MATHI 10

Riwürü Dhüreanyüh

(Mrk 3.13-19; Luk 6.12-16)

1Jisu-nü mono dhüreanyüh dsibülungcho ko arüh khyang amünyi nbü iipehnung ko dhsara ko füdhsa lüpcho kyangjünung zii jücho. 2Riwürü dhüreanyüh neng tsü hiri lile. Akhudiba tsü Simon (Peter pü dsiba) ko ani Andria; Zebede tsurü Jakob ko ani Johan; 3Filip ko Bartholomeu; Thomas ko alihmüthsü dhriba Mathi; Alfaeus tsurü Jakob ko Thadaeus; 4Kanan-rü Simon, ko Jisu kihyochüba Judas Iskariot.

Mono Dhüreanyüh Nguchi

(Mrk 6.7-13; Luk 9.1-6)

5Hiri nyüh dhüreanyüh tsü Jisu-nü yu hiri thülapü müthehcho: “Yangpirü lih la khüdesü tüwü mahkhang Samariarü yangditi la khüdesü tüzüdu. 6Hütsü müli, nührünü achahpehba San, Israel tsutpu yanglang wüng. 7‘Ninglang yanglih amünyethsa lile, pü thsingyunü wüng!’#Luk 10.4-12 8Füdhsarü kyangjüng, asürü kangli rosohng, mübhira kehrü müsachehjüng, ko amünyi nbüti iipehjüng. Nührünü amükangnü ngucho, amükangnü jüng. 9Nührünü hon, taripi mahkhang imüyeng thsinye tühi; 10Nührü shilang nengdang shibha, mahkhang fükhüm alaa, jingkhüm mahkhang ja tühi; tunüo anguchirü khyanglü abi dhsütah jünung athsalang.#1 Kor 9.14; 1 Tim 5.18

11“Khüiri yangdi ko yangdongla nührü khode züdunang, nührü nüyohnyürü khürü yangching, ko nührü mütside hütsüla müdong. 12Khode nührü kuh khüdula züdunang, ‘Müwajüng’ pü young. 13Abüdongrü tsünü nührü künyang nüyohkhang nührü amüwa hütsüla lisohng; ta arühnü nührü künyang münüyohkhang, hütsü thali tohlieng. 14Khürünü nührü münüyoh mahkhang nührü yu mühnyikhang, hütsü müdüm pehjüde, nührü jingchah asongsong tiipeh tsieng.#R. Ngu 13.51 15#Mat 11.24; Lip 19.24-28 Ihnü ajüje yore, yukhaba nyümongla Tsingrangba-nü hütsüla liba nyitsarüti tenülü Sodom ko Gomora la liba nyitsarü te achomang alaa ngunung!

Aronung Dhsümthsedhsümloh

(Mrk 13.9-13; Luk 21.12-17)

16“Nyieng! Ihnü nührü rangfü yola San roh-i müthehre. Nührü mürü roh-i athsehdhsa ko mümüdhrü roh-i alonglüm thsaang.#Luk 10.3 17Kukeng, tunüo nyitsarü khürünü nührü rangnung ko yukhachah nowünung, ko arühnü Sinagog la nührü chah xüpnung.#Mrk 13.9-11; Luk 12.11, 12; 21.12-15 18I khyanglangnü; yangpirüti bete yuzithsasohnung governorti ko yangthsarüti bete yukhanung nührü nowünung. 19Khode arühnü nührü yukhanung noronang, tu yonung mahkhang khüta chonung nührü tu tülümxü; bekhyah la nührü khyang jünung. 20Tunüo achoba tsü nührü mah; ta nührü Au Nbünü nührü khu chore.

21“Jünirünü jünirü süsohnung khakhuchüjünung, ko tpurünü atsurü te hütsüroh-i nguchinung; ko tsuzarünü tpurü nyüm shemüsunung ko arüh süsohnung.#Mrk 13.12; Luk 21.16 22I khyanglangnü nyitsarü atümungnü nührü thrünyinung. Ta sünü achangchi rangchonang abi du khümchonung.#Mat 24.9, 13; Mrk 13.13; Luk 21.17 23Khode arühnü yangdi khüdula nührü dhsümthsenang, yangdi palang tsieng. Ihnü ajüje yore, “Nyitsarü Tsurü müroede nührünü Israel yangdi apüm la nührü nguchi münguchikhangenung.

