1 Makabe 11
11
Laviktwar Ptoleme lo Aleksann Epifann
1Apre, Ptoleme, lerwa Lezip, ti rasanble en gran larme, konmsi gren disab dan bor lanmer, avek en kantite bato. I ti esey pran posesyon rwayonm Aleksann par riz, pour azout avek son rwayonm. 2I ti al Lasiri avek zoli parol lape. Bann zabitan lavil ti ouver zot laport pour les li antre e byen resevwar li. Lerwa Aleksann ti'n donn lord byen akeyir li, akoz Ptoleme ti son boper. 3Me dan sak lavil ki Ptoleme ti antre, i ti plas son bann troup.
4Kan i ti ariv Asdod, zot ti montre li tanp Dagon ki'n brile, bann lavil ek son zalantour ki'n ganny detri, kadav ki'n fannen en pe partou. Zot ti'n met an ta tou sa ki ti reste: Kadav bann zonm ki Zonatan ti'n brile dan lager. 5Zot ti rakont lerwa sa ki Zonatan ti'n fer, pour ki lerwa i blanm li; me lerwa pa ti dir nanryen.
6Zonatan ti al zwenn lerwa Ptoleme Zafa. Zot ti byen resevwar kanmarad e pas lannwit laba. 7Zonatan ti akonpanny lerwa ziska larivyer Eleter avan retourn Zerizalenm.
8Konmsa ki lerwa Ptoleme ti pran kontrol tou bann lavil lo lakot, ziska Selisi ki lo bor lanmer. I ti kontinyen avek son bann plan kont Aleksann.
9I ti anvoy bann mesaze kot Demetriis pour dir li:
“Annou fer en lalyans avek kanmarad. Mon ava fer ou marye avek mon fiy ki ti fanm Aleksann e ou ava vin lerwa lo rwayonm ou papa. 10Aprezan, mon regrete ki mon ti donn li mon fiy, akoz i'n esey touy mwan.”
11Ptoleme ti pe akiz Aleksann akoz i ti anvi pran son rwayonm. 12Alor, i ti repran son fiy e donn Demetriis. I ti koup tou relasyon avek Ptoleme. Ti kler ki zot ti'n vin lennmi.
13Apre, Ptoleme ti antre Antyos e vin lerwa Lazi. Konmsa ki i ti port de kouronn: Kouronn Lezip ek kouronn Lazi.
Lanmor Aleksann ek Ptoleme
14Dan sa letan, lerwa Aleksann ti dan lavil Silisi, akoz zabitan sa rezyon ti'n revolte. 15Kan i ti antann sa ki Ptoleme ti'n fer, i ti mont en latak kont li. Ptoleme ti mars kont li avek en gran larme e i ti fer li sove. 16Ptoleme ti'n ranport laviktwar. Aleksann ti sov an Arabi pour al rod proteksyon. 17En Arab ki ti apel Zabdiel, ti sot latet Aleksann e anvoy li pour Ptoleme. 18Me Ptoleme ti mor trwa zour apre. Son bann troup ki ti dan lavil ti ganny touye par bann zabitan. 19Alor, Demetriis ti vin lerwa dan lannen 167#11.19 Savedir Out-Septanm lannen 145 avan Zezi-Kri..
Zonatan I Fer Zanmi avek Demetriis
20Dan sa lepok, Zonatan ti rasanble bann zonm ki dan Zide, pour li al atak sitadel Zerizalenm. Zot ti konstri plizyer masin lager pour servi dan latak. 21Serten Zwif rebel anver Lalwa Bondye ki ti ay zot nasyon, ti al raport avek lerwa, ki Zonatan ti pe mont en latak kont sitadel Zerizalenm.
22Ler i ti antann sa nouvel, lerwa ti ankoler. I ti deside al Ptolemais. I ti anvoy en mesaz pour demann Zonatan aret sa latak e vin diskit avek li Ptolemais, pli vit posib.
