MATHI 12

Sabath Nyümong Nengdang Tsingdhingcho

(Mrk 2.23-28; Luk 6.1-5)

1 # Azk 23.25 Tunyah mülipü Sabath nyümong khüdu Jisu-nü luh lahkhu tsicho. Amonoti yangcho, achotsü arühnü fürü müyeh tsunung dikehcho. 2Khode Farisirü-nü hi ngucho, arühnü Jisu te yocho, “Dhing, Sabath nyümong nü monotinü hiroh-i nguchiba tsü Ihsa Yuzeng nyüm nguchire!”

3 # 1 Sam 21.1-6 Jisu-nü lalingcho, “David ko anyitsarütinü arüh yangseh lide tu nguchicho nührünü mükhidhingcho do? 4#Lev 24.9 Abinü Tsingrangba kuh la züducho, ko abi ko abi nyitsarünü bebürü dunü tsunung mülaba, Tsingrangba khyang mübücho hümdhse arüh nengdang amütsuba hümdhse yuzeng nyüm arühnü tsucho. 5#Num 28.9-10 Mahkhang Sabath nyümong mükhu amübükuh la liba Bebürütinü Sabath nyümong yuzeng thsangnyangrü ta arüh mümülangjürü, hütsü nührünü Mosa Yuzeng la mükhidhingcho ang? 6Ihnü nührü te yore, hila amübükuh tenü adiu lango lile. 7#Mat 9.13; Hos 6.6 Amüsa yunü yore, ‘Ihnü müruba tsü kanglungrü kangmübü mah, ta achomang.’ Hiba adüzü tunang nührünü müdherelanglü, nührünü amülanglang müliba khyang mümülangjünung; 8tunüo Nyitsarü Tsurü tsü Sabath nyümong michahsü Abüdongba.”

Akheh Sücho Nyitsarü Khüdu

(Mrk 3.1-6; Luk 6.6-11)

9Jisu-nü hütsü müdüm pehjücho ko Sinagog lang wücho, 10ko hütsüla nyüh khüdu akheh süpü licho. Hütsüla nyitsarü khürü Jisu-nü amüthsalang nguchicho mülang rangnyü licho, hütsünü arühnü abi te tsingdhingcho, “Sabath nyümong kyangjünung tsü Ihsa yuzengnü mülarü mah-o?”

11 # Luk 14.5 Jisu-nü lalingcho, “Nührü nyüh khüdu yo San khüdu Sabath nyümong shukuh la shohyohkhang tutonung? Abinü hütsü mütphahchenung ang? 12Ko nyitsarü khüdu tsü San khüdu tenü awüu lile! Hütsünü, Ihsa Yuzengnü Sabath nyümong khürü tronung mülare.” 13Hütsüpü abinü akheh süba nyitsarü te tsü yocho, “Nü kheh müyungchüng.”

Abinü hütsü müyungchücho, ko hütsü khüulang roh-i tsapecho. 14Hütsüde Farisirü-nü tsicho ko Jisu süsohnung arah külüpcho.

Tsingrangba Athrochehcho Dikehrü

15Khode Jisu-nü abi nyüm arah külüpcho yuchicho, abinü hütsü müdüm lanü tsipehcho; ko sühdi amülah abi iiwücho. Abinü füdhsarü atümung kyangjücho, 16ko abi nengdang aparü te müchochinung yuzengjücho. 17Abinü hi Tsingrangba-nü Azikehrü Isaya khu yochoba tikehsohnung nguchicho:

18 # Isa 42.1-4 “Hila I dikehbong lile, Sü Ihnü throchehcho,

Sü Ihnü müiro, ko sü chah I long kyangro.

Ihnü abi chah I nbü müthehnung,

ko abinü yochoti te I yukhaba seyohjünung.

19Abinü mürehtanung mahkhang müzüdenung,

mahkhang yanglongla zii müchonung.

20Abinü sumüzehrü te künanung,

ko rotorüte müinung.

Yuje khyang akoh müngusohde müshehnung,

21ko yuchoti atümung alongdi yohpünung.”

Jisu ko Beelzebul

(Mrk 3.20-30; Luk 11.14-23)

22Hütsütade amünyi nbünü rangcho anatoh ko amongdongrü nyüh khüdu khürünü Jisu yang norocho. Jisu-nü abi kyangjücho, ko abinü chonung ko ngunung kohcho. 23Jisu-nü nguchicho ngu amülung atümungnü nyemüyang yocho, “Hi David tsurü mah-o?”

24 # Mat 9.34; 10.25 Khode Farisirü-nü hi yuchicho, arühnü yocho, “Arüh Aziba Beelzebul-nü hütsüroh-i nguchinung abi khyang zii jücho dunü abinü amünyi iipehjüre.”

25Jisu-nü arüh lümba tsü müdhecho, achotsü abinü arüh te yocho, “Khüiba Yanglih abürü jangjangthsa changnah khüdunü khüdu te khatanang hütsü anyahli mülinung. Ko khüiba yangdi mahkhang kukhi abürü jangjangthsa changnah khüdunü khüdu te khatanang hütsü khülunung! 26Hütsüeko Satan yanglih la amülung khüdunü khüdu te khatakhang, hütsü adüzü amülungmülung changnahpehko ko zah khülunung! 27Ihnü amünyi nbü iipehba tsü Beelzebul ziinü nguchisohrepü nührünü yore. Tsale, khang, nührü iirorü khyang arüh iipehsohnung zii sünü jüro? Nührübürü mono nguchinü nührü tsü arahkheh-epü yuzi jüre! 28Hiba hi Beelzebul-nü mah, ta Tsingrangba Yanglih tsü nührü yola ropehkopü yuzi jünung nengdang, Tsingrangba anbünü amünyi iipehsohnung I khyang zii jüre.

