MATHI 18
18
Sü Adiubao?
(Mrk 9.33-37; Luk 9.46-48)
1 #
Luk 22.24
Hütsü shikhela tsü monotinü Jisu yang ro tsingdhingcho, “Ninglang Yanglih la sü adiubao?”
2Achotsü Jisu-nü azarü khüdu dsiro, arüh bete yasohcho, 3#Mrk 10.15; Luk 18.17 ko yocho, “Ihnü ajüje nührü te yore, nührü mülichi azarü roh-i mükangde, ninglang Yanglih la nührü khodesü müzüduchehnung. 4Sünü apu jangjang azarü hiroh-i longlüm kangnang abi ninglang Yanglih la adiuba. 5Ko sünü I nengla hitari azarü khyüchonang, abinü Ih khyüchore.
Amünyi Yang Athsadsü
(Mrk 9.42-48; Luk 17.1-2)
6“Khürünü hiri azarüti yudsila müthikehsohkhang, hütsüba nyitsarü nengdanglü ahong la anyehsing lung arangcheh hohchingpü kihdi asoh la dhsangsehcho atsau. 7Nyitsarü yudsi changsohnung kohroti liba limih tsü khüta adrünung! Hitari lede tikehnung, ta sünü hütsüri tikehsohnang abi nengdang khütoh-i adrünung!
8 #
Mat 5.30
“Nü kheh mahkhang nü jingnü nü yudsi changsohkhang, hütsü kyüsahpehng! Nü kheh anyüding ko nü jing anyüding kehpü müchangkaba michang la dhiyohchünung tenü nü kheh khüdu mahkhang nü jing khüdu mükehpü akang lang züdunung nü nengdang atsau. 9#Mat 5.29 Ko nü nahtsenü nü yudsi changsohkhang, hütsü hehcheh pehng! Nü nahtse anyüding kehpü mümehmi la dhiyohchünung tenü nü nahtse khüdu kehpü akang lang züdunung nü nengdang atsau.
Achahpehba San Yukitacho
(Luk 15.3-7)
10“Hiri azarüti süsü mükhimüngu müthsanung müzahng. Ihnü nührü te yore, ninglang arüh riwürüti tsü ninglang liba I U jingte lede lire. 11Tunüo Nyitsarü Tsurü tsü achahcho khümchonung rocho.
12“Nyüh khüdu san thsih khüdu licho arüh yola khüdu chahde abinü tu nguchinungepü nührünü lümro? Abinü apa kurepü düku tsü akhang la yangtsu pehjüpü achahba san tsü yangchi wünung. 13Ihnü nührü te yore, abinü khode hütsü ngunang, amüchahcho kurepü düku tenü hiba san khüdu nengdang abi alaa akünyangu thsanung. 14Hütsü roh-i ninglang liba nührü Aunü hiri azarüti khüdu dusü müchahsohnyüre.
Amünyi Shitpahba Jünirü
15 #
Luk 17.3
“Nü jünirünü nüh nyüm amünyi shitpahkhang, abi yang wüng ko abi thsamehcho tsü ngusohng. Ta hütsü rangnü nühjü kahla du nguching. Abinü nüte nyikhang nühnü nü jünirü jingchoko. 16#Azk 19.15 Ta abinü nüte mühnyikhang, nü yola aparü khüdu mahkhang anyüh nüng, hütsüpü Amüsa yunü yocho roh-i, mülangjücho atümung yuzi anyüh mahkhang asang zeh changkanung. 17Ko abinü arüh te mühnyikhang, hütsüpü du Lithro atümung te young. Achangkathsa, abinü Lithro te mühnyikhang, abi müyudsirü mahkhang alihmüthsü dhrirü khüdu roh-i khiching.
Yaticho ko Mülacho
18 #
Mat 16.19; Jhn 20.23 “Hütsüeko Ihnü nührü atümung te yore: Limih la nührünü tu yatinang ninglangsü yatinung, ko limih la nührünü tu mülanang ninglangsü mülanung.
19“Adesü Ihnü nührü te yore: Limih la khode nührü nyüh anyünü lango nengdang müjangnü kihchinang, ninglang liba I U-nü nührü nengdang nguchinung. 20Tunüo khüde I nengla anyüh mahkhang asang aroh shibülungnang, hütsüla Ih arüh yola lile.”
Mülang Müpehjüba Kulirünü Yukitacho
21 #
Luk 17.3-4
Hütsüde Peter-nü Jisu yang ro tsingdhingcho, “Abüdongba, I jünirünü Ih nyüm amünyi shitpah du shitpahkhang, Ihnü abi te khüdopili mülangpehjünung? Dhünyehpi ang?” 22#Lip 4.24 Jisu-nü lalingcho. “Dhünyehpi mah, ta nyührepi dhünyehpili, 23tunüo ninglang Yanglih tsü hi kyole. Shikhe khüdu yangthsarü khüdunü akulirü thsi-hümnung dhrongchehcho. 24Abinü khidhingnung dikehchide, abi te thsi million adrong#18.24 Thsi million adrong: Hi Jümü Vakha lalü “Talent Hajar Dhüre” pü ngunung. Arüh bekhyah Talent khüdu tsü nyüh khüdu kang 15 nyükheh shi thsacho. Ko arüh shikhi la “Hajar Dhüre” chah alaa khikehnung mükohcho. teerü khüdu norocho. 25Kulibong tsü athsite sahxah mülicho, hütsünü yangthsabanü athsite sahnung atsurü anitpü zeh ayurü roh-i inung yuzengjücho. 26Hütsüde kulibong tsünü yangthsaba jingte mükhukeh, ‘Ite hari rangchoung; Ihnü apüm sahnung’ pü kihchicho. 27Yangthsabanü chomang lümcho, hütsünü abinü thsite tsü pehjüpü abi müthehcho.
28“Hütsüpü kulibong tsü yanglonglang wücho ko müjang kulirü sünü abi khyang denari#18.28 Denari: Denari khüdu tsü nyümongla nyüh khüdu nyükhehshi thsacho. thsih khüdu jünung licho abi shirücho. Abinü abi rangcho ko ahong la liyehpü yocho, ‘I khyang jünung kehba tsü sahng!’ 29Amüyang kulibong tsünü mükhukeh kihchicho, ‘Ite hari rangchoung, ko Ihnü sahnung!’ 30Ta abinü mühnyicho; ko abinü müsahde abi arangyoh kuh la yohpücho. 31Khode kulirü aparünü atikehcho tsü ngucho, arüh dee mükünyangcho ko yangthsaba yang wü abi te atümung yocho. 32Achotsü abinü kulibong tsü dsiro yocho, ‘Nüh amükhyu kulirü! Nühnü Ite kihchichonü, nühnü sahnung kehcho atümung Ihnü nüte pehjücho. 33Ihnü nüte chomangcho roh-i, nühnüsü nü müyang kuliba te chomangba thsako.’ 34Yangthsaba tsü dee zichürocho, ko abinü kulibong tsü ajühnung licho atümung müsahkhangde khingchinung akhangti kulang müthehcho.”
35Ko Jisu-nü zika yocho. “Nührü atümungnü, nü lasiking lanü nü jünirü khyang mülang müpehjükhang, ninglang liba I U nüsü hütsü roh-i bichinung.”
Currently Selected:
MATHI 18: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
