MATHI 17

Tühri Mülicho

(Mrk 9.2-13; Luk 9.28-36)

1 # 2 Pet 1.17-18 Nyümong dhüroh khanglang Jisu-nü abi yola Peter, Jakob ko Johan nüpü, arüh müleng azong athseng chah tuwücho. 2Arühnü dhingyade, Jisu chah amülichi rocho: aromih nyü roh-i tsingsecho, ko abi jengki aririkeh thruthoh kangcho. 3Hütsüde mono asang tsünü Elija ko Mosa nyüh Jisu te chotachi ngucho. 4Hütsünü Peter-nü Jisu te yocho, “Abüdongba, Ihsa hila liba hi khütoi atsao! Nühnü lümkhang, Ihnü hila shükuh asang thsanung, nü nengdang khüdu, Mosa nengdang khüdu ko Elija nengdang khüdu.”

5 # Lip 22.2; Azk 18.15; N. Khi 2.7; Isa 42.1; Mat 3.17; 12.18; Mrk 1.11; Luk 3.22 Abi chota yade, nyükhi atsingse khüdunü arüh shüticho ko nyükhi la tsünü yuva khüdunü yocho, “Hiba hi Ipu amüiba Tsurü, sü chah I long kyangre, abi yocho nyieng!”

6Khode monoti tsünü yuva tsü yuchicho, arüh adrüchonü arüh romih alih la thsürangcho. 7Ko Jisu-nü ro arüh chah thahpo yocho, “Yamüsung, tüdrü!” 8Hütsüde arühnü tsungmüsu dhingcho ko Jisu chah khu hütsüla süsü müngucho.

9Arüh azonglangnü jürode, Jisu-nü arüh te yuzengjo yocho, “Nyitsarü Tsurü asücho lanü kangchehli mürode, nührünü nguba müngucheh hi nengdang, sütesü tüyo!” 10#Mal 4.5 Hütsüde monotinü Jisu te tsingdhingcho, “Tuepü Yuzeng dorütinü Elija akhu ronungepü yoro?”

11Jisu-nü lalingcho, “Elija tsü yuje akhu ronung ko abinü lüpcho rungnümnung. 12#Mat 11.14 Ta Ihnü nührü te yore, Elija tsü ropehko ko nyitsarünü abi müdhingchehpü abi chah arüh thsanyücho thsa bichiko. Hütsü kyo Nyitsarü Tsurüsü arühnü mütsa bichinung.”

13Hütsüde abinü baptijüba Johan nengdang arüh te chorepü monotinü nyichehcho.

Amünyi Nbünü Rangcho Azarü Kyangjücho

(Mrk 9.14-29; Luk 9.37-43a)

14Khode arühnü sühdi yang thali rocho, nyüh khüdu Jisu yang ronü ajing chah mükhukehcho, 15ko yocho, “Adirü, I tsudhre te chomang! Abi füyüm kehle, ko abi khütang khingchire ko adrongpi michang la ko kih la abi khüluyohre. 16Ihnü nü monoti yanglang abi norocho ta arühnü abi mükyangjücheh.”

17Jisu-nü lalingcho, “Nührü yudsi müliba ko thsamehba nyitsarüti! Khütoi chah Ih nührü te linung? Khütoi chah Ihnü nührü te rangchonung? Azaba tsü Ih yang norung!” 18Jisu-nü amünyi nbü khyang tsü yuzengjücho ko azaba chahnü tsipehcho ko hütsüde tsünü abi kyangpehcho.

19Hütsüde monotinü Jisu yang rang ro tsingdhingcho. “Ihrünü khütacho amünyi nbü tsü mü-iipehchehcho?”

20 # Mat 21.21; Mrk 9.29; 11.23; 1 Kor 13.2 “Hütsü nührü yudsi mükükyüchonüe” Jisu-nü lalingcho. “Ihnü ajüje nührü te yore, nührü yudsi xehnyi tse toh-i dusü likhang, nührünü hiba akhang te yonung kohnung, ‘Hilanü hütsüla wüng!’ Ko hütsüla wünung. Nührünü lüpcho kohnung!” 21Ta hitarilü dangkhidangnang ko kongcho dunü iipehnung kohre.

Jisu-nü Abi Sünung Nengdang Thali Chocho

(Mrk 9.30-32; Luk 9.43b-45)

22Khode monoti atümung Galil la shibülungcho, Jisu-nü arüh te yocho, “Nyitsarü Tsurü tsü nyitsarü kheh la jünung thsako, 23arühnü abi müpsehnung; ta nyümong asang khanglang abi kangchehli ronung.”

Monoti tsü dee mükünyangpehcho.

Amübükuh Amüthsüh

24 # Nüch 30.13; 38.26 Khode Jisu ko amonoti Kapernaum lang rocho, amübükuh müthsüh dhrirütinü Peter te ro yocho, “Nührü adobanü amübükuh amüthsüh jüro müjüro?”

25“Jüre” Peter-nü lalingcho.

Khode Peter kuh la tsü züducho, Jisu-nü akhu chota yocho, “Simon, nü alümcho tuo? Hiba limih yangthsarü khyang amüthsüh sünü jüro? Shutsakhungrünü a mahkhang yangpirütinüo?”

26“Yangpirütinü.” Peter-nü lalingcho.

“Khang tsale” Jisu-nü lalingcho. “Hütsü adüzü shutsakhungrünülü müjübae. 27Ta Ihsanü hiri nyitsarüti mümüthikehsohnyüre. Hütsüeko kihdi lang tsü wüng ko nguh xohsing khüdu tsayohchüng. Ko akhudi xohba nguh tsü tphahchehng, ko abe la shekel khüdu nührü nengdang amübükuh müthsüh jüxah zehnung. Hütsü khyo arüh khyang Ihsa kuh müthsüh jüng.”

Currently Selected:

MATHI 17: SANGBSI

Highlight

Copy