MATHI 19

Jisu-nü Azaba Nengdang Docho

(Mrk 10.1-12)

1Khode Jisu-nü hiri chokacho, abinü Galil pehjüpü Jordan Yongkhi khüulang Judea lih lang wücho. 2Sühdi amülah abi khanglang iiwücho, ko hütsüla abinü arüh kyangjücho.

3Farisirü khürü ronü abi thsadsü yocho, “Nyüh khüdunü yuzi khürü mütangpü anitpü zanung Ihsa yuzengnü mülarü mah-o?”

4 # Lip 1.27 Jisu-nü lalingcho, “Adikehti Tsingrangba-nü adhrerü ko khingkurü thrichoepü nührünü Amüsa yu mükhidhingcho do? 5#Lip 2.24 Ko Tsingrangba-nü yocho, ‘Hütsünü adhrerünü au ko atpa pehjüpü anitpü te lümkha linung, ko anyüh tsü khüdu kangnung.’ 6Hütsüeko adelü arüh tsü anyüh mah, ta khüdu du. Hütsünü; Tsingrangba-nü tu mükhongsohcho hütsü nyitsarünü müzasohbae.”

7 # Azk 24.1-4; Mat 5.31 Farisirü-nü abi te tsingdhingcho, “Khang tuepü azanung yuzi thrah anitpü khyang jüpü zanung Mosa-nü mülacho?”

8Jisu-nü lalingcho, “Nührü lasih müküprachonü, Mosa-nü nührü nitpürü zanung amülaba jücho. Ta athridinü hütsü roh-i mah. 9#Mat 5.32; 1 Kor 7.10-11 Hütsünü Ihnü nührü te yore, Sünü anitpünü longmülangba tu münguchipü abükyü zanang, ko aparü khingkurü khyünang abinü nahtrahnaxengre.”

10Amonotinü abi te yocho. “Dhrelanyü kahla hütsü roh-i likhang, kuh müthricho atsau.”

11Jisu-nü lalingcho, “Hiba adoba hi atümung nengdang mah, ta hütsü Tsingrangba-nü jücho nyitsarü khyang due. 12Adhrerünü kuh müthriba tsü yuzi papa lile: khürü hütsü roh-i nümüsucho; aparü tsü nyitsarünü xangmijücho; ko khürü ninglang Yanglih khyanglangnü kuh müthrire. Sünü hiba adoba khyüchochehro abinü hütsü roh-i nguchisohng.”

Jisu-nü Azarüti Müwajücho

(Mrk 10.13-16; Luk 18.15-17)

13Nyitsarü khürünü Jisu yang azarüti abi khehnü arüh chah thahpüsohnung ko arüh nengdang dangkhidangsohnung norocho, ta monotinü nyitsarüti tsü yübücho. 14Jisu-nü yocho, “Azarüti tsü I yanglang rosohng, arüh tüiti, tunüo ninglang Yanglih tsü hitari yo thsanung.”

15Abinü arüh chah akhehnü nyümkeh müwajüpü tsisohcho.

Alibong Dhrezarü

(Mrk 10.17-31; Luk 18.18-30)

16Shikhe khüdu Jisu yang nyüh khüdu ro tsingdhingcho, “Adorü, müchangkaba akang ngunung Ihnü nguchi atsa tu nguchinung?”

17Jisu-nü lalingcho, “Atsa nengdang nühnü tuepü Ite tsingdhingro?” “Atsalü nyüh khüdu du lile. Akang langi züdunyükhang yuzengti bichieng.”

18 # Nüch 20.13-16; Azk 5.17-20 “Khüiba yuzeng?” Abinü tsingdhingcho. Jisu-nü lalingcho “Tümüpseh; nahtrahnaxeng tübichi, tüfü; arahkheh la süsü tümülangjü; 19#Nüch 20.12; Azk 5.16; Lev 19.18 nüu ko nü tpa jengreng drüng; ko nühnü nü kurümrü nüpu roh-i müing.”

20“Ihnü yuzeng hiri atümung bichiko, Dhrezaba tsünü lalingcho. Ihnü apa tu nguchinung dhsütahro?”

21Jisu-nü abi te yocho, “Nüh dekhing kangnyükhang, wüng ko nü licho atümung ieng ko thsi tsü ailümrü khyang jüng, ko ninglang nü kuthsi linung; hütsüpü rung ko Ih iirung.”

22Khode Dhrezabanü hütsü yuchicho, abinü longyü tsipehcho, tunüo abi dee alirü thsacho.

23Hütsüde Jisu-nü amonoti te yocho, “Ihnü ajüje nührü te yore: Alirü nengdang ninglang Yanglih la züdunung dee athsah thsanung.” 24Ihnü loli yore, “Tbang khi la ut bücheh tsinung thsahcho tenü alirünü ninglang yanglih la züdunung deenü athsah-u thsanung.”

25Khode monotinü hi yuchicho, arüh nyemüyangsehnü yocho, “Khang, sü du khümchonung?”

26Jisu-nü arüh chah dhingkeh lalingcho, “Hiba hi nyitsarü nengdang amükohnung, ta Tsingrangba nengdanglü apüm akohnung.”

27Hütsüde Peter-nü lalingcho, “Dhing,” “Ihrünü apüm pehjüpü nü khanglang iirochoe. Ihrü tu ngunungo?”

28 # Mat 25.31; Luk 22.30 Jisu-nü arüh te yocho. “Ihnü nührü te ajüje yore, khode Nyitsarü Tsurü tsü Shang Asi la abi ahechi pümji la pümnang, hütsüde nührü I khanglang iirorüti dhüreanyüsü yangthsarü pümji chah pümpü, Israel hung dhüreanyüh michah yangthsa thsanung. 29Ko sürünü I khyanglangnü kuh mahkhang amung-ani mahkhang afü-ani mahkhang au mahkhang atpa mahkhang tsuzarüti mahkhang luphiyongphi pehjücho, thsihpinü alaa ngunung ko müchangkaba akang jünung. 30#Mat 20.16; Luk 13.30 Ta ade akhurü adrong akanung, ko ade akarü adrong akhu kangnung.

Currently Selected:

MATHI 19: SANGBSI

Highlight

Copy