MATHI 20
20
Shükusih Luh la Anguchirüti
1“Ninglang Yanglih tsü hi kyole. Shikhe khüdu nyüh khüdunü abi shükusiluh la nguchisohnung nyükheh mülihnung anyangnyü mütoh wücho. 2Abinü nyümongla nyükhehshi denari#20.2 Denari: (Mat.18.28 tsü dhing) khüdunü chotapü, abi shükusiluh la nguchinung arüh müthehcho. 3Düku bekhyah la shithsachah abi thali wücho ko hütsüla nyitsarü khürü tu münguchipü ya ngunü, 4abinü arüh te yocho, ‘Nührüsü wüng ko shükusiluh la tsü nguching, ko Ihnü nührü khyang nyükheh ngang aleng jünung.’ 5Achotsü arühnü wücho. Hütsüpü dhüreanyüh bekhyah la ko asang bekhyah lasü hütsü roh-i du tsü abinü nguchicho. 6Münga bekhyah koh khode abi shithsachah wücho, ko aparü khürü hütsüla ya ngunü abinü arüh te yocho, ‘Tuepü nührü hila tu münguchipü mükhyang yüchangro?’ 7Arühnü lalingcho, ‘Sünüsü ihrü mümüli’ abinü arüh te yocho. ‘Khang, nührüsü wüng ko shükusiluh la tsü nguching.’
8 #
Lev 19.13; Azk 24.15 “Nyüzeh rode, abüdongba tsünü adhingyehba te yocho, ‘Shehsherü tsü dsing, ko akaba chahnü dikehpü akhu mülihba chii, arüh nyükheh ngang jüng.’ 9Sürü münga bekhyah lanü dikeh nguchicho arüh müipi khyang thsi denari khüdu-khüdu jücho. 10Hütsüpü khode akhu mülihbarü khyang jünung dikehcho, arüh alaa ngunungepü arühnü lümcho; ta arüh khyangsü thsi denari khüdu-khüdu du jücho. 11Arühnü arüh thsi tsü khyüchopü abüdongrü nyüm jümjüm-müsucho. 12Arühnü yocho, ‘Aka mülihba nyitsarü hiri rehtseh khüdu du nguchiko. Ta ihrü mükhyang nyüdhsala nguchisohpü nühnü arüh khyangsü ihrü te sako jüre!’
13“‘Nyieng, shangrü’ abüdongba tsünü arüh nyüh khüdu te lalingcho, ‘Ihnü nührü mükhürahyohchü. Nühnü nyümongla thsi khüdu ngang nguchinung chotacho mado. 14Ade nü thsi khyüng ko kulang wüng. Ihnü aka mülihba hi khyang nü khyang jücho toi jünyüre. 15Ipu thsi Ihnü bichinyücho bichinung Ih athsalang mahrü do? Mahkhang Ihnü bichicho nü nah dhsarü mah-o?’”
16 #
Mat 19.30; Mrk 10.31; Luk 13.30 Ko Jisu-nü zika yocho, “Hiroh-i akarü akhunung, ko akhurü akanung.”
Jisu-nü Apu Sünung Nengdang Asangpiu Chocho
(Mrk 10.32-34; Luk 18.31-34)
17Jisu Jerusalem lang tuwüde, arüh atsehchah abinü amono dhüreanyüh tsü nükhu rang yocho. 18“Nyieng, Ihsa Jerusalem lang tuwüre, hütsüla Nyitsarü Tsurü tsü bebü ayingti ko Yuzeng adorüti kheh la khakhuchüjünung. Arühnü abi süsohnung mülangjünung 19hütsüpü yangpirü kheh la khakhuchüjo arühnü abi müthsamünyünung, xüpnung ko hamkehnung; ta nyümong asang khanglang abi kangchehli ronung.”
Atpa Khüdu Akihchiba
(Mrk 10.35-45)
20Hütsüde Zebede nitpü atsudhre anyüh nüpü Jisu yang ro ajingte mükhukehnü lango khyünyo abi te tsingdhingcho.
21“Nüh tu khünyüro?” Jisu-nü abükyü te tsingdhingcho.
Abükyünü lalingcho, “Nüh yangthsarü kangde I tsudhre nyüh hi khüdu nü tsalang ko khüdu nü fülilang pümsohnung Ite nyengchoung.”
22“Nührünü tu chingro hütsü nührünü mümüdhe.” Jisu-nü atsunyü te tsü lalingcho. “Ihnü yongnung liba chongcha shing tsü nührünü yongchehnung mah-o?”
“Ihrünü kohnung” arühnü lalingcho.
23“Nührünü ajüje I shing lanü yongchehnung.” Jisu-nü arüh te yocho, “ta I tsalang ko fülilang sürü pümnung hütsü throchehnung I chah tase mühle. Hiri pümji tsü I U-nü sürü nengdang rungnümjücho arüh yo lile.”
24Khode aparü mono dhüre tsünü hi yuchicho, arühnü anyüh jüninyü te zichürocho. 25#Luk 22.25-26 Hütsünü Jisu-nü arüh atümung dsibülungpü yocho, “Yangthsarüti ko langnürüti tsü müyudsirü michah tase atümung lilepü nührünü müdhele. 26#Mat 23.11; Mrk 9.35; Luk 22.26 Ta nührü yolalü hütsüta mah, sünü adiuba kangnyüro, abi atümung dikehrü kangbae. 27Sünü amichahba kangnyüro, abi nührü yurü kangbae. 28Nyitsarü Tsurü mii dikehsohnung mah, ta dikehnung ko nyitsarü adrong rochehnung nengdang abi akang jünung rocho.”
Jisu-nü Nahtohrü Anyüh Kyangjücho
(Mrk 10.46-52; Luk 18.35-43)
29Jisu ko amonoti Jeriko pehjüde, sühdi amülah abi khanglang iiwücho. 30Langte pümcho anatohrü nyüh anyüh Jisu lahkhu tsicho yuchipü arühnü züdecho, “David Tsurü, Ihrü te chomang!”
31Sühdi tsünü arüh te sah tüthsa pü yübücho. Ta arühnü khüsha züde yocho, “David Tsurü! Ihrü te chomang!”
32Jisu-nü nyehlipü arüh te tsingdhingcho, “Nührü nengdang I khyang tu nguchisohnyüro?”
33Arühnü lalingcho, “Adirü, Ihrü nah khangthrusohnyüre!”
34Jisu-nü arüh chomang lümcho ko arüh nahtse la thahpücho; ko hütsüde tsünü arühnü ngunung kohcho, ko arühnü abi khanglang iiwücho.
Currently Selected:
MATHI 20: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
