1 Makabe 6
6
Bann Dernyen Zour Antyokis Epifann
(2 Mak 1.11-17; 9.1-21; 10.9-11)
1Lerwa Antyokis ti pe travers bann provens ki dan leo son rwayonm, kan i ti aprann ki Elimais, en lavil dan Lapers, ti enportan akoz son larises larzan ek lor. 2Tanp sa lavil ti tre ris avek bann boukliye annor, zile proteksyon, zarm ki'n ganny lese par Aleksann, garson Filip, lerwa Masedwann, premye lerwa bann Grek. 3Alor, i ti esey pran sa lavil e sezi son larises. Me i pa ti reisi akoz son plan ti'n ganny devwale avek bann zabitan 4ki ti reziste dan en batay. I ti oblize sove e retourn Babilonn dan en gran laont.
5Lerwa Antyokis ti ankor an Pers, kan i ti aprann ki larme ki ti'n al atak teritwar Zida ti'n ganny bate. 6Lisyas ki ti'n al laba avek en tre gran larme byen pwisan, ti'n ganny en bon rakle. I ti bezwen sove devan bann Zwif ki ti'n vin pli for. Annefe, bann Zwif in ganny ranforsi zot kapasite militer avek bann zarm ek bokou provizyon ki zot ti'n sezi avek larme ki zot ti'n kraze. 7Zot ti'n detri sa bann keksoz degoutan ki ti'n ganny plase lo lotel dan Zerizalenm. Zot ti'n antour tanp avek en gran miray parey avan. Zot ti'n osi fortifye Bet-Sour, enn bann lavil lerwa.
8Kan lerwa ti aprann sa nouvel, i ti telman etonnen e boulverse ki i ti tonm malad. An dezespwar, i ti bezwen reste lo lili. Annefe, son plan pa ti'n mars parey i ti anvi. 9I ti reste lo lili pandan plizyer zour. Son dezespwar ti ogmante kan i ti realize ki i ti pe mor. 10Alor, i ti konvok son group zanmi. I ti dir zot, “Mon pa kapab dormi; traka in akapar mwan. 11Mon demann mwan menm dan ki kalite tourman mon'n tonm ladan. Pourtan, mon ti ere e dimoun ti byen kontan mwan kan mon ti annan tou mon pouvwar. 12Aprezan, mon mazin tou dimal ki mon'n fer dan Zerizalenm. Mon ti sezi tou bann lobze annarzan e annor ki ti annan. Mon ti fer detri bann zabitan dan Zide san okenn rezon. 13Mon konnen: Akoz tousala, ki tou sa maler in tonm lo mwan. La mon pe mor avek dezespwar dan en pei etranze.”
14Apre, i ti fer apel Filip, enn son bann zanmi ki i ti met ansarz pour gouvern son rwayonm antye. 15I ti donn li son kouronn, son rob ek son bag ki osi son sele. I ti konfye li son garson Antyokis pour elve li e fer li vin lerwa. 16La, an Pers, ki Lerwa Antyokis ti mor dan lannen 149#6.16 Savedir dan lannen 164 avan Zezi-Kri..
17Kan Lisyas ti aprann lanmor lerwa, i ti etabli Antyokis, garson lerwa ki i'n elve depi son lanfans, pour vin lerwa dan son plas. I ti apel li Epator.
Latak Sorti Siri
18Pandan sa letan, lennmi dan fortres Zerizalenm ti kontinyen blok bann Izraelit otour tanp. Zot ti rod tou mannyer pour fer dimal bann Izraelit e ranforsi pozisyon bann non-Zwif.
19Alor, Zida Makabe ti deside detri zot. I ti rasanble son pep antye pour atak zot. 20Bann Izraelit ti rasanble e anserkle sitadel dan lannen 150#6.20 Savedir dan lannen 163-162 avan Zezi-Kri.. Zot ti konstri bann masin lager.
21Me serten bann zonm dan barikad ti reisi sove e zwenn ansanm avek en group Izraelit rebel. 22Zot ti al kot lerwa Antyokis Epator. Zot ti dir li, “Konbyen letan ou pou espere avan ou pini nou lennmi e vanz nou pep? 23Nou ti aksepte servi ou papa, swiv son bann lord e obeir son bann lalwa. 24Pour sa rezon, nou prop dimoun in vin nou lennmi; zot in anserkle sitadel e tret nou koman bann etranze. Zot i'n menm touy serten parmi nou e sezi tou nou byen. 25Zot pa'n atak zis nou, me osi tou bann pei dan zalantour.
26Aprezan, gete! Zot pe menm anserkle sitadel Zerizalenm pour pran li apre. Zot in menm konstri miray proteksyon avek sanktyer ek lavil Bet-Sour. 27Si ou pa aret zot deswit, zot pou fer plis ankor e ou pa pou kapab met en fren avek zot.”
28Kan lerwa Antyokis Epator ti antann sa, son lakoler ti monte. I ti rasanble son group zanmi, bann komandan larme ek bann sef. 29I ti ralye osi bann mersener sorti dan lezot rwayonm ek bann zil Grek. 30I ti annan en larme 100,000 zonm apye, 20,000 kavalye, 32,000 lelefan ki abitye avek konba. 31Zot ti travers Idoume e al anserkle Bet-Sour. Pandan plizyer zour, zot ti atake avek bann masin lager. Me bann Zwif ti fer en latak. Zot ti met dife dan sa bann masin e konbat avek kouraz.
