LUK 12

Khürahcho Nyüm Amüzahnung

(Mat 10.26-27)

1Nyitsarü hajar adrong khüdunü khüdu dhrümchi tsübülungde, Jisu-nü akhu amonoti te yocho, “Farisirüti akhürah bhüpza shulüm müzahng.#Mat 16.6; Mrk 8.15 2Tuturü haptipüro khohchehnung ko rang licho apüm müdhesohnung.#Mrk 4.22; Luk 8.17 3Hütsünü, nührünü tuturü amala yocho hütsü anyümong yuchinung, ko tuturü kuh yonglang rang chotacho hütsü kumung chah züdenung.

Sü Drünung

(Mat 10.28-31)

4“Ihnü nührü te yore, müyangrüti, sürünü afü du müpsehnung kohrüma akhanglang tu nguchinung mükohro arüh tüdrü. 5Sü drünung Ihnü nührü te yonung: Tsingrangba sünü müpsehpü mümehmi la dhiyohchünung tase liro abi drüng. I chah yudsing, abi du nührünü drüng!

6“Tbütphü uza münga paisa anyüh ngang mü-irü do? Ta arüh khüdusü Tsingrangba-nü münbüchüre. 7Nü thah chah kuva mii apüm abinü khicheh lile. Hütsüeko tüdrü; tbütphü uza adrong tenü nührü awüba!

Khrista Chechocho ko Mükhyüchocho

(Mat 10.32-33; 12.32; 10.19-20)

8“Ihnü nührü te yore, sünü abi I yoepü misha chechoro, Nyitsarü Tsurü nüsü Tsingrangba riwürüti bete abi chechonung. 9Ta sünü Ih mishanü müchechonang, Nyitsarü Tsurü nüsü abi müchechonung.

10“Sünü Nyitsarü Tsurü nyüm chonang mülangpehjünung; ta sünü Anbü Amüsa nyüm müthsamünyüro hütsülü mülang müpehjünung.#Mat 12.32; Mrk 3.29

11“Khode arühnü nührü yukhanung nengdang Sinagogti mahkhang, governor mahkhang yangthsarüti yang noronang, nührünü khüta lalingnung mahkhang tu chonung tülümxü.#Mat 10.19-20; Mrk 13.11; Luk 21.14-15 12Tunüo hütsü shikhela nührünü tu chonung hütsü Anbü Amüsanü nührü te yonung.”

Amüsithsa Alirü Yukitacho

13Amülung yola nyüh khüdunü Jisu te yocho, “Athsingyurü, Imung te U-nü pehjüba kuthsi tsü Ihjü changtaangpü yojüng.”

14Jisu-nü abi te yocho, “Sünü Ih nührü yukharü mahkhang kuthsi changta jürü kangsohcho?” 15Ko abinü arüh atümung te yocho, “Müruthsa apüm lanü kukeng müzah lieng, tunüo nyitsarü khüdu akang tsü kuthsi khütango lichonü akang mülire.”

16Hütsüpü Jisu-nü arüh te yukitaba hi yocho: “Shikhe khüdu alirü khüdu aluh lanü fürü khütango xacho. 17Abinü lümcho, ‘I fürü ayohpüchah mühle. Ihnü tu nguchinung? 18Ihnü hita nguchinung, Ihnü I shih tphüpü adiuba thsanung, ko hütsüla fürü ko apa kohro apüm zahkehnung. 19Hütsüpü Ihnü I nbü te yonung, Anbü! Kang adrong nengdang nü dhsütah apüm lile. Pümduong, tsung, yong ko künyang lieng!’ 20Ta Tsingrangba-nü abi te yocho, ‘Nüh amüsithsa! Shomülang tsatsa nüh sünung; hütsükhang nühnü zahkehcho kuthsi apüm tsü sü yo thsanung?’”

21Ko Jisu-nü yocho, “Sürünü palu shulüm kuthsi sühpüro ta Tsingrangba lahpi alirü müthsaro arüh hütsü kyo linung.”

Tsingrangba chah Longdieng

(Mat 6.25-34)

22Hütsüpü Jisu-nü monoti te yocho, “Hütsüeko Ihnü nührü te yore, Nührü akang linung shulüm tu tsunung, mahkhang nührü afü nengdang tu müpinung tülümxü. 23Akang tsü tsuyongnung tenü awüba, ko afü tsü jengki tenü awüba lile. 24Khüyahlati tsü dhing: arühnü müshuhre mahkhang müxare; arüh azahkehsing kuh mahkhang shih mühle; ta Tsingrangba-nü arüh kangre! Nührü uzati tenü awüba lile! 25Nührü yola hütsü nengdang khürünü lümxüchonü khü ashengu lichehnung mah-o? 26Nührünü hiroh-i azikyah khüdu mii mükülüpchehkhang, tuepü apa nengdang lümxünung? 27Lurü yungpi tsü khüta zirü lümdhing: arühnü münguchire mahkhang arühbürü nengdang shü mükyahre. Ta nührü te yore, Yangthsaba Solomon nüsü abi hitoi linye hiri yungpi khüdu kyo mükhyodhing.#1 Yang 10.4-7; 2 Roh 9.3-6 28Rangmü za chünye liko atu müliba, ko taa la tahpehba hütsü khyang mii Tsingrangba-nü müpisohkhang, abinü nührü khyang khüta alaa mümüpisohnung? O yudsi müliba nyitsarüti!

29“Hütsüeko tu tsunung ko tu yongnung pü lede tülümxü. 30(Tunüo hiba limih müyurütinü hiri atümung nengdang lede lümxüre.) Nührü Aunü nührü nengdang hiri dhsütahlepü müdhele. 31Hütsü mülih, nührünü abi yanglih yangching ko abinü hütsüri nührü khyang jünung.

