MATHI 14

Baptijüba Johan Sücho

(Mrk 6.14-29; Luk 9.7-9)

1Hütsü shikhela tsü Galil la yangthsaba Herod-nü Jisu nengdang yuchicho. 2Abinü abi chitungrü te yocho, “Hi yuje baptijüba Johan e, abi kangchehli roko, hütsünü thsayahiya nguchichehnung zii kehre.”

3Tunüo Herod-nü akhulang Johan rangsohcho, ko rahpü akhangtikuh la yohpücho. Abinü hi ani Filip nitpü Herodias thsacholanü nguchicho.#Luk 3.19-20 4Tunüo Baptijüba Johan-nü Herod te yocho, “Nühnü Herodias khyünung athsalang mah!”#Lev 18.16; 20.21 5Herod-nü abi müpsehnyücho, ta abinü Jihudarü drücho, tunüo arühnü Johan tsü azikehrü khüduepü khichicho.

6Herod suro nyümongla Herodias tsulatpünü amülung atümung bete nyiichicho. Herod khütang künyangcho. 7Hütsünü abinü abükyü te nyengchocho, “Nühnü tu chingnang Ihnü jünung yuchümre!”

8Atpanü müjühpü abükyünü abi te yocho, “I khyang ade hila tbhü khüdula baptijüba Johan thah yohpü khülo!”

9Yangthsaba tsü longyücho, ta abinü abi shirü apüm bete nyengchochonü abinü abükyünü khyünyüba tsü jünung mülacho. 10Hütsünü abinü Johan arangyoh kuh lanü aku dengcho. 11Aku tsü tbhü khüdula hironü, lazatpü khyang tsü jücho, ko abükyünü atpa khyang hiwü jücho. 12Johan monotinü ro ame tsü hiwünü dhrürangcho; hütsüpü arühnü wünü Jisu te yocho.

Jisu-nü Nyüh Hajar Münga Yangtüpcho

(Mrk 6.30-44; Luk 9.10-17; Jhn 6.1-14)

13Khode Jisu-nü Johan nengdang yusi tsü yuchicho, abinü hütsü pehjüpü, kihtang khüdu chahnü anaying müdüm khüdu yang anabi tsicho. Nyitsarünü hütsü yuchi, arüh yangdongti pehjüpü ajingnü abi yang wücho. 14Jisu kihtang la tsünü jürocho ko khode abinü sühdi tsü ngucho, abinü arüh nengdang lasih dhsa lümcho, ko abinü arüh dhsangnangrü kyangjücho.

15Nyüzeh rode monotinü ro abi te yocho, “Adelü dee münuko, ko hiba hi anaying müdüm-e. Arühbürü tsuyongnung lihsohnung yanglang nyitsarüti tsü tsisohng.”

16“Arüh tsinung müdhsütah” Jisu-nü lalingcho. “Nührünü uthring arüh khyang lango atsunung jüng!”

17Arühnü lalingcho, “Hila ihrü licho hümdhse münga ko nguh anyüh due.”

18Jisu-nü yocho. “Hütsüri tsü Ih yang hirung.” 19Abinü nyitsarüti zanu michah pümsohcho; hütsüpü Jisu-nü hümdhse münga ko nguh anyüh tsü bipü, ninglang dhing Tsingrangba khyang anengse jücho. Abinü hümdhse tsü chenahcho ko amonoti khyang jücho, ko amonotinü nyitsarüti khyang chahla tüpcho. 20Arüh atümung kükyo tsucho. Hütsüpü monotinü arüh tsunying loh dhüreanyüh jeng khyübülungcho. 21Khingkurü azarü mükhipü yangtsurü adhrerü dunü hajar müngao thsacho.

Jisu-nü Kih Michah Tsehcho

(Mrk 6.45-52; Jhn 6.15-21)

22Hütsüpü Jisu-nü nyitsarüti shishosohde, amonoti tsü kihtang la küdusohpü kikeh khüulang tsichi yasohcho. 23Nyitsarüti tsü tsisohko khanglang, abinü akhang khüdulang anabi dangkhidangnangnung tuwücho. Nyüzeh rode, hütsüla Jisu nehbi kangcho. 24Ko hütsüdelü kihtang tsü kihdi lanü ashu wüpü kilohnü thsung mülachi licho, tunüo nyübongnü hütsü nyüm fücho.

25Anyangnyü asang e dhüroh bekhyah kahla amonoti yang Jisu kih michah tseh rocho. 26Khode arühnü abi kih michah tseh ro ngucho, arüh nehcho. “Hi amünyi nbüe” arühnü yocho, ko drünü khongcho.

27Jisu-nü arüh te zah chota yocho, “Müci zieng! Ih-e, Tüdrü!”

28Hütsüde Peter-nü lalingcho, “Abüdongba, hi yuje nüh thsakhang, Ih nü yanglang kih michahnü ronung mülajüng.”

29Jisu-nü lalingcho. “Rung!” Achotsü Peter Kihtang lanü mütrahcheh kih michah tsehnü Jisu yanglang wücho. 30Ta khode abinü nyübong amülah rocho müdhecho, abi drücho ko amülingyohrü thsacho. “Ih khümchoung, Abüdongba” abinü züdecho.

31Khüdupinü Jisu-nü akheh müyungchü abi chah marehpü yocho, “Nü yudsi zarale! Tuepü nühnü lümxücho?”

32Anyüding kihtang la züducho ko nyübong tsü zahpehcho. 33Hütsüde kihtang la monotinü Jisu mübücho ko arühnü yocho, “Yuje nüh Tsingrangba tsurüe!”

Kenesaret la Füdhsarü Kyangjücho

(Mrk 6.53-56)

34Arühnü kih keh ronü Genesaret lih chihcho, 35hütsüla nyitsarünü abi tsüpcho. Hütsünü yang mükang apüm lanü füdhsarü Jisu yang noronung arühnü müthehcho. 36Füdhsarü tsü abi shüyo chah dusü thahpüsohngpü arühnü abi te kihchicho; ko athahpürü atümung kyangcho.

Currently Selected:

MATHI 14: SANGBSI

Highlight

Copy