23Kan Zonatan ti resevwar sa mesaz, i ti donn lord pour kontinyen anserkle lavil. I ti swazir serten sef dan Izrael ek serten pret pour akonpanny li. I ti riske son lavi pou fer sa vwayaz. 24I ti al Ptolemais kot lerwa, sarze avek larzan ek lor, lenz ek bokou lezot kado. Konmsa ki i ti ganny faver lerwa Demetriis. 25Menm si serten Zwif rebel dan son nasyon ti kontinyen fer konplent kont Zonatan, 26lerwa ti tret li byen, parey lezot lerwa avan li: I ti felisit li dan prezans tou son bann zanmi. 27I ti konfirm son pozisyon Gran-Pret ek lezot tit ki i ti annan avan#11.27 War 10.20.. I ti fer li ganny rekonnet parmi bann zanmi lerwa.
28Zonatan ti demann lerwa permisyon pour ki distrik Zide ek sa trwa distrik Samari pa pey taks. An retour i ava donn lerwa 8,100 kilo larzan. 29Lerwa ti aksepte e i ti ekri en let Zonatan lo sa size:
30“Lerwa Demetriis i anvoy son konpliman pour son frer Zonatan ek nasyon Zwif antye. 31Nou anvoy ou kopi let ki nou ti ekri Lastenn, enn nou paran, lo ou size pour ou konnen ki nou ti dir:
32Lerwa Demetriis i anvoy konpliman pour Lastenn. 33Nou'n pran desizyon pour rekonpans nasyon Zwif pour zot sipor anver mwan. Bann Zwif i montre ki zot nou zanmi e ki zot ranpli zot devwar anver nou. 34Alor, nou konfirm zot drwa posed distrik Zide ek trwa distrik Aferema, Lida ek Ramataim. Sa bann distrik avek teritwar otour ti ganny azoute avek Zide. Nou ti fer sa an faver bann ki ofer sakrifis dan Zerizalenm. Dezormen, sa bann Zwif pa pou bezwen pey taks lo rekolt zot prodwi ek fri ki zot ti pey mwan sak lannen. 35Pour lezot taks ki zot ti peye lo dizyenm parti zot byen, lezot peyman lo disel ek taks pour lerwa, tousala zot pa pou bezwen peye.
36Apartir ozordi, nou pran desizyon pour ki okenn sa bann konsesyon pa zanmen ganny aboli. 37Alor, fer sir ki en kopi sa let i ganny anvoye kot Zonatan e ki i ganny afise dan en landrwa byen vizib lo montanny sen.”
Trifon I Zwe Rol
38Kan lerwa Demetriis ti war ki pei ti trankil san okenn lopozisyon kont li, i ti demobiliz son troup e anvoy zot se zot. Me i ti gard bann mersener ki i ti'n rekrite dan bann zil Grek. Pour sa rezon ki bann solda ki ti servi bann lerwa avan pa ti kontan li.
39En serten Trifon, en ansyen ki ti siport Aleksann, ti war ki bann troup ti pe konplent kont Demetriis. I ti al kot Yanmlikos, sa Arab ki ti pe elve Antyokis, garson Aleksann. 40I ti ensiste ki Yanmlikos i remet li sa zanfan pour li vin lerwa dan plas son papa. Trifon ti osi rakont li desizyon Demetriis, e ki bann solda i deteste lerwa. Trifon ti reste kot Demetriis pandan plizyer zour.
41Zonatan ti anvoy en demann kot lerwa Demetriis pour ki i retir tou troup dan sitadel Zerizalenm e dan lezot bann fortifikasyon, akoz zot kontinyelman pe lager kont Izrael. 42La repons ki Demetriis ti anvoy Zonatan:
“Mon pou non selman fer sa ki ou'n demande pour ou nasyon, me dan premye lokazyon, mon pou osi akord ou ek ou nasyon gran loner ankor. 43Pour le moman, anvoy mwan bann troup pour siport mwan akoz tou mon larme in revolte kont mwan.”
44Zonatan ti anvoy kot lerwa, 3,000 parmi bann meyer konbatan Antyos. Demetriis ti kontan kan i ti war zot. 45En lafoul 120,000 ti'n deza rasanble dan lavil pour touy lerwa. 46Demetriis ti sov dan son pale, pandan ki lafoul ti pran pozisyon dan bann semen prensipal dan lavil e konmans lager.
47Alor, lerwa ti apel bann Zwif pour vin donn li lasistans e zot ti rasanble otour li. Zot ti fann en pe partou atraver lavil e masakre anviron 100,000 zonm. 48Zot ti met dife partou dan lavil e sezi en kantite byen. Konmsa ki zot ti sov lavi lerwa.