24“Adoba tenü azarü adiu mah; abüdongba tenü kulirü adiu mah.#Luk 6.40; Jhn 13.16; 15.20 25Hütsüeko azarü khüdunü athsingyuba kyo kangkhang ko kulibanü abüdongba kyo kangkhang, hütsünü longsübae. Kukhi la athahba te Beelzebul pü dsikhang kuh la lirü telü amütsauba neng mii dsinung! #Mat 9.34; 12.24; Mrk 3.22; Luk 11.15

Sü Drünung

(Luk 12.2-7)

26“Hütsüeko nyitsarü tüdrü. Ade tuturü rangpo liro hütsü mishanung, ko rang licho apüm müdhesohnung.#Mrk 4.22; Luk 8.17 27Amala Ihnü nührü te tu yoro hütsü nührünü atsingsela choung, ko nührünü tu rang yuchiro hütsü kumung chahnü züdeing. 28Sürünü afü du ma anbülü müpsehnung mükohro, arüh tüdrü, ta Tsingrangba sünü mümehmi la afü ko anbü anyüding changjünung kohro abi drüng. 29Nühnü paisa khüdunü tpütbhü uza anyüh lihchehle, ta nührü Aunü mümüdhepü tpütbhü uza khüdusü alih la mülongchore. 30Nührü nengdanglü nührü thah chah kuva mii apüm khicheh lile. 31Hütsüeko tüdrü; tpütbhü uza khütango tenü nührü awüba!

Khrista Khyüchocho ko Dhsonglicho

(Luk 12.8, 9)

32“Khürünü nyitsarü bete Ih chechokhang, Ihnüsü ninglang liba I U bete abi chechonung. 33Ta khürünü nyitsarü bete Ih müchechokhang, Ihnüsü ninglang liba I U bete abi müchechonung.#2 Tim 2.12

Yangtsa Mah, ta Nohsheng

(Luk 12.51-53; 14.26-27)

34“Limih khyang yangtsa hirochoepü tülüm. Yangtsa mah, ta noh chürosohnung Ih rocho. 35Atsurünü au nyüm, atsulatpünü atpa nyüm, atsudhre nitpünü atsudhre atpa nyümsohnung Ih rocho;#Mik 7.6 36arorüh amütsauba tsü abürü kukhi la lirüti thsanung.

37“Sünü palu au mahkhang atpa I tenü alaa müinang abi I mono thsanung adekheng mah; Sünü palu tsurü mahkhang atsularü I tenü alaa müinang abi I mono thsanung adekheng mah. 38Sünü palu khala bipü I khanglang mü-iironang abi I mono thsanung adekheng mah.#Mat 16.24; Mrk 8.34; Luk 9.23 39Sünü palu akang jingchonung müküpnang hütsü changnung; ta sünü I nengdang palu akang changnang hütsü ngulinung.#Mat 16.25; Mrk 8.35; Luk 9.24; 17.33; Jhn 12.25

Jiyü

(Mrk 9.41)

40“Sünü nührü khyüchoro abinü Ih khyüchore; ko sünü Ih khyüchoro abinü Ih sünü müthehcho abi khyüchore.#Mrk 9.37; Luk 9.48; 10.16; Jhn 13.20 41Sünü Tsingrangba khyüchoro, riwürü thsachonü abinü riwürü khüdu jiyü ngunung. Sünü amüsarü khyüchoro, amüsarü thsachonü abinü amüsarü jiyü khüdu ngunung. 42Ajüje Ihnü nührü te yore, sünü hiri I mono yola azikyauba khüdu khyang I mono thsachonü kihrü shingo dusü tihnang jiyü nguriri.”

Currently Selected:

MATHI 10: SANGBSI

Highlight

Copy