MATHI 11

Baptijüba Johan Chahnü Yusi Hirüti

(Luk 7.18-35)

1Khode Jisu-nü amono dhüreanyüh te hiri thülakacho, abinü hütsü müdüm pehjücho ko amünyeh yangditila thsingyunung ko donung wücho.

2Khode Baptijüba Johan-nü akhangtikuh lanü Khrista-nü nguchicho yuchicho, abinü amono khürü Jisu yang wüsohcho. 3Arühnü Jisu te tsingdhingcho, “Johan-nü ronungeba tsü nüh a aparü khüdu longdinung, ihrü te young.”

4Jisu-nü lalingcho, “Thali wüng ko nührünü tu yuchiro ko nguro hütsü Johan te young: 5#Isa 35.5-6; 61.1 Nahtohrünü ngunung kohre, jingjahrünü tsehchehre, mübhira kehrü müsachehjüre, nangtbengrünü yuchire, asürü kanglisohre, ko yusi atsa tsü ailümrü te thsingyure. 6Sürünü I nengdang mütütohnyünyehro arüh amüwanung!”

7Johan monoti tsichiyade, Jisu-nü sühdi te abi nengdang chocho: “Khode nührünü lihpi la Johan yang wücho, nührünü tu dhingnyo wücho? Thohva nyübongnü fülüpcho dhingwücho mah-o? 8Nührü tu dhingnung wücho? Jengki thsachehpü yacho nyüh khüdu dhingnung wücho mah-o? Hütsü kyo khyürü tsü yangthsarü kuh la lire! 9Ite young, nührü tu dhingnung wücho? Azikehrü ang? Ho yuje, ta nührünü azikehrü tenüsü awüu nguko. 10#Mal 3.1 Tunüo Johan sü nengdang Amüsa yunü hita yore: ‘Tsingrangba-nü yocho, Ihnü nü bekhu nü lang khangthrusohnung I yusi hirü müthehnung.’ 11Ihnü nührü te yutsatsa yore, khingkurüti chahnü surocho yola Johan Baptijüba tenü adiuba sü müchüro; ta sü Ninglang Yanglih la azauba liro abi tsü Johan tenü adiuba. 12#Luk 16.16 Johan bekhyah lanü chünye yingcheh ninglang Yanglih tsü kengtare, ko amüküprünü hütsü kengchore. 13Johan bekhyah chii azikehrüti ko Mosa Yuzengnü hiba Yanglih nengdang chocho; 14#Mal 4.5; Mat 17.10-13; Mrk 9.11-13 Ko nührünü arüh yusi tsü yudsiekhang, Johan tsü aronung liba Elija tsüe. 15Nührü nangkhi tpehkhang nyieng!

16“Ihnü chünye nyitsarü hi tu te müjangdhingnung? Arüh shithsachah pümrü azarüti kyole. Mülungo tsünü aparü te tsü züdere, 17‘Ihrünü kulangwü khi thsajücho, ta nührünü münyiichi! Ihrünü meshü khi thsacho, ta nührünü mütra!’ 18Khode Johan rocho, abinü kongcho ko cikih müyongcho, ko atümungnü yocho, ‘Abi chah amünyi nbü lile!’ 19Khode nyitsarü Tsurü rocho, abinü tsuyongcho, ko atümungnü yocho, ‘Nyitsarü hi dhing! Amünyomüra ko yongmücharü alih müthsü dhrirü ko münyirü shangrü!’ Ta Tsingrangba lümlong tsü yuje-epü anguchinü ngusohre.”

Müyudsirü Yangditi

(Luk 10.13-15)

20Jisu-nü thsayahiya adrong nguchiba yangditi la nyitsarünü arüh münyi lanü lasih müthsamülacho, achotsü hütsüri yangditi abinü yübücho. 21#Isa 23.1-18; Ezk 26.1—28.26; Joel 3.4-8; Amo 1.9-10; Zek 9.2-4 “Nüh ahohah, Korazin! Nüh ahohah, Bethsaida! Nührü chah thsayahiya nguchiba roh-i tsü Tyre ko Sidon la nguchire langlü, amüngunü arühnü müyahshü müpipü tavi su lasih thsamülapü liba thsako! 22Ajüje Ihnü nührü te yore, Yukhaba nyümongla Tsingrangba-nü nührü tenü Tyre-rü ko Sidon-rü te achomang alaa ngusohnung! 23#Isa 14.13-15; Lip 19.24-28 Ko nührü nengdanglü, Kapernaum! Nührü jangjang ning chii dhimüsunyücho mah-o? Nührü mümehmi la dhiyohchünung! Nührü chah thsayahiya nguchicho roh-i Sodom la nguchire langlü, hütsü chünye yingcheh liba thsako! 24#Mat 10.15; Luk 10.12 Yukhaba nyümongla nührü tenü Sodom-rü te achomang alaa ngusohnung!”

I Yanglang Rung ko Kyahshang

(Luk 10.21, 22)

25Hütsü shikhela Jisu-nü yocho, “Uwa, ning ko alih Abüdongba! Nühnü lümlong lirü ko amüdherü tenü rangpücho amümüdherü te ngusohcho nengdang Ihnü nü nengsere. 26Ho, Uwa, hi nühnü khyünyücho thsacho.

27 # Jhn 3.35; 1.18; 10.15 “I U-nü I khyang atümung jüko. Au chah khu sünüsü atsudhre mümüdhe, ko atsudhre chah khu ko sürü yola abi mishanung atsudhrenü throchehchoti chah khu sünüsü Au mümüdhe.

28“Nührü akherü ko bha müling hirüti, atümung I yanglang rung, ko Ihnü nührü khyang akyahshang jonung. 29#Jer 6.16 Nührünü I hongzih khyüng ko hütsü dhieng, ko I chahnü nyichoung, tunüo Ih alonglüm ko künale; ko nührünü akyahshang ngunung. 30Tunüo I hongzih tsü amüla, ko I bha tsü yingyale.”

Currently Selected:

MATHI 11: SANGBSI

Highlight

Copy