ZEKARIA 9
9
Kurümrü Yuchoti Yukhacho
1 #
Isa 17.1-3; 23.1-18; Jer 49.23-27; Ezk 26.1—28.26; Joel 3.4-8; Amo 1.3-5, 9-10; Mat 11.21-22; Luk 10.13-14 Hiba hi Abüdongba yusi:
Hadrak lih ko Damaskas yangdi khingchinung yuzeng jüko. Israel hung du mah, ta Syria yangdiba zehnü Abüdongba yo. 2Hadrak lurü la liba Hamath tsü abi yo, hütsü roh-i axangchehrü zeh Tyre ko Sidon yangdi zeh. 3Tyre-nü abükyü nengdang yangtbü tbüko ko abükyü nengdang hon ko taripi sehnyeh roh-i bhümpüle. 4Ta Abüdongba-nü abükyü kangcho apüm hitsijünung. Abinü abükyü kuthsi kihdi la thohpehjünung, ko yangdi tsü alih rong trüpnung. 5#Isa 14.29-31; Jer 47.1-7; Ezk 25.15-17; Joel 3.4-8; Amo 1.6-8; Zef 2.4-7Ashkelon yangdinü hi ngu drünung. Gaza yangdinü hi ngu müci mükangkehnung. Hütsüta Ekron ko abükyü alongdi changpehnung. Gaza yangthsaba changpehnung, ko Ashkelon thrüchahchüpehnung. 6Ayohrütacho yuchoti Ashdod la linung. Abüdongba-nü yore, “Hiri amüthseh Filistiarü Ihnü longlümsohnung. 7Arühnü adelü ashühzeh shuh mütsunung, ko apa amamoh tsuyongnung mütsunung. Anyingcho atümung I nyitsarü kangnung ko Juda hung la tsutpu khüdu kangnung. Jebus-rü#9.7 Jebus-rü: Jerusalem athridirü nyitsarüti. David-nü hiba yangdi mahchehpü khangte arüh tsü abi pohki yohpücho. kyo Ekronrüsü I nyitsarü kangnung. 8Ihnü I lih nyahnung ko hütsü khu arorüh mülahkhusohnung rothsarü yohpünung. Adelü akhingchirü khyang I nyitsarü müdhrümchisohnung. I nyitsarü khüta chongchacho Ihnü nguko.”
Aronung Yangthsaba
9 #
Mat 21.5; Jhn 12.15 Künyangtaang, Zion-rü!
Akünyangnü züdeing, nührü Jerusalemrü!
Dhing, nührü yangthsaba nührü yang role!
Abi akoh ngu rore, ta longlüm kang
Gadu za khüdu chah pümpü rore.
10 #
N. Khi 72.8
Abüdongba-nü yore,
“Israel lanü khode kuri akhüluba khyümüipehjünung,
Jerusalem lanü kuri khyüjünung;
rothsala bichiba sing thsaluti khyahnahjünung.
Nührü yangthsabanü yuchotila yangtsa külüpnung;
Abinü kihdi khüdu lanü khüdu chii,
Eufrates yongkhi lanü alimih achangchi yangthsanung.”
Tsingrangba Nyitsarüti Külüpchijünung
11 #
Nüch 24.8
Abüdongba-nü yore,
“Kangmübü shühnü shingti nührü te zengtachonü,
Ihnü nührü nyüje kangsohnung
yangtsila kungcheh licho
shukuh lanü lehchehnung.
12Thalieng, adelü nührü alongdi lile;
nührü khümcho lih lang thalieng.
Ihnü ade nührü te yore,
“Nührü chongchacho
anyüshinü alaa amüwanung
Ihnü nührü khyang thali jünung.
13Ihnü singthsalu kyo Juda
ko Israel tsü tbüdeng roh-i bichinung.
Greek-rü nyüm chitanung, Zion tsü
nohsheng roh-i Ihnü bichinung.”
14 Abüdongba-nü apu müyurü michah ngusohnung;
Abinü tsingchi roh-i atbüdeng kyanung.
Amichahba Abüdongba-nü rühti mehnung;
Abinü kihjinglangnü tsingxinyübongla shemüsunung.
15Akohbong Abüdongba-nü Abi müyurü khümnung,
ko arühnü arorüh changjünung.
Arühnü amücharü kyo rothsala züdenung
ko arüh rorüh shüh threhnung;
Kangmübü shüh bholu chah
tungkehjücho kyo pohnung.
16Hütsü nyümong rode, Abüdongba-nü
Abi müyurü khümchonung.
San nyahrünü asanti dhsürü lanü khümchocho kyo.
Yangthsaba kuthri taripi kyo alih la hechinung.
17Limih tsü khüta atsa ko atsah atsa thsanung!
Tsang ko cikihnü dhrezarüti rezeh zinung.
Currently Selected:
ZEKARIA 9: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