Ninglanglih la Kuthsi

(Mat 6.19-21)

32“Tüdrü, nungzarü, tunüo nührü Aunü nührü khyang yanglih tsü jünung dhrongchehpehko. 33Nührü licho atümung ieng ko kuthsi tsü ailümrü khyang jüng. Nührü kuthsi ninglang yanglih la müthrehba thsibong la, khüde arüh khodesü müsümnung, aführünü müfühchehnung ko azahnü mürühnahnung hütsüla zahkehng. 34Tunüo nührü kuthsi khüde linang hütsüla nührü lasih linung.

Khengyeng liba Kulirüti

35“Nührü kihrüm ko dsi tahkehpü,#Mat 25.1-13 36kulirünü arüh abüdongba kulangwü thsüti lanü thalinung yingcho roh-i nührü khengyeng lieng. Khode abi ronü drongdrongchinang, arühnü abi khyang dhsüdhsa khangthrujüre.#Mrk 13.34-36 37Kulirüti sürü abüdongba rode kukeng rungnüm li nguro arüh khüta akünyangnung! Ihnü nührü te yore, abinü apu jengki khyünung, arüh pümsohnung ko arüh khyang chahla jünung. 38Abi yürüptülungla ronye mahkhang akhanglang ronye, sürü rungnüm li nguro arüh khütoi akünyangnung! 39Ta hi müdheing, kuh abüdongrü tsünü aführü ronung shikhe tsü müdherelanglü, abinü aführü tsü akuh rohphoh müzürosohnung.#Mat 24.43-44 40Hütsünü, nührüsü rungnüm lieng, tunüo mülongdicho shikhe khüdula Nyitsarü Tsurü tsü ronung.”

Longlangchehba mahkhang Longmülangchehba Kulirü

(Mat 24.45-51)

41Peter-nü yocho, “Abüdongba, yukitaba hi ihrü nengdang a atümung nengdango?”

42Abüdongba-nü lalingcho, “Khang longlangchehba ko asithsa kulirü tsü süo? Abüdongrünü kuh la nguchinguyang ko aparü kulirüti khyang tsuyongnung akyang jünungthsa nyümkehjüba tsü lile! 43Abüdongba thali rode nguchiya nguba kulirü tsü khütoi akünyangnung! 44Ihnü nührü te yutsatsa yore, Abüdongba-nü hütsüba kulirü tsü abi kuthsi apüm michah müshosohnung nyümkehjünung. 45Ta hütsüba kulirü tsünü alüm la Abüdongba tsü nyahlira müro pü lümnü aparü kulirü ko kulilarü chah xüpnü, tsuyongpü müchako lide, 46mülongdiba nyümong ko shikhe khüdula Abüdongba tsü thali ronung. Abüdongba tsünü abi iipehnung ko longmülangchehrü yola pehjünung.

47“Kulirü sünü Abüdongba-nü abi khyang tu nguchisohnyüro hütsü müdhepü, rungnümnü nguchi müyaro, abi tsü khütang xüpnah khingchinung. 48Ta kulirü sünü Abüdongba lümcho mümüdhepü ta axüpnung leng lango nguchiro, abi thri du xüpnung. Sü khyang adrong jücho abi chahnü adrong khangre; sü khyang alaa jücho abi chahnü alaa khangre.

Achangnah Chürosohba Jisu

(Mat 10.34-36)

49“Ih limih chah michang chürosohnung rocho, ko Ihnü lümcho roh-i hütsü tahkehko! 50Ih baptiba khüdu ngunung lile, ko hütsü mükhuede Ih khütoh-i chongcharo!#Mrk 10.38 51Ih limih yang yangtsa hirochoepü nührünü lümrü mah-o? Yangtsa mah ta achangnah. 52Ade tinü nyüh münga liba kukhi changnahnung, asangnü anyüh nyümnung ko anyünü asang nyümnung. 53Autinü atsurüti nyümnung, ko atsurütinü aurüti nyümnung; atpatinü atsulatpürü nyümnung, ko atsulatpürünü atpati nyümnung; aniirü atpatinü arüh tsunyahlarü nyümnung, ko tsunyahlarütinü aniirü atpati nyümnung.”#Mik 7.6

Bekhyah Müdhecho

(Mat 16.2-3)

54Adesü Jisu-nü amülung te yocho, “Khode nührünü nyüzüdulang nyükhi shüchi ngunang, nührünü tsing ronungepü yore ko hütsü roh-i rore. 55Ko khode nührünü kihjing nyübong fo müdhenang, nührünü wümsehnungepü yore, ko hütsü roh-i tikehre. 56Akhürahrüti! Nührünü alih ko ningchah dhing tsingnyü müchehre; akhang, tuepü nührünü ade bekhyah adüzü mümüdhero?

Nührü Nyümrü te Nyichehtaang

(Mat 5.25-26)

57“Yujeba nguchinung tuepü nührübürü jangjang yu mükharo? 58Khürünü yuzengnü nüh mülangjü nüh yukhajilang nowükhang, yukhajilang müwüdenü abi te khiyu tsü nyichehtapehng. Hütsüta müthsakhang, abinü yukharü bete nüh tphah wünung, ko anyahyehrü kheh la jünung, ko abinü akhangtikuh la rangyohnung. 59Ihnü nührü te yore, nü thsite paisa khüdu dusü müsahkhangde nüh hütsüla pümnung.”

Currently Selected:

LUK 12: SANGBSI

Highlight

Copy