avan, ava servi pour bann travay dan tanp. 42Anplis, toulezan nou ti abitye pran 5,000 pyes larzan lo reveni sorti dan tanp. Sa osi pou arete, akoz sa larzan i pour bann pret pour zot servis dan tanp.
43Dimoun ki vin demann lazil dan tanp Zerizalenm oubyen dan son teritwar, akoz det anver lerwa oubyen lezot kalite det, pa pou ganny arete. Propriyete ki zot annan dan mon rwayonm pa pou ganny konfiske.
44Tou fre rekonstriksyon ek reparasyon tanp pou ganny peye dan fon reveni rwayal. 45Sa i osi aplik pour rekonstriksyon miray Zerizalenm e pour ranforsi son bann fortifikasyon. De menm pour konstriksyon bann miray dan Zide: Zot ava ganny peye avek reveni lerwa.”
Lanmor Demetriis
46Zonatan ek lepep pa ti krwar ni aksepte sa bann parol, akoz zot ti rapel sa kantite dimal ki Demetriis in fer dan Izrael pour kraz zot. 47Zot ti prefer donn zot konfyans Aleksann. Annefe, i ti premye pour ofer zot bann parol lanmitye e zot ti reste son alye pandan tou son lavi.
48Alor, lerwa Aleksann ti rasanble en gran larme e pozisyonn li vizavi Demetriis. 49Larme sa de lerwa ti angaz zot dan konba, me larme Demetriis ti ganny bate e zot ti sove. Larme Aleksann ti pourswiv li e ranport laviktwar. 50Zot ti kontinyen lager avek lenerzi. Sa zour, ver soley kouse, Demetriis ti ganny touye.
Lalyans ant Ptoleme ek Aleksann
51Apre sa, Aleksann ti anvoy son bann mesaze kot Ptoleme, lerwa Lezip, avek sa mesaz, 52“Mon'n retourn dan mon rwayonm. Mon'n enstal mwan lo tronn mon zanset. Mon'n pran pouvwar akoz mon'n ganny laviktwar lo Demetriis e mon'n repran pei. 53Annefe, mon'n lager kont li: Son larme in ganny kraze e nou'n pran son tronn ek son rwayonm. 54Alor aprezan, annou fer zanmi. Les mwan marye avek ou fiy. Mon ava vin ou zann e mon ava ofer ou ek ou fiy, bann prezan diny pour ou ran.”
55Lerwa Ptoleme ti reponn, “Sa ti en gran zour kan ou ti retourn dan pei ou bann zanset e mont lo tronn ou rwayonm. 56Mon aksepte fer sa ki ou'n demande. Me dabor, zwenn mwan dan lavil Ptolemais pour nou fer konnesans. Mon ava vin ou boper parey ou'n dir.”
57Alor, Ptoleme ti kit Lezip akonpannyen avek son fiy Kleopat. Zot ti ariv dan lavil Ptolemais dan lannen 162#10.57 Savedir lotonn lannen 150 avan Zezi-Kri.. 58Lerwa Aleksann ti zwenn li laba kot i ti donn li son fiy Kleopat an maryaz. Zot ti selebre maryaz avek gran splander rwayal.
Aleksann I Rankontre Zonatan
59Apre sa, Lerwa Aleksann ti ekri Zonatan pour vin war li. 60Alor, Zonatan ti al Ptolemais avek en delegasyon enportan pour rankontre sa de lerwa. I ti ofer zot ek zot bann zanmi bann kado larzan ek lor; sa ti donn zot gran satisfaksyon.
61En group Izraelit rebel ti zwenn ansanm pour fer fos akizasyon kont Zonatan; me lerwa Aleksann pa ti pran kont. 62O kontrer, i ti ordonnen ki Zonatan i ganny abiye dan en gran rob rouz; e zot ti fer li. 63Lerwa ti fer li asiz akote li. I ti osi donn lord son bann zofisye, “Anmenn Zonatan dan milye lavil e fer en proklanmasyon konmkwa personn napa drwa fer okenn lakizasyon kont li e ki personn pa fer li okenn problenm.”
64Dapre proklanmasyon ki ti ganny fer, bann ki ti pe akiz Zonatan, ti war ki mannyer i ti pe ganny trete avek gran loner. Kan zot ti war li dan son lenz rouz, zot ti sove.
