1 Makabe 5
5
Lager kont bann Nasyon Vwazen
(2 Mak 10.14-33)
1Bann pep vwazen ti ankoler kan zot ti tande ki lotel ti'n ganny rekonstri e tanp konsakre parey avan. 2Zot ti determinen pour detri bann desandan Zakob ki ti pe reste parmi zot. Alor zot ti masakre lepep ki ti pe viv parmi zot e detri zot.
3Zida ti al lager kont bann desandan Ezai dan Idoume, ki ti reste Akrabatenn, akoz zot ti en menas otour zot. Zida ti donn zot en bon bate e sezi bokou zot byen. 4I ti rapel mesanste tribi Baya ki ti toultan en menas pour lepep. Zot ti met latrap ek lasenn pou bar semen bann Izraelit. 5Zida ti ferm zot dan zot fortifikasyon. I ti anserkle zot e promet pour detri zot. I ti met dife avek zot fortres e bril bann ki ti anndan.
6Apre, i ti al atak bann Amonit. I ti fer fas avek en gran larme byen pwisan. Timote ti zot sef. 7Zida ti atak zot plizyer fwa e reisi kraz zot. 8Avan retourn dan Zide, i ti pran lavil Yaser ek son bann vilaz#5.8 War Eza 16.8..
Zida I Delivre bann Zwif dan Galile
9Bann zabitan non-Zwif dan Galaad, ti group ansanm kont pep Izrael ki ti pe viv dan zot teritwar e ki ti pe fer plan pour detri zot. Me bann Izraelit ti al pran refiz dan fortres Datema.
10Zot ti anvoy en mesaz kot Zida ek son bann frer pour dir, “Bann non-Zwif otour nou pe prepare pour detri nou. 11Zot in pare pour anserkle landrwa kot nou pe kasyet. Timote i zot sef. 12Alor, vin sov nou, akoz deza i annan bokou parmi nou ki'n ganny touye. 13Tou nou fanmir ki ti dan pei Tob in fini ganny touye. Bann lennmi in kaptir bann fanm ek bann zanfan avek tou zot byen. Zot in detri anviron 1,000 dimoun laba.”
14Pandan ki sa mesaz ti pe ganny lir, en lot group mesaze sorti Galile ti arive dan lenz desire, avek menm rapor. 15Zot ti dir:
“Bann zabitan Ptolemais, Tir ek Sidon, in met zot ansanm kont nou, avek bann non-Zwif dan Galile antye, pour ekstermin nou.”
16Kan Zida ek lepep ti antann sa bann mesaz, zot ti konvok en lasanble pour determinen ki fodre fer pour zot bann frer ki dan gran maler anba latak bann non-Zwif. 17Zida ti dir avek son frer Simon, “Swazir en group zonm e al sov ou bann frer dan Galile. Mon frer Zonatan ek mwan, nou ava al Galaad.”
18I ti les Zozef, garson Zakari, ek Azarya, en sef parmi lepep, avek leres troup aryer pour defann Zide. 19I ti donn zot sa lord:
“Pran ansarz sa pep, me pa angaz ou dan okenn konba ziska ki nou retournen.”
20Zot ti donn Simon 3,000 zonm pour al Galile e 8,000 ti al Galaad avek Zida.
Viktwar Simon ek Zida
(2 Mak 12.10-31)
21Alor, Simon ti al Galile e angaz dan plizyer konba kont bann non-Zwif ki zot ti bate e fer taye. 22I ti pourswiv zot ziska laport Ptolemais. Bann Izraelit ti touy anviron 3,000 non-Zwif e sezi zot zarm.
23Simon ti pran avek li bann Zwif ki ti dan Galile ek Arbata, zot bann fanm, zot bann zanfan, ek tou sa ki zot ti posede. I ti anmenn zot dan Zide avek gran selebrasyon.
Zida ek Zonatan dan Galaad
24Zida Makabe ek son frer Simon ti travers larivyer Zourden e mars dan direksyon dezer pandan trwa zour. 25Zot ti rankontre bann Nabateen ki ti akey zot dan lape. Zot ti rakont sa ki ti'n arive avek bann Izraelit dan Galaad. 26Zot ti dir:
“Bokou in ganny pran prizonnyen dan bann gran lavil Bosora, Bosor, Alema, Sasfo, Maked ek Karnaim. 27Ti annan ankor dan lezot lavil Galaad. Bann lennmi ti'n pare pour atak bann fortifikasyon e osi detri tou sa bann dimoun dan en sel zour.”
28Alor, toudswit, Zida ek son larme ti retourn par semen dezer dan direksyon Bosora. Zot ti pran lavil, masakre tou bann zonm, sezi tou bann depouy lager e met dife.
29Zot ti kit sa landrwa dan lannwit e zot ti marse ziska fortifikasyon Datema.
30Lo granmaten, zot ti apersevwar en gran lafoul, ki pa kapab ganny konte. Zot ti pe anmenn lesel ek zarm lager pour pran sa fortifikasyon e atak bann Zwif ki ti anndan.
31Zida ti'n war ki lager ti'n konmanse e bann zabitan lavil ti pe kriy ver lesyel, avek son tronpet. 32Alor, i ti donn lord son larme:
“Konbat ozordi pour sov nou bann frer Izraelit.”
33I ti diviz son larme an trwa kolonn e apros zot par deryer. Zot ti sonn tronpet e priye an kriyan byen for.
34Kan Timote avek son larme ti realize ki sa ti Makabe, zot ti sove. Zida ti donn zot en bon bate e sa zour, anviron 8,000 zonm lennmi ti ganny touye.
