ZEKARIA 10
10
Nüchehnung Nyengchocho
1 Abüdongba te chisikyang tsing müthehngpü kihchieng. Atümung nengdang tsahmarü thümlangsohnung tsing ko nyükhi müthehba tsü Abüdongba. 2Nyitsarütinü kyothri ko amongrü te müchehmülohre, ta arahkheh ko amükhyu du arühnü ngure. Khürünü melang adüzü yorü, ta nüh du nümülare; arühnü alongdi jüba tsü amii mühle. Hütsünü nyitsarüti achahcho San kyo rümchire. Arüh langnürü mülichonü chongchare.
3 Abüdongba-nü yore, “I nyitsarü michah thsarü yangpirü te Ih wahre, ko Ihnü arüh khingchinung. Judarü tsü Iyo, ko Ih, Akohbong Abüdongba-nü arüh xükümnung. Arüh tsü re azeh I rothsa kuri kangnung. 4Arüh yolanü I müyurü michah yangthsanung yangthsarü, langnürü ko anüchirüti chüronung. 5Rothsarünü yanglong chongbongla arüh rorüh dhrümchicho kyo Judarünü akoh ngunung. Abüdongba arüh te zehchonü, arühnü arüh rorüh kuri chah pümrüti miinü koh chitanung.
6“Ihnü Judarü rezehsohnung;
Ihnü Israelrü khümchonung.
Ihnü arüh te chomangnung
ko arüh atümung kulang nüli ronung.
Arüh tsü Ihnü khodesü thrüchahchü müpehcho roh-i kangnung.
Ih, Abüdongba arüh Tsingrang;
Ihnü arüh kihchicho lalingnung.
7Israelrü tsü rothsarü kyo thrungnung,
Yongkha yongrü kyo künyangnung.
Hiba akoh hi arüh tsurü shümtsurünü lümkehnung
ko Abüdongba-nü tu nguchicho hütsü nengdang künyangnung.
8“Ihnü I nyitsarü dsinung
ko arüh müjang nübülungnung.
Ihnü arüh khümchonung ko
papade roh-i arüh mükhilong kangsohnung.
9Ihnü arüh tsishosohnye,
ashulanüsü arühnü Ih lümchehnung.
Arüh ko arüh tsurünirüti
khümchonung ko müjang kuh yang thali ronung.
10Ijip ko Assyria lanü Ihnü
arüh kuh yang noronung
ko arüh palu lih la lisohnung.
Ihnü Gilead ko Lebanon lasü lisohnung;
Alimih apüm nyitsarünü jengsohnung.
11Arühnü achongcha kihdi kehde,
Ih, Abüdongba-nü kihloh tsü xüpnung,
ko Nile asoh-uba tsü kungpehnung.
Amüthseh Assyria longlüm kangnung,
ko akohba Ijip tase changpehnung.
12Ihnü I müyurü rezehsohnung;
arühnü Ih mübünung ko yochonyinung.”
Abüdongba-nü choko.
Currently Selected:
ZEKARIA 10: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