Batay Bet-Zakarya
32Alor, Zida ti tir son troup kont sitadel Zerizalenm e al enstal li Bet-Zakarya, vizavi kan lerwa. 33Lannmen granmaten, lerwa ti fer son larme avans pli vit posib lo semen Bet-Zakarya. Son troup ti pran pozisyon konba e sonn bann tronpet. 34Zot ti donn bann lelefan zi rezen melanze avek siro lamir pour eksit zot pour konba. 35Bann zannimo ti ganny reparti ant bann inite solda apye: En lelefan pour 1,000 zonm apye ek 500 kavalye. Zot ti arme avek bann long lans e proteze avek en boukliye. Zot ti met lenz proteksyon an metal ek kas an bronz lo latet. Zot ti form en group solid ki ti protez bann lelefan lo kote. 36Zot ti pozisyonn zot dapre mouvman sa zannimo. Zot pa ti kit li; partou kot i ti ale, zot ti la. 37Lo ledo sak zannimo ti annan en tour an bwa ki ti byen sengle avek lakord spesyal. Sa tour ti protez sa kat gerye ki ti konbat lo sa bann zannimo ek son kondikter Endyen. 38Leres bann kavalye ti form en ranze lo sak kote larme pour atak lennmi e protez bann zonm apye. 39Bann boukliye annor e an bronz ti briye dan soley konmsi bann kolin ti anflanm. Zot ti briye parey bann flanbo alimen.
40En parti larme lerwa ti an pozisyon partou lo latet kolin; en lot group ti dan laplenn. Zot ti avanse dousman e annord. 41Tou dimoun ti tranble avek lafreyer ler zot ti antann tapaz lamars sa gran larme, tapaz bann zarm en gran larme pwisan.
42Zida ek son larme ti avanse e atake; 600 solda dan larme lerwa ti ganny touye. 43Eleazar ki zot ti apel Avarann, ti remarke ki enn bann lelefan ti pli gro ki lezot e ki i ti port lekipman rwayal. I ti mazinen ki lerwa ti lo sa zannimo. 44Alor, i ti deside donn son lavi pour sov son pep e kre en non ki pa pou ganny oubliye. 45Avek kouraz, i ti lans dan milye bann zonm apye, touy bann zonm adrwat e agos; zot ti ekarte devan li lo de kote. 46I ti reisi ariv anba sa lelefan, pik li anba son vant e touy li. Me lelefan ti tonm lo li e i ti mor. 47Kan bann Zwif ti war lafors larme lerwa e ferosite zot latak, zot ti sove.
Priz Tanp
(2 Mak 13.18-23)
48Bann solda dan larme lerwa ti swiv zot Zerizalenm pour al atak bann Zwif. Larme lerwa ti kanp dan Zida e anserkle montanny Siyon. 49Lerwa ti fer lape avek bann zabitan Bet-Sour; zot ti bezwen evakye lavil akoz zot ti napa provizyon avek zot, pour kapab reziste. Annefe, sa lannen ti en lannen repo sabatik pour later. 50Alor, lerwa ti pran Bet-Sour e stasyonn en troup laba pour vey lavil. 51I ti kanp devan sanktyer pandan en bon pe letan. I ti enstal bann masin lager pour atak bann Zwif e defons miray. Zot ti servi bann dart laflanm, katapilt, dart feray ek fles. 52Bann Zwif osi ti konstri zot masin pour detri masin lennmi. Zot ti lager pandan plizyer zour. 53Me zot ti napa provizyon manze akoz ti setyenm lannen. An plis ki sa, bann Zwif ki ti'n sorti dan pei etranze pour vin kasyet dan Zida ti'n manz tou sa ki ti'n reste. 54Akoz lafanmin, zis detrwa zonm ti'n reste dan tanp; leres ti'n fannen, sakenn dan son kote.
Siri I Ofer Kondisyon
(2 Mak 13.23-26; 11.22-26)
55Antretan, Lisyas ti aprann ki Filip 56ti'n retournen sorti Lapers ek Medi avek larme ki ti'n al avek li. I ti osi aprann ki lerwa ti anvi pran kontrol gouvernman. Li menm sa Filip ki lerwa Antyokis dan son vivan, ti'n konfye son garson pour fer li vin lerwa. 57Lisyas ki ti pe osi ale, ti deswit donn lord pour bat an retret. I ti dir avek lerwa, bann komandan, bann troup ek bann gerye, “Zour an zour, nou lafors pe diminyen; provizyon manze i vin pli rar. Landrwa ki nou pe anserkle in ganny byen fortifye, e nou bezwen okip bann zafer rwayonm. 58Alor, annou tonm dakor pour les sa pep kontinyen viv dapre zot koutim e fer lape avek zot ek zot nasyon antye. 59Annou tonm dakor pour les zot viv dapre zot lalwa parey avan. Annefe, zot ti revolte e koz tou sa bann troub akoz nou ti'n aboli zot lalwa.”
60Sa sizesyon ti fer plezir lerwa ek bann komandan. Zot ti anvoy en mesaz propozisyon lape kot bann Zwif ki ti aksepte. 61Lerwa ti donn son parol konmkwa i pou respekte sa lakor. Alor, bann Zwif ti sorti dan zot bann fortifikasyon. 62Kan lerwa ti ariv lo montanny Siyon, i ti war ki sa landrwa ti byen proteze. I ti kas son promes e donn lord pour detri miray ki ti toultour.
63Apre, i ti depese pour retourn Antyos, kot i ti war ki Filip in fini pran kontrol lavil. Me i ti atak li e pran lavil par lafors.
Currently Selected:
1 Makabe 6: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.