65Lerwa ti osi fer li loner pour nonm li premye zanmi lerwa, zeneral e gouverner provens. 66Alor, Zonatan ti retourn Zerizalenm dan lape e dan lazwa.
Laviktwar Zonatan lo Apoloniis
67Lannen 165#10.67 Savedir lannen 147 avan Zezi-Kri., Demetriis II, garson Demetriis I, ti kit zil Kret pour retourn dan pei son bann zanset. 68Kan lerwa Aleksann ti ganny nouvel, i ti trakase e retourn Antyos. 69Demetriis ti nonm Apoloniis koman gouverner Gran Siri. I ti rasanble en gran larme e kanp pre avek Zanmnia. Apre, i ti anvoy sa mesaz kot Gran-Pret Zonatan, 70“Zis ou ki atak nou. Mon ganny ensilte e meprize akoz ou. Akoz ou pe egzers ou lotorite kont nou, depi dan montanny? 71Si ou annan konfyans dan ou larme, desann e vin zwenn nou dan laplenn. Annou gete lekel ki pli for. Mwan, mon annan sipor tou bann lavil. 72Demande, dimoun ava dir ou lekel mwan, e lekel bann ki pe siport mwan. Zot ava dir ou ki ou pa pou kapab reziste kont mwan. Annefe, de fwa#10.72 War 1 Mak 5.55-62; 9.1-12. ou bann zanset in ganny bate dan zot prop pei. 73Les mwan dir ou, ou pa pou kapab reziste kont mon bann kavalri ek en tel larme dan laplenn. Ti napa okenn ros ni okenn landrwa pour zot kasyet.”
74Kan Zonatan ti antann bann parol Apoloniis, i ti eksite avek lakoler. I ti swazir 10,000 zonm e kit Zerizalenm; son frer, Simon ti zwenn avek li pour ed li. 75I ti enstal son kan pre avek Zafa, me zabitan lavil ti ferm zot bann laport, akoz Apoloniis ti annan troup dan Zafa. 76Alor, zot ti atake. Bann zabitan ti per e zot ti ouver laport. Zonatan ti pran lavil.
77Kan Apoloniis ti tande sa ki ti'n arive, i ti met ansanm 3,000 kavalri ek en gran larme zonm apye. Zot ti diriz ver Asdod pour fer sanblan ki zot ti pe al pli lwen. Me zot ti anmenmtan fons dan laplenn akoz i ti annan konfyans lo lakantite kavalri.
78Zonatan ti pourswiv li dan direksyon Asdod e sa de larme ti atak kanmarad. 79Apoloniis ti'n gard ankor 1,000 kavalri deryer bann Izraelit. 80Toudenkou, Zonatan ti remarke ki i ti pe ganny atake par deryer. Bann kavalri ti pe anserkle son larme e tir fles lo son bann gerye depi bomaten ziska aswar. 81Me son bann zonm ti reziste, parey Zonatan ti'n donn lord e bann seval lennmi ti pe konmans fatige.
82Kan kavalri ti'n vreman fatige, Simon ti konmans atake. I ti kraz bann zonm apye e zot ti sove. 83Bann kavalri ti fannen lo laplenn. Zot ti sove ziska Asdod e kasyet dan tanp Dagon, zot fo bondye. 84Zonatan ti met dife dan lavil Asdod e lezot lavil dan zalantour e depouy zot. I ti osi bril tanp Dagon ek bann zonm ki ti pe kasyet ladan. 85Sa zour, Zonatan ti masakre anviron 8,000 zonm dan konba; en pe ti ganny brile vivan.
86Apre sa, Zonatan ti kit sa landrwa e al etabli son kan Askelonn. Bann zabitan ti sorti dan sa lavil pour resevwar li solannelman. 87Zonatan avek son bann zonm ti retourn Zerizalenm avek en kantite byen ki zot ti'n sezi.
88Kan lerwa Aleksann ti antann sa nouvel, i ti fer Zonatan pli gran loner ankor. 89I ti anvoy li en meday annor, ki ganny ofer zis avek bann zanmi lerwa. I ti osi donn li lavil Ekronn ek son teritwar dan zalantour.
Currently Selected:
1 Makabe 10: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.