MATHI 16

Thsayahiya Khüdu Chingcho

(Mrk 8.11-13; Luk 12.54-56)

1Farisirü ko Sadukirü khürü Jisu thsadsünyo abi yang rocho ko arühnü thsayahiya khüdu ngusohngpü tsingdhingcho.#Mat 12.38; Luk 11.16 2Ta Jisu-nü lalingcho, “Nyüzeh rode, nührünü yorü, tsingnyü tsanung, tunüo ning mohle. 3Ko anyangnyü mütoh nührünü yorü, ‘Tsing ronunge, tunüo ning mohle ko marürahle.’ Ningchah dhingnü nührünü tsingnyü yochehre, ta hiri bekhyah nengdanglü nührünü müyochehre! 4Hiba shang hi khüta amünyi ko Tsingrangba mümüdhero! Nührünü Ite thsayahiya khüdu nengdang tsingdhingrü ang? Müngusohnung! Nührü khyang ngusohnung thsayahiya tsü, Jona thsayahiya due.”#Mat 12.39; Luk 11.29

Hütsüpü abinü arüh pehjüpü tsipehcho.

Farisirü Ko Sadukirü Bhüpza

(Mrk 8.14-21)

5Khode monoti tsü kihbekhüm khüulang chihcho, arühnü atsunung lango dusü hinung nbüchücho. 6Jisu-nü arüh te yocho, “Farisirü ko Sadukirü bhüpza nengdang müzahng.”#Luk 12.1

7Arühbürü yola chota dikehcho, “Ihsanü tsuyongnung tu mühicho chahnü abinü hi yore.”

8Arühnü yoba tsü Jisu-nü müdhe arüh te tsingdhingcho, “Tuepü tsuyongnung tu mühlicho nengdang nührü yola chotaro? Nührü yudsi hitoi aikyah-o? 9Ade yingcheh nührünü münyichehrü ang? Ihnü nyüh hajar münga nengdang hümdhse münga chenahbasü mülümchehrü mah-o? Loh khütoi nyingcho?#Mat 14.17-21 10Ko nyüh hajar müyü nengdang hümdhse dhünyehsü khüta? Loh khütoi nyingcho?#Mat 15.34-38 11Ihnü nührü te tsuyongnung nengdang chorü mah pü khüta münyichehro? Farisirü ko Sadukirü Bhüpza nengdang nührü jangjang müzahng!”

12Hütsüde monoti tsünü abinü müzahsohba tsü tsang la yohba bhüpza nengdang mah ta Farisirü ko Sadukirü adoba nengdang yorepü nyichehcho.

Peter-nü Jisu Nengdang Mishacho

(Mrk 8.27-30; Luk 9.18-21)

13Jisu Kaisaria Filipi yangdi münyeh rode, abinü amonoti te tsingdhingcho, “Nyitsarütinü Nyitsarü Tsurü tsü süepü yoro?”

14Arühnü lalingcho. “Khürünü baptijüba Johan, khürünü Elija, ko aparünü Jeremia mahkhang azikehrü aparü khüduepü yore.”#Mat 14.1-2; Mrk 6.14-15; Luk 9.7-8

15Ko abinü arüh te tsingdhingcho, “Khang, nührünü Ih süepü yoro?”

16Simon Peter-nü lalingcho, “Nüh Mesia, akang liba Tsingrangba Tsurü.”#Jhn 6.68-69

17Jisu-nü lalingcho. “Johan tsurü Simon, nüh amüwa thsaang!” “Tunüo hiba yuje hi shutsa khu mah, ta ninglang liba I U-nü nü khyang jücho lile. 18Hütsüeko Ihnü nüte yore, Peter: nüh lung, ko hiba lung michah Ihnü I Lithro külüpnung, ko asü nüsü khodesü mükohnung. 19Ihnü nü khyang ninglang Yanglih azihsing jünung; nühnü limih la tu rahnang hütsü ninglang rahnung, ko nühnü limih la tuturü lehchehnang hütsü ninglang sü lehchehnung.”#Mat 18.18; Jhn 20.23

20Hütsüde Jisu-nü amonoti te abi tsü Mesia epü sütesü müyonung yuzengjücho.

Jisu-nü Abi Chongchanung ko Sünung Choyohcho

(Mrk 8.31—9.1; Luk 9.22-27)

21Hütsü shikhe tinü Jisu-nü amonoti te khohcheh yonung dikehcho, “Ih Jerusalem lang wübae ko azirüti, bebü ayingti, ko Yuzeng adorüti chahnü akhingchi amülah ngunung. Ih süsohnung, ta nyümong asang khanglang Ih kangcheli ronung.”

22Peter-nü abi nükhupü yübünung dikehcho, “Tsingrangba-nü hi yatieng, Abüdongba” abinü yocho. “Khodesü hütsü nü chah mütikehnung!”

23Jisu-nü ximüla Peter te yocho, “I tenü shehkhung, Satan! Nüh I nengdang amüthikehsing khüdu lile, tunüo nü lümlong hi Tsingrangba chahnü mah, ta nyitsarü chahnü lile.”

24Hütsüde Jisu-nü amonoti te yocho, “Khürünü I khanglang ronyükhang, ajangjangthsa rahsehng, ko palu khala dhipü Ih iirung.#Mat 10.38; Luk 14.27 25Tunüo sürünü palu akang khümchonyüro hütsü changnung; ta sürünü I nengdang palu akang changnang hütsü ngunung.#Mat 10.39; Luk 17.33; Jhn 12.25 26Nyüh khüdunü limih atümung jingchopü apu akang changkhang tu jingchonung? Mahkhang nyitsarü khüdunü abi akang müli tu jünung? 27Tunüo Nyitsarü Tsurü Au ahechi la abi riwürüti te ronung thsale, hütsütade abinü nyitsarü müipi khyang palu nguchi aichi jiyünung.#Mat 25.31; N. Khi 62.12; Rom 2.6 28Ihnü nührü te ajüje yore, Nyitsarü Tsurü yangthsarü kyo rocho müngudelü müsünung nührü yola khürü hila lile.”

Currently Selected:

MATHI 16: SANGBSI

Highlight

Copy