49Kan zabitan lavil ti war ki bann Zwif ti'n pran kontrol lavil fasilman, zot ti perdi lespwar. Zot ti kriye e sipliy lerwa:
50“Akord nou lape! Fer bann Zwif aret lager kont nou e kont nou lavil.”
51Zot ti depoz zot zarm e fer lape. Bann Zwif ti ganny gran prestiz devan lepep e devan lerwa. Zot ti retourn Zerizalenm avek en kantite depouy lager.
52Rwayonm Demetriis ti vin pli solid e ti annan lape dan pei. 53Me i ti kas son bann promes e vin lennmi Zonatan. I pa ti montre rekonesans pour tou sa dibyen ki Zonatan ti'n fer pour li. I ti kontinyelman maltret li.
Trifon I Pran Pouvwar
54Apre sa bann levennman, Trifon ti retournen avek sa zenn garson, Antyokis. I ti kouronn li koman lerwa. 55Troup ki Demetriis ti'n anvoy se zot ti retournen e rasanble otour li. Zot ti lager kont Demetriis ki ti ganny bate e i ti sove. 56Trifon ti sezi bann lelefan e pran kontrol Antyos.
57Apre, zenn Antyokis IV ti ekri Zonatan, “Mon konfirm ou koman Gran-Pret. Mon plas ou ansarz sa kat distrik#11.57 War 11.34 e mon donn ou tit zanmi lerwa.”
58I ti osi anvoy li bann lakoup annor ek en servis detab. I ti donn li drwa bwar dan sa bann lakoup annor e met rob rouz pour seremoni avek bros annor#11.58 War 10.89..
59I ti etabli Simon, frer Zonatan, gouverner teritwar ki ant montanny ki apel Leskalye Tir ek frontyer Lezip.
Kanpanny Zonatan ek Simon
60Apre sa, Zonatan ti ale. I ti travers larivyer Efrat e pas dan bann lavil ki dan Gran Lasiri. Tou larme Lasiri ti ralye deryer li. Kan zot ti ariv Askelonn, bann zabitan ti byen resevwar li avek loner.
61Apre, Zonatan ti al Gaza; me bann zabitan Gaza ti ferm laport lavil. Alor, i ti anserkle lavil, met dife dan son zalantour e sezi tou zot byen.
62Bann zabitan Gaza ti pled avek Zonatan, ki ti fer lape avek zot. Me i ti pran bann garson bann sef koman otaz e anvoy zot Zerizalenm. Answit, i ti travers pei ziska Damas.
63Zonatan ti tande ki bann zofisye Demetriis ti'n ariv pre avek Kades dan Galile avek en gran larme. Zot ti'n vin pour tir li dan son post. 64I ti sorti kont zot, me i ti kit son frer Simon dan Zide. 65Simon ti etabli son kan devan Bet-Sour. I ti anserkle sa lavil e konbat pandan plizyer zour. 66Finalman, bann zabitan ti demann lape. Simon ti aksepte, me i ti sas zot, pran posesyon lavil kot i ti plas en troup.
67Kanta Zonatan, i ti kanp pre avek lak Zenezaret. Byen granmaten, i ti sorti avek son troup e mars ver laplenn Hasor. 68Larme lennmi ti zwenn li dan laplenn, me en parti solda ti reste dan montanny pour fer en lanbiskad. Pandan ki larme ti pe avanse pour atak li anfas, 69troup ki ti'n kasyet ti sorti pour atake ansanm avek lezot. 70Bann zonm Zonatan ti sove. Pa ti reste personn, sof de komandan larme: Matatyas, garson Absalon ek Zida, garson Salfi. 71Alor, Zonatan ti desir son lenz, fann lapousyer lo son latet e priye.
72Apre, i ti retourn dan konba kont lennmi; i ti bat zot e zot ti sove. 73Kan son bann zonm ki ti pe sove ti war sa, zot ti rasanble avek li pour pourswiv lennmi ziska Kades, kot zot ti etabli zot kan. 74Sa zour, lennmi ti perdi anviron 3,000 zonm e Zonatan ti retourn Zerizalenm.
Currently Selected:
1 Makabe 11: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.