29“Arezeh nyitsarü tsü rah müyohpüde abi kuh rohphoh kohro hitsinung mükoh, ta rezehba tsü akhu rah yohpüpü du abi kuh lanü kengchonung kohnung.

30 # Mrk 9.40 “Sü I yola müzehro abi I nyümrü, sünü I yola mükhyübülungro, abinü shupehre. 31Hütsüeko Ihnü nührü te yore, “Amünyi ko müthsamünyüba apüm mülangpehjünung, ta Anbü Amüsa müthsamünyücho mülang müpehjünung. 32#Luk 12.10 Sünü Nyitsarü Tsurü nyüm chonang mülangpehjünung; ta sünü Anbü Amüsa nyüm chonang khodesü mülang müpehjünung.”

Singdong ko Asih

(Luk 6.43-45)

33 # Mat 7.20; Luk 6.44 “Singsih atsa sihsohnung singdong atsa adhsütah; Singdong amütsa chahnü singsih amütsa ngunung. Singdong khüdu tsü asih tsünü müdhere. 34#Mat 3.7; 23.33; 15.18; Luk 3.7; 6.45 Nührü mürü zati, nührü mütsa yohpüpü khüta atsa choro? Tunüo lasih la tu liro hütsü du benü chore. 35Nyitsarü atsa khüdunü akangcho atsa lanü kohro atsa hirore; nyitsarü amütsa khüdunü akangcho amütsa lanü kohro amütsa hirore.

36“Nührünü hi müdheing, yukhaba nyümongla palunü amükhyu yu cho rocho nengdang palunü yuzi jünung. 37Nüh langjünung mülangjünung nüpu yunü nü yu khanung.”

Thsayahiya khüdu Chingcho

(Mrk 8.11-12; Luk 11.29-32)

38 # Mat 16.1; Mrk 8.11; Luk 11.16 Hütsütade Yuzeng dorü ko Farisirü khürünü yocho, “Adorü, Nü chahnü thsayahiya khüdu Ihrünü ngunyüre.”

39 # Mat 16.4; Mrk 8.12 Jisu-nü yocho, “Hiba shang hi khüta amünyi ko Tsingrangba mümüdhere!” “Nührünü Ite thsayahiya khüdu nengdang tsingdhingrü ang? Müngusohnung! Nührü te ngusohnung thsayahiya tsü azikehrü Jona thsayahiya due. 40#Jona 1.17 Jona nyümong asang ko romang asang nguh mi la licho kyo, Nyitsarü Tsurü nyümong asang ko romang asang alih yonglang linung. 41#Jona 3.5 Yukhaba nyümong Nineverünü shemüsu yanung ko nührü mülangjünung, tunüo Jona-nü thsingyucho yuchi arüh lasih thsamülacho, ko Ihnü nührü te yore, hila Jona tenü adiu khüdu lile! 42#1 Yang 10.1-10; 2 Roh 9.1-12 Yukhaba nyümong Sheba yangthsalatpünü shemüsu yapü nührü mülangjünung, tunüo yangthsaba Solomon lümlong nyinung abükyü lih lanü lang hütsütoi tseh rocho; ko Ihnü nührü te yore, hila Solomon tenü adiu khüdu lile!

Amünyi Nbü Thalicho

(Luk 11.24-26)

43“Khode nyüh khüdu chahnü amünyi nbü tsinang, abinü kunglikungsala kumünyichah yangchire. Abinü sü müngukhang, 44abinü apu te yore, ‘Ihnü I kulang thali wünung.’ Hütsüpü abinü thalide kuh tsü adeng, müsakhüti, ko athsalangnü zakeh ngure. 45Hütsüde abinü wünü abi tenü amütsauba apa anbü dhünyeh nororü, ko arüh züro hütsüla lire. Hütsükonülü, hütsüba nyitsarü tsü akhudi tenü amütsauba suro kangre. Chünye hiba amütsa shang chahsü hiroh-i tikehnung.”

Jisu Atpa ko Anirüti

(Mrk 3.31-35; Luk 8.19-21)

46Jisu nyitsarüti te chotachi yade atpa ko anirüti ro chihcho. Arüh dongkhu yapü abi te chotanung tsingdhingcho. 47Hütsüde abi te hütsüla nyüh khüdunü yocho, “Dhing, nü tpa ko nü nirüti nüte chotanyo dongkhu yingyale.”

48Jisu-nü lalingcho, “Itpa süo, ko I nirü sürüo?” 49Ko abinü amono lahpi thongu yocho, “Dhing! Itpa ko I nirüti hila lile! 50Sünü ninglang liba I U lümcho nguchinang abi tsü I jünirü, I jünilarü ko Itpa.”

Currently Selected:

MATHI 12: SANGBSI

Highlight

Copy