35Apre sa, Zida ti fer en detour e al atak Alema ki i ti pran. I ti masakre tou bann zonm dan sa lavil ki i ti depouye e met dife.
36Depi la, i ti al atak Kasfo, Maked ek Bosor. I ti osi pran plizyer lezot lavil dan Galaad.
Lezot Laviktwar Zida dan Pei Galaad
37Apre, Timote ti form li en lot larme e i ti al kanp vizavi Rafonn, akote en pti larivyer. 38Zida ti anvoy son bann zonm espyonn otour kan lennmi. Zot ti fer sa rapor: Tou bann non-Zwif otour nou in ralye pour form en gran larme anba komannman Timote. 39Zot in osi pran bann mersener Arab pour ed zot. Zot in kanp lot kote larivyer, pare pour atake.
40Amezir ki Zida avek son larme ti apros larivyer, Timote ti dir ek bann zofisye son larme, “Si Zida i travers larivyer premye, nou pa pou kapab reziste; i pou sirman ganny laviktwar lo nou. 41Me si i montre ki i per e kanp lot kote larivyer, nou ava travers larivyer pour atak li e nou ki pou venker.”
42Ler Zida ti ariv kot larivyer, i ti poste son bann zofisye tou dilon larivyer. I ti donn zot sa lord, “Pa les personn kanpe. Fodre ki zot atak deswit.”
43Zida ti premye pour travers larivyer. Son larme ti swiv li e zot ti atak lennmi. Bann non-Zwif ti zet zot zarm e sove pour al kasyet dan sanktyer lavil Karnaim#5.43 Sa sanktyer i ganny konsakre anver bondye Astarte. War 2 Mak 12.26.. 44Zida ti pran sa lavil, met dife dan son tanp e bril tou, ansanm avek tou dimoun ki ti anndan.
45Apre sa, Zida ti rasanble tou bann Izraelit dan Galaad, pour kondwir zot dan Zide. I ti anmenn zot tou: Gran koman pti, fanm ek zanfan, avek tou zot posesyon. Sa ti fer en gran kantite dimoun. 46Zot ti ariv Efronn, en lavil enportan, tre for, ki zot ti oblize traverse, akoz i pa ti posib pas ni agos ni adrwat. 47Me bann zabitan sa lavil ti blok bann laport partou avek ros. 48Zida ti anvoy zot sa mesaz amikal, “Les nou pas atraver ou teritwar pour ariv kot nou. Personn pa pou fer zot ditor; nou oule zis pas apye.”
Me zot ti refize ouver laport pour li. 49Alor, Zida ti pas sa lord avek tou son larme, konmkwa zot pou kanp la kot zot ete.
50Alor, i ti kanpe avek son larme. Answit zot ti met zot pare pour atake. Zot ti konbat tou lazournen, tou lannwit. Finalman, lavil ti tonm dan zot lanmen. 51Zot ti masakre tou bann zonm, detri e depouy lavil. Apre, zot ti travers lavil lo bann kadav. 52Zot ti travers larivyer Zourden e ariv dan laplenn Bet-Seann. 53Zida ti kontinyen regroup bann ki ti pe trenn deryer. I ti ankouraz dimoun tou dilon semen, ziska ki zot ti ariv dan Zide. 54Alor, zot ti mont montanny Siyon dan en gran lazwa. Zot ti ofer sakrifis konplet, akoz personn parmi zot pa'n mor e ki zot in retournen sen e sof.
Defet Zozef ek Azarya
(2 Mak 12.32-45)
55Pandan ki Zida ek Zonatan ti dan Galaad e zot frer Simon ti pre avek Ptolemais dan Galile, 56Zozef, garson Zakari ek Azarya, bann sef larme, ti antann nouvel zot sikse dan bann konba. 57Zot ti dir ek kanmarad, “Annou fer nou repitasyon nou osi. Annou al atak sa bann nasyon etranze ki otour nou.”
58Alor, zot ti donn lord bann troup e zot ti atak Yamnia. 59Gorgyas ek son larme ti sorti kont zot pour konbat. 60Zot ti bat larme Zozef ek Azarya e pourswiv zot ziska lo frontyer Zide. Anviron 2,000 zonm Izraelit ti ganny touye sa zour.
61Zot ti sibir sa gran defet akoz zot ti anvi pas pour brav e zot pa ti'n ekout sa ki Zida ek son bann frer ti'n dir zot. 62Antouka, zot pa ti form parti sa bann zonm ki ti pou anmenn delivrans Izrael.
63Zida Makabe ek son bann frer ti ganny byen konsidere parmi pep Izrael antye, ensi ki parmi bann non-Zwif partou kot zot ti ganny mansyonnen. 64Dimoun ti antour zot pour felisit zot.
Sikse Hebron ek Filistya
65Apre sa, Zida ek son bann frer ti al atak bann desandan Ezai dan rezyon Sid. I ti atak Hebron ek son bann vilaz. I ti demoli bann fortifikasyon e bril bann fortres ki antour li.
66Apre, i ti al dan direksyon teritwar bann Filisten e travers lavil Maresa. 67Sa zour, ti annan serten pret ki ti ganny touye dan batay, akoz zot ti anvi montre ki zot brav. 68Me Zida ti fer en detour ziska Asdod, dan teritwar bann Filisten. I ti demoli zot bann lotel, bril stati zot bann fo bondye, depouy zot bann lavil e retourn dan pei Zide.
Currently Selected:
1 Makabe 5: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.