1 Makabe 8
8
Lalyans avek bann Romen
1Zida ti'n antann renonmen bann Romen, koman bann vayan gerye ki bon anver bann ki fer lalyans avek zot; ki zot ti dakor pour fer zanmi avek sa enn ki ti demande. 2Sa bann Romen ti bann brav gerye. Zida ti antann koz lo lager ek bann aksyon ekstraordiner ki bann Romen ti'n akonpli: Zot ti fer soumet bann Golwa e fer zot pey taks.
3Zida ti osi antann koz lo zot sikse dan Lespany pour kontrol bann min larzan ek lor. 4Gras a zot stratezi ek zot perseverans, zot ti'n osi pran kontrol sa rezyon antye, menm si sa landrwa ti tre lwen avek Ronm. Zot ti'n bat bann lerwa ki ti'n vin depi lwen pour atak zot. Bann Romen ti bat zot e zot ti ganny kraze. Zot ti bezwen soumet zot. Lezot ti bezwen pey taks toulezan.
5Bann Romen ti'n osi ganny laviktwar lo Filipi ek Perse, bann lerwa Masedwann, e lo bokou lezot ki ti'n revolte kont zot. 6Zot ti menm kraz Antyokis Legran, lerwa Lazi ki ti al atak zot avek en gran larme 120 lelefan, zonm apye, kavalri ek kales lager. Li osi, i ti ganny kraze. 7Zot ti kaptir li vivan e obliz li avek son bann sikseser pey en gro taks, e livre zot bann otaz. 8I ti oblize livre avek lerwa Emenn, bann provens enportan, tel ki Lenn, Medi ek Lidi.
9Bann Grek ti'n fer plan pour al fer lager kont bann Romen e detri zot. 10Me bann Romen ti antann legzistans sa plan. Alor, zot ti anvoy en zeneral pour atak bann Grek. En kantite Grek ti ganny touye: Fanm ek zanfan ti ganny pran prizonnyen. Bann Romen ti depouy zot avek zot byen, pran pei, detri bann fortifikasyon e soumet zot anba lesklavaz ziska ozordi.
11Lezot rwayonm ek bann zil ki ti'n reziste, ti ganny devaste e soumet anba lesklavaz. 12Me zot ti reste zanmi fidel avek bann alye ki ti pe depann lo zot e dan ki zot ti annan konfyans. Zot ti soumet anba zot kontrol bann pei ki ti pre oubyen lwen. Dimoun ki ti antann koz lo zot, ti per zot.
13Bann Romen ti etabli dimoun ki zot ti oule koman lerwa. Zot ti retir sa bann ki pa ti fer zot plezir. Zot ti'n ariv lo some zot pouvwar.
14Malgre tousala, bann Romen pa ti port kouronn ek bann lenz rwayal pour ganny en loner personnel. 15Zot ti kre en sena kot 320 manm ti reini sak zour pou diskit problenm byennet lepep e asir en bon gouvernans. 16Sak lannen, zot ti konfye avek en sel parmi zot, pouvwar pou gouvern zot ek lanpir antye. Tou dimoun ti obei sa sel zonm e personn pa ti montre lanvi oubyen zalouzi.
Lalyans avek Ronm
17Alor, Zida ti swazir Epolenm, garson Zan e pti zanfan Akos ansanm avek Zason, garson Eleazar, pour anvoy zot Ronm pour al etabli en lalyans lanmitye. 18Konmsa ki Zida ti mazin delivre zot anba kontrol rwayonm Grek ki ti'n plas bann Izraelit konpletman dan lesklavaz.
19Apre en long vwayaz, Epolenm ek Zason ti ariv Ronm. Zot ti antre dan sena e adres lasanble avek sa bann parol, 20“Zida Makabe, son bann frer ek pep Zwif, in anvoy nou pour etabli en lalyans lape avek zot. I nou dezir ganny anrezistre koman zot alye e zanmi.”
21Sa propozisyon ti fer plezir bann senater. 22La kopi sa let ki ti ganny ekri lo en plak an bronz pour anvoy Zerizalenm koman en memwar lape ek lalyans, 23“Nou swet boner ek prosperite pour bann Romen ek nasyon Zwif lo lanmer, lo later pour touzour, lwen avek lager ek bann lennmi.
24Si Ronm ek son bann alye dan nenport landrwa son lanpir i ganny menase par lager, 25nasyon Zwif pou konbat avek tou son leker akote Ronm, dapre sirkonstans sa moman. 26I pa pou ni donnen, ni pret lennmi okenn provizyon legren, zarm, larzan, oubyen bato parey Ronm in deside. I ava respekte son langazman san ekspekte resevwar okenn keksoz an retour.
27Dan menm fason, si lager i ganny deklare kont nasyon Zwif, volonterman, bann Romen pou azir avek tou zot leker koman alye dapre sirkonstans. 28Zot pa pou donn lennmi ni legren, ni zarm, ni larzan, ni bato, parey Ronm in deside. Zot ava respekte lwayalman zot langazman.”
29Sa ti term lakor ki bann Romen ti fer avek pep Zwif. 30Si plitar, sa de alye i deside azoute oubyen retir okenn lartik dan sa lakor, zot ava kapab fer li. Tou sa ki ava ganny azoute oubyen retire ava obligatwar.
31Lo size move tretman ki lerwa Demetriis pe fer zot, la sa ki nou'n ekri, “Akoz ou pe kraz nou bann zanmi Zwif konmsa? 32Si zot akiz ou ankor e demann nou led kont ou, nou pou defann zot drwa lo lanmer e lo later.”
Currently Selected:
1 Makabe 8: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.