ZEKARIA 11
11
Akhingchirü Khülucho.
1Lebanon, nührü Cedar sing#11.1 Cedar Sing: Sing tsü yanglih ko yangthsarüti suhre azeh adüzüthsa bichicho.
trüp-pehnungthsa nührü kukhang khangthrung!
2Traang ko meshüng, cypres singdong,
Cedar khülupehko;
hütsüri ahechi singdongti thsangnyangpehko!
Traang ko meshüng, Bashan langsing,
Mürong amarürah kingthrümpehko!
3Yangthsarütinü longri trare;
arüh ahechi khupehko!
Kihkhünyingti rengcho nyieng;
Jordan jüp arüh rangmükuh thsangnyangpehko.
San Nyahrü Anyüh
4 Abüdongba I Tsingrang-nü Ite yocho, “Amüpsehnung liba santi nyahba nguchi nguching. 5Abüdongrünü arüh müpsehre ko arüh mümülangre. Arühnü shuh tsü ire ko yore, ‘Abüdongba Seing! Ihrü alirüe!’ San nyahrü arühbürü nüsü san mümüire.”
6 Abüdongba-nü yocho, “Ihnü adelü limih la süsü mümüinung. Nyitsarü atümung arühbürü yangthsarü pohki Ipunü yohpüjünung. Hütsüri yangthsarütinü alimih sehnahnung, ko Ihnü mükhümchonung.”
7San lihrü ko irühnü Ih mülihcho, ko amüpsehnung liba san-nyahrü tsü Ih kangcho. Ihnü ja anyüh hirocho: Khüdu te Ihnü “Achomang” ko khüdu te “Akehta” dsicho. Ko Ihnü santi tsü xükümcho. 8I thrünyirü aparü san nyahrü asang te Ihnü mürangchocho, ko choo khüdu lanü arüh apüm iipehcho. 9Hütsüpü Ihnü atii te tsü yocho. “Adelü Ih nührü nyahrü müthsanung. Sürü asünung liro arüh süsohng. Sürü athsangnyangnung liro, thsangnyangsohng. Anyingcho tsü arüh khüdunü khüdu changsohcho.” 10Hütsüpü Ihnü “achomang” ja tsü hirocho ko Abüdongba-nü yucho atümung te külüpba azengtacho tsü thsangnyangnung nengdang hütsü khyahsahcho. 11Hütsüta hütsü nyümong azengtacho tsü thsangnyangcho. San lihrü ko airünü Ih dhingyacho, Ihnü nguchicho khu Abüdongba-nü chotachoepü arühnü müdhecho. 12#Mat 26.15Ihnü arüh te yocho, “Nührünü lümkhang, I nyükheh ngang jüng. Ta mülümkhang, tüjü.” Achotsü arühnü I nyükheh ngang taripi sangre jücho.#Mat 27.9-10
13 Abüdongba-nü Ite yocho, “Hütsü amübükuh thsibong la yohpüng.” Achotsü arühnü khüi amüi I khyang jücho, hütsü taripi sangre tsü khyo amübü thsibong la yohjücho. 14Hütsü “Akehta” dsiba anyüuba ja tsü khyo Ihnü khyahsahcho ko Juda e Israel nyüh akehta thsangnyangcho.
15Adesü Abüdongba-nü Ite yocho, “Adesü san nyahba nguchi nguching, ade hilü amii mühle. 16Ihnü I san nyahnung san nyahrü khüdu yohpücho, ta santi drüsoh liba abinü müxüküm, achahcho müyangchi; lerohpeh liba mükyangjü, ko nying liba mükang. Hütsü mülih, abinü anyünyeh-uba shuh tsure ko arüh müzi mürahnahjüre. 17Hütsü amüdekheng san-nyahba tsü ahohah! Abinü abi santi thrüchahchüpehko. Chitanü abi tase changjünung. Apükyang kungkehpenung, ko anahtse tsalang tohpehnung.”
Currently Selected:
ZEKARIA 11: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
