1 Makabe 7
7
Gran-Pret Alkim ek Kanpanny Nikanor
(2 Mak 14.1-10)
1Dan lannen 151#7.1 Savedir lannen 161 avan Zezi-Kri., Demetriis, garson Selekis, ti sove Ronm. Avek en group zonm, i ti pran bato e ariv dan en pti lavil obor lanmer. La, i ti proklanm li lerwa.
2Kan i ti pe ariv dan pale rwayal son zanset, larme ti sezi Antyokis ek Lisyas pour anmenn zot kot Demetriis. 3Me ler i ti tande sa ki ti pe pase, Demetriis ti dir:
“Mon pa oule war zot.”
4Alor, larme ti touy zot e Demetriis ti pran tronn son rwayonm.
5Apre, bann Zwif rebel kont lalwa ek bann tret, ti al war li avek Alkim, ki ti oule vin Gran-Pret. 6Zot ti anmenn devan lerwa sa lakizasyon kont bann Zwif:
“Zida ek son bann frer in touy tou ou bann zanmi e i'n sas nou dan nou pei. 7Alor, nou demann ou anvoy en zonm dan ki ou annan konfyans, pour ki i al war dega ki Zida in fer dan nou pei e dan rwayonm. Donn li lord pini Zida, son bann frer ek tou bann ki siport zot.”
8Alor, lerwa Demetriis ti swazir Bakides, enn bann zanmi lerwa, ki ti gouverner dan provens ki lo lot kote larivyer Efrat. Bakides ti en zonm enportan dan rwayonm e lwayal anver lerwa. 9Lerwa ti anvoy li avek Alkim, sa zonm malonnet, ki i ti nonmen koman Gran-Pret. Zot ti ganny lord pour al pini bann Zwif. 10Zot ti al avek en gran larme. An arivan dan pei Zide, zot ti anvoy bann mesaze kot Zida ek son bann frer avek en fo mesaz lape. 11Kan Zida ek son bann frer ti war sa gran larme, zot pa ti krwar dan sa bann mesaze.
12En group ansennyan Lalwa ti al war Alkim ek Bakides avek en demann pour trouv en solisyon akseptab. 13Bann Hasideen#7.13 War 2.42. ti premye parmi bann Zwif pour rod lape. 14Annefe, zot ti dir, “I annan en pret dan desandans Aaron parmi zot. I pa pou fer nou okenn ditor.”
15Alkim ti koz lape avek zot; i ti donn zot lasirans avek serman, “Nou pa pou fer zot okenn ditor, ni zot zanmi.”
16Zot ti fer li konfyans. Me Alkim ti fer aret 60 zonm parmi zot e touy zot tou dan en sel zour, parey lekritir i deklare#7.16 War Ps 79.2-3.:
17Zot in repann kadav bann fidel
e fer koule disan partou otour Zerizalenm.
Ti napa personn pour anter zot.
18Alor, lepep ti tranble avek lafreyer. Zot ti dir, “Sa bann zans, zot manter e malonnet. Zot pa'n respekte lakor ek serman ki zot ti'n fer.”
19Bakides ti kit Zerizalenm e al kanp Bet-Zait. I ti fer aret en kantite zonm ki ti'n zwenn son kan ek serten bann Zwif. I ti fer touy zot e zet zot dan en pwi byen fon. 20I ti met Alkim ansarz sa provens e donn li en larme pour ed li. Apre, Bakides ti retourn kot lerwa.
21Alkim ti lite pour fer li ganny rekonnet koman Gran-Pret. 22Tou bann ki ti pe senm konfizyon parmi lepep ti group otour li. I ti fer bokou ditor bann Izraelit.
23Zida ti war tou sa bann ditor ki Alkim ek son group ti pe fer bann Izraelit. I ti menm depas sa ki bann non-Zwif ti'n deza fer. 24Alor, Zida ti fer letour partou dan bann rezyon Zide pour pini bann tret ki'n zwenn avek Alkim e anpes zot sirkile atraver pei. 25Ler Alkim ti remarke ki Zida ek son group ti'n vin pli for e ki i ti nepli kapab reziste zot, i ti al kot lerwa e akiz zot toudsort krim.
