MATHI 13

Mashurünü Yukitacho

(Mrk 4.1-9; Luk 8.4-8)

1Hütsü nyümong tsünü Jisu-nü kuh pehjücho ko kihdi lang wü pümcho. 2#Luk 5.1-3 Abi mükang shibülungrü tsü sühdirachonü arüh tsü kihbekhümla yasohpü abilü kihtang khüdu chah küdu pümcho. 3Abinü arüh te lang adrong thsingyunung yukitaba bichicho.

“Mashurü khüdu mashunung wücho. 4Abinü majüh tsü shude, khürü langthsilang longcho, ko uzati ro hütsü tsupehcho. 5Khürü alih dee mülicho lungsüh la longcho. Majüh tsü alih jengpachonü zah surocho. 6Ta khode nyü chüro anu chah tsü hecho, ara tsü soh mürayoh tsichonü, anu tsü zahnü mükupecho. 7Majüh khürü zengtrung yola longcho, ko hütsü zide anu tsü khüpsehpecho. 8Ta majüh khürü alih asu la longcho, ko asih sihcho; khürü chah asih thsih, khürü chah rohre, khürü chah sangre sihcho.”

9Ko Jisu-nü zika yocho, “Sü ayuchinung nangkhi tpehro abinü nyieng!”

Yukitaba Alümcho

(Mrk 4.10-12; Luk 8.9-10)

10Hütsüde monotinü ro Jisu te tsingdhingcho, “Tuepü nühnü nyitsarü te chotade yukitaba bichiro?”

11Jisu-nü lalingcho, “Rang liba ninglang Yanglih nengdang lümlong tsü nührü khyang ma arüh khyang müjü. 12#Mat 25.29; Mrk 4.25; Luk 8.18; 19.26 Tunüo sü lango liro abi kükyüpü alaa lisohnung nengdang abi khyang alaa jünung; ta sü müliro abi azikyah liba tsüsü hitsinung. 13Ihnü arüh te chotade yukitaba bichiba hi arühnü dhingrü, ta müngurü, ko arühnü nyirü ta müyuchirü mahkhang münyichehre. 14#Isa 6.9-10 Hütsünü Isaya-nü choyohcho arüh te phishule:

“Hiri nyitsarünü ayuchilü yuchinung; ta münyichehnung,

Angulü ngunung, ta müdhingchehnung,

15tunüo arüh lüm shütiko,

ko arüh nangkhi cheh kangko,

ko arüh nah khangtiko.

Hütsüta müthsalang, arüh nahtsenü ngunung,

arüh nangkhinü yuchinung,

arüh thohnü nyichehnung,

Ko arühnü I yanglang ximülanung,

ko Ihnü arüh kyangjünungepü Tsingrangba-nü yore.

16 # Luk 10.23-24 “Nührü nengdang khütoh-i amüwanungo! Tunüo nührü nahtsenü ngurü ko nührü nangkhinü yuchire. 17Ihnü nührü te yore, azikehrü adrong ko Tsingrangba nyitsarü adrongnü nührünü nguba khütang ngunyücho, ta arühnü müngu, ko nührünü yuchiba yuchinyücho, ta arühnü müyuchi.

Yukitaba tsü Changnah Yocho

(Mrk 4.13-20; Luk 8.11-15)

18“Nyieng, ko mashurü yukitaba adüzü nyichoung. 19Sürünü Tsingrangba Yanglih nengdang yusi yuchirü ta hütsü münyichehrü arüh tsü langthsilang longba majüh kyole. Amünyi tsü rorüh ko arüh chah shukehba majüh tsü rohcho hitsire. 20Yusi yuchiyeng sürünü künyangseh khyüchoro, hütsü lungsüh yola longba majüh tsü kyole. 21Ta arüh ara asoh mürachonü, arüh anyahli müyare. Hütsünü khode hiba yusi nengdangnü chongcha mahkhang dhsümthsedhsümloh ronang, arühnü khüdupinü pehjüre. 22Zengtrung yola longba majüh adüzü sünü yusi tsü yuchirü; ta hiba akang nengdang lümtpanah, ko kuthsi müichonü yusi tsü khüpsehre, ko asih müsire. 23Ko alih asu la longba majüh adüzü sürünü yusi yuchiro ko hütsü nyichehro: arühnü asih khürünü thsih khürünü rohre ko khürünü sangre sihre.”

Sepungzanü Yukitacho

24Jisu-nü arüh te yukitaba apa khüdu yocho: “Ninglang Yanglih tsü hi kyole. Nyüh khüdunü aluh la majüh atsa shucho. 25Romang khüdu, atümung yüpseh lide, münyehrü khüdu ropü matse yola Sepungza shujüpü tsipehcho. 26Khode madong tsü zii angüm chürocho, hütsütade Sepungza tsüsü chürocho. 27Nyitsarüba kulirü tsünü abi te ro yocho, ‘Adirü, nü luh la nühnü majüh atsa shucho; khang Sepungza hi khüdenüo?’ 28Abinü lalingcho, ‘Hiba hi münyehrü khürünü nguchichobae.’ Arühnü abi te tsingdhingcho, ‘Ihrünü wünü Sepungza tsü rohpehsohnyürü mah-o?’ 29Abinü lalingcho, ‘Doh, tunüo nührünü sepungza rohpehde matse miinü rohpehnung. 30Maxa kyang müchide anyüding chisohng. Hütsüde, Ihnü maxarü te akhu sepungza tsü rohnung ko abhong kang rahnung ko tahpehnung, hütsüpü du fürü tsü I shih la hibülungnung yonung.’ ”

Xehnyi Tsenü Yukitacho

(Mrk 4.30-32; Luk 13.18-19)

31Jisu-nü arüh te yukitaba apa khüdu yocho: “Ninglang Yanglih tsü hi kyole. Nyüh khüdunü aluh la xehnyi tse shucho. 32Hiba hi jünangrü yola azauba lile, ta khode hütsü zinang chisicho atümung tenü singdong adiu kangre, ko uzatinü ro ajengza chah asüp shüre.”

