MATHI 15
15
Jümürü Adoba
(Mrk 7.1-13)
1Hütsüde Farisirü ko Yuzeng adorü khürü Jerusalem lanü Jisu yang ronü abi te tsingdhingcho, 2“Tuepü nü monotinü Ihsa jümürü adoba mübichiro? Tunüo arühnü kheh mümütsahpü tsuyongre!”
3Jisu-nü lalingcho, “Tuepü nührünü Tsingrangba Yuzeng mühnyipü nührübürü adocho du bichiro? 4#Nüch 20.12; 21.17; Azk 5.16; Lev 20.9 Tunüo Tsingrangba-nü yocho, ‘Nü tpa ko nüu jengreng drüng’ ko ‘sürünü atpa mahkhang au chokehcholanang abilü süsohbae.’ 5Ta nyüh khüdu atpa mahkhang au trochehnungthsa lango likhang, ‘Hiba hi Tsingrangba yoe’ 6atpa mahkhang au jengreng drünung adhsütah mühlepü nührünü yore. Hiroh-i nührübürü adoba bichinyülangnü nührünü Tsingrangba Yuzeng mükhichire. 7Nührü akhürahrüti! Isaya-nü nührü nengdang choyohba tsü khütoh-i yujeo!
8 #
Isa 29.13
“Hiri nyitsarünü abe dunü I jengreng drüre,
ta arüh lasih I tenü ashu za lile.
9Arüh nengdang Ih mübünung tu adhsütah mühle,
tunüo arühnü nyitsarünü külüpcho yuzeng Tsingrangba yuzeng roh-i dore!”
Nyitsarü Münyisohba Kohro
(Mrk 7.14-23)
10Hütsüpü Jisu-nü amülung tsü abi yanglang dsinü yocho, “Nyieng ko nyichehng! 11Be la tu züduro hütsünü nyitsarü khüdu münyijürü mah; ta tu be lanü chürorü hütsünü abi münyijüre.”
12Hütsütade monoti ro abi te yocho, “Nühnü yoba yu tsünü Farisirü müthikehsorepü nühnü mümüdheo?”
13Jisu-nü yocho, “Ninglang liba I U-nü müchisicho apüm rohpehnung” 14#Luk 6.39 “Arüh nengdang tülümxü! Arüh anatohrü langnürüti; ko khode anatohrünü anatohrü lang nonang, anyüding yongroh la thungyohnung.”
15Peter-nü yocho, “Hiba yukita ihrü te tsidsa young.”
16Jisu-nü arüh te yocho, “Ade yingcheh nührüsü aparü tenü athsehdhsaulü mah. 17Nührünü hi münyichehrü do? Tu be lanü tsuyohchüro hütsü ami la züdure ko afü lanü tsire. 18#Mat 12.34 Ta abe lanü tu chüroro hütsü lasih lanü chürore, ko hirinü nyitsarü khüdu münyijüre. 19Tunüo lasih lanü amünyi lümlong, müpsehnung, nahtranahxengnung, mabomashinung, fühnung, arahkheh chonung ko nyüpmüsehnung chürore. 20Hirinü nyitsarü münyisohre. Ta kheh mümütsahpü tsuyongchonü nyitsarü khüdu mümünyijüre.”
Khingkurü Khüdu Yudsi
(Mrk 7.24-30)
21Jisu-nü hütsü müdüm pehjüpü Tyre ko Sidon lih yang wücho. 22Kanan-larü khüdu hütsüla licho abi yang ronü züde yocho, “David Tsurü! Ite chomang! I tsulatpü amünyi nbünü dee khingchi lile.”
23Ta Jisu-nü abükyü te yu khüdusü müyocho. Ko amonotinü ro abi te kihchicho, “Abükyü tsü tsipehsohng! Abükyünü dee bolo Ihsa khanglang rore!”
24Hütsüde Jisu-nü lalingcho, “Ih achahcho san, Israelrü nengdang du müthehcho.”
25Hitade khingkutpü tsü ronü ajing chah mükhukeh yocho, “Ih troung, adirü!”
26Jisu-nü lalingcho, “Azarü tsuyongnung khyo füza bete thohpehnung athsalang mah.”
27“Hütsü yuje, adirü, abükyünü lalingcho; ta füzanü mii palu abüdongrü tsingthsang chahnü khatohcholü tsure.”
28Hütsüde Jisu-nü abükyü te lalingcho, “Nüh yudsi arangcheh liba khingkurü khüdue! Nübükyünü khyünyücho roh-i tikehsohng.” Ko hütsütade tsünü atsulatpü kyangpehcho.
Jisu-nü Nyitsarü Adrong Kyangjücho
29Jisu-nü hütsü pehjüpü Galil kihdi tung wücho, ko abinü akhang khüdu chah tuwü pümcho. 30Sühdi amülah abi yang jingjahrü, nahtohrü jahloh-hilohrü, amongdongrü, ko füdhsarü apa adrong noro Jisu jingte yohpüjücho, ko abinü arüh kyangjücho. 31Amongdongrünü yu chocho, jahloh-hilohrü kyangcho, jingjahrünü tsehcho, ko anahtohrü ngusohcho ngude, nyitsarüti tsü nyemüyangcho ko arühnü Israelrü Tsingrang neng secho.
Jisu-nü Nyüh Hajar Müyü Yangtüpcho
(Mrk 8.1-10)
32Jisu-nü amonoti abi yanglang dsinü yocho, “Ihnü hiri nyitsarü nengdang dhsa lümre, tunüo arüh Ite nyümong asang liropü ade atsunung tusü mühle. Ihnü arüh müyangtüp-pü mütsisohnyüre, tunüo arüh langla sütünung.”
33Monotinü abi te tsingdhingcho, “Nyitsarü hitoi yangtüpnung tsuyongnung lipilih hila khüde ngunung?”
34“Nührü hümdhse khütoi liro?” Jisu-nü tsingdhingcho.
Arühnü lalingcho, “Hümdhse dhünyeh, ko nguh nümnüm azikyah.”
35Hütsüpü Jisu-nü sühdi tsü alih la pümsohcho. 36Hütsüpü abinü hümdhse dhünyeh ko nguh tsü bipü; Tsingrangba khyang anengse jücho, ko chenah amonoti khyang jücho; ko amonotinü chahla jücho. 37Arüh atümung kükyo tsucho. Hütsüpü monotinü arüh tsunying loh dhünyeh jeng khyübülungcho. 38Khingkurü azarü mükhipü yangtsurü adhrerü dunü hajar müyü thsacho.
39Hütsüpü Jisu-nü nyitsarüti tsisohpü, kihtang khüdula züdupü Magadan lih lang wücho.
Currently Selected:
MATHI 15: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