Nikanor dan Zide
(2 Mak 14.10-36)
26Nikanor ti enn bann personnaz enportan ki ti deteste pep Izrael en kantite. Lerwa ti anvoy li avek lord detri pep Izrael.
27Kan Nikanor ti ariv Zerizalenm avek en gran larme, i ti anvoy fo mesaz lape pour tronp Zida ek son bann frer. I ti dir zot, 28“Fodre pa ki i annan lager ant nou. Mon pou vin kot ou avek en pti group solda dan lape.”
29Kan Nikanor ti ariv kot Zida, zot ti sanz salitasyon amikal; me bann lennmi ti'n pare pour kaptir Zida. 30Zida ti konpran ki ti annan en pyez ladan. I ti per e i ti koup kourt sa rankont avek Nikanor. I ti refize zwenn li ankor.
31Kan Nikanor ti konpran ki son plan ti'n ganny dekouver, i ti deside al atak Zida pre Kafarsalama. 32Anviron 5,000 zonm lo kote Nikanor ti ganny touye dan konba, leres ti sov dan lavil David.
Menas kont Tanp
33Apre sa bann levennman, Nikanor ti mont lo montanny Siyon. Serten pret sorti dan tanp ek bann sef parmi lepep ti vin zwenn li avek salitasyon lape. Zot ti montre li bann sakrifis konplet ki ti pe ganny ofer pour lerwa. 34Me Nikanor ti ensilte zot e denigre zot, rann zot enpir e koz avek bokou larogans. 35Avek lakoler, i ti fer en serman, “Si safwasi, Zida avek son bann zonm pa ganny livre dan mon lanmen, mon pou retourn isi de ki lager i fini e met dife dan sa tanp.”
I ti sorti dan en gran lakoler. 36Bann pret ti antre dan lakour e debout devan tanp kot lotel. Zot ti dir an pleran:
37Senyer! Ou'n ki'n swazir sa tanp
pour port ou non,
koman en landrwa lapriyer
ek siplikasyon pour ou pep.
38Pini sa zonm ek son larme;
ki zot ganny masakre.
Pa oubliy zot bann ensilt
e pa les zot kontinyen viv.
39Nikanor ti kit Zerizalenm e al kanp Bet-Horonn kot en larme Siriyen ti vin zwenn avek li. 40Zida, avek 3,000 zonm, ti etabli son kan Hadasa. I ti priye:
41Senyer! Kan bann mesaze lerwa ti ensilte ou,
ou lanz ti aparet e touy 185,000 zonm.
42Alor, kraz sa larme osi ki devan nou ozordi.
Konmsa, bann sirvivan ava konnen
ki Nikanor in ensilte ou tanp.
Ziz li dapre son mesanste.
43Bann larme ti angaz konbat le 13, dan mwan Adar#7.43 Anviron 28 Mars, lannen 160 avan Zezi-Kri.. Larme Nikanor ti ganny kraze; li menm ti premye pour ganny touye dan konba.
44Ler son larme ti war ki Nikanor in tonbe, zot ti zet zot zarm e sove. 45Bann Zwif ti pourswiv zot pandan en lazournen antye, depi Hadasa ziska Gezer. Zot ti kontinyen fer soufle tronpet sinyal lager par deryer zot. 46Dimoun ti sorti partou dan tou bann vilaz dan Zide e zot ti atak lennmi lo de kote e fer zot refoul lo bann ki ti pe atak par deryer. Tou bann solda Nikanor ti ganny masakre; pa en sel ti sape.
47Bann Zwif ti sezi bann zarm ek bann depouy lager ki lennmi ti'n abandonnen. Zot ti sot latet Nikanor ek son lanmen drwat ki i ti'n leve avek arogans. Zot ti ekspoz li devan tou bann zabitan Zerizalenm. 48Lepep ti selebre dan kontantman; sa zour ti en zour lazwa. 49Zot ti fer sa zour en zour selebrasyon sak lannen dan mwan Adar. 50Pei Zide ti ganny lape pour en pe letan.
Currently Selected:
1 Makabe 7: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.