Bhüpzanü Yukitacho

(Luk 13.20, 21)

33Jisu-nü adesü arüh te yukitaba apa khüdu yocho: “Ninglang yanglih tsü hi kyole. Khingkurü nyüh khüdunü hüm liter yüre la bhüpza aikyah münyahpü atümung mülangde yohpüre.”

Jisu-nü Bichiba Yukita

(Mrk 4.33-34)

34Sühdi te hiri atümung yonung Jisu-nü yukita bichicho; abinü yukitaba müzehpü tusü müchocho. 35#N. Khi 78.2 Azikehrünü atikehnung tu yocho hütsü abinü nguchicho:

“Ihnü arüh te chotade yukita bichinung;

Lipoh dinü rang liba nengdang Ihnü arüh te yonung.”

Sepungzanü Yukitacho Changnah Yore

36Khode Jisu-nü sühdi tsü pehjüpü kuh la züducho, amonotinü abi yang ronü yocho, “Luh la Sepungzanü yukitaba nengdang tsü tunang ihrü te young.”

37Jisu-nü lalingcho, “Majüh atsa shuba tsü Nyitsarü Tsurü lile; 38luh tsü limih; majüh atsa tsü ninglang Yanglih tsurüti; ko Sepungza tsü amünyi tsurüti; 39ko münyehrü sünü Sepungza shucho abi tsü motsing lile. Maxaba tsü achangka nyümong lile, ko maxarü tsü ninglang riwürüti. 40Sepungza khyübülung michang la tahpehcho roh-i, achangka nyümong lasü hütsü roh-i du tikehnung: 41Nyitsarü Tsurünü apu riwürüti abi yanglih lanü amünyi shitpasohrü atümung ko amünyi nguchirü atümung nübülungsohnung. 42Ko hütsüla arüh ha mütrehketa tranung, ko michang la arüh rangyohnung. 43Hütsütade Tsingrangba nyitsarüti Au Yanglih la nyü roh-i vinung. Nyieng, nührü nangkhi tpehkhang!

Rang liba Kuthsi Yukitaba

44“Ninglang Yanglih tsü hi kyole. Luh khüdula kuthsi rangpücho nyüh khüdunü ngupücho. Abinü hütsü rangpülicho, ko künyangsehnü wü alicho apüm icho ko thali wü hütsüba luh tsü lihcho.

Bhürüm Yukitaba

45“Adesü ninglang Yanglih tsü hi kyole. Nyüh khüdunü bhürüm akhacheh yangchicho, 46khode abinü tsara khüdu ngucho, abinü wünü alicho apüm icho, ko hütsüba bhürüm tsü lihcho.

Yojeh Yukitaba

47“Adesü ninglang Yanglih tsü hi kyole. Ngurangrü khürünü kihdi la yojeh phayohchünü ko ngu ahung apüm phachehcho. 48Khode yojeh tsü jengcho, arühnü kihbekhüm lang tphahchehcho ko nguh tsü changnung pümcho: atsa tsü arüh bha la yohcho, ko amütsa tsü pehcho. 49Achangka nyümongla hiroh-i linung: Ninglang riwürütinü wünü atsarü yolanü amütsarüti nübülungnung, 50ko hütsüla arüh ha mütrehkehta tranung ko arüh michang la rangyohnung.

Asi ko Ahi Yuje

51“Hiri münyichehkhango?” Jisu-nü arüh te tsingdhingcho.

“Nyichehko” arühnü lalingcho.

52Hütsütade abinü lalingcho. “Hi adüzü, Yuzeng adorü müipi sü ninglang Yanglih la mono khüdu kangro, abi tsü asi ko ahi kohro azahkehji lanü zangchehba kuh abüdongba kyole.”

Jisu Nazaret la Mükhyüchocho

(Mrk 6.1-6; Luk 4.16-30)

53Khode Jisu-nü yukita hiri chokacho, abinü hütsü müdüm pehjücho 54ko apu yangdi lang thali wücho. Abinü Sinagog la docho, ko abi yu yuchirü atümung nyemüyangcho. Arühnü tsingdhingcho. “Abi khüdenü lümlong hi ngucho?” “Ko abi thsayahiya tsü khüroh-io? 55Abi sing nguchiba tsurüsü mahrü do? Mary tsü atpa mahrü do, ko Jakob, Josef, Simon, ko Juda anirüti mahrü do? 56Anilatpürüsü hila lirü mahrü do? Hiri atümung abi khüdenü ngucho?” 57#Jhn 4.44 Hütsüta arühnü abi mükhyüchocho.

Jisu-nü arüh te yocho, “Azikehrü khüdu tsü apu yang la ko kukhi chah khu atümunglang hechire.” 58Arühnü müyudsichonü abinü hütsüla thsayahiya adrong münguchicho.

Currently Selected:

MATHI 13: SANGBSI

Highlight

Copy