LUK 13

Lasih Thsamülang Mahkhang nüh Sünung

1Hütsü shikhela nyitsarü khürünü Jisu te Galilrü sürü Tsingrangba khyang amübü jüyade Pilat-nü müpsehcho hütsü nengdang yocho. 2Jisu-nü arüh te lalingcho, “Hütsüri Galilrü hütsüta sücho tsünü aparü Galilrü atümung tenü arüh alaa münyirü amütsauba thsacho ngangepü nührünü lümrü mah-o? 3Ihnü nührü te yore, mah; nührü lasih müthsamülakhang, nührüsü hütsü roh-i changnung. 4Siloam la kuh khülutsu arüh dhürekeh müpsehbasü khüta? Arüh tsü Jerusalem la lirü atümung tenü arüh amütsau thsacho ngangepü nührünü lümrü mah-o? 5Ihnü nührü te yore, Mah, ta nührü lasih müthsamülakhang, nührüsü hütsü roh-i changnung.”

Asih Müsiba Ngurüsidongnü Yukitacho

6Hütsüpü Jisu-nü arüh te yukitaba hi yocho: “Shikhe khüdu nyüh khüdu abi shükusiluh la ngurüsing khüdu yacho. Abinü hütsü chah asih dhingnung wücho, ta müngucho. 7Achotsü abinü tbü nyahba te yocho, ‘Dhing, hinü kang asang hiba ngurüsing chah asih dhingchi rore; ta Ihnü tusü müngure. Hi repehng! Tuepü hinü alihsu khyükhang yasohnung!’ 8Ta tbü nyahba tsünü lalingcho, ‘Adirü, kang khüdu nengdang hita pehjüng; Ihnü aying mükang junahnung ko alihsu khürü yohjünung. 9Hütsüpü, sekang asih sihkhang atsa du; müsikhang nühnü repehng.’ ”

Jisu-nü Sabath Nyümong Jahloh-hilohlarü Kyangjücho

10Sabath nyümong khüdu Jisu Sinagog khüdula do licho. 11Hütsüla amünyi nbünü kang dhürekeh mükumürusohcho khingkurü khüdu licho; abükyü tsü mükhupehpü thridusü mümüchongchehcho. 12Khode Jisu-nü abükyü ngucho, abinü abükyü dsinü yocho, “Khingkurü, nüh mükumüru lanü kyangpehko!” 13Abinü abükyü chah akhehnü thahpücho, ko hütsüdenü abükyü jangjang müchongkhüti kangcho ko Tsingrangba neng secho.

14Sabath nyümong Jisu-nü kyangjüchonü Sinagog la ayingba tsü zichürocho, hütsünü abinü nyitsarüti te yocho, “Ihsanü nguchinung nyümong dhüroh lile; hütsüeko hütsüri nyümongla rung ko kyangsohng, ta Sabath nyümonglü türo!”#Nüch 20.9-10; Azk 5.13-14

15Abüdongba-nü abi te lalingcho, “Nührü akhürahrüti! Nührünü Sabath nyümong nührü misü mahkhang gadu akuh lanü lehcheh nowü kih mütirü do? 16Ade hila Abraham chahnü sihchocho khüdu kang dhürekeh satan-nü rahyohpücho lile; Sabath nyümonglü abükyü mülehchehjünung do?” 17Abinü hi yode abi münyehrüti ashah khyüsohcho, ta abinü anyemüyangnung nguchicho apüm nengdang nyitsarüti künyangtacho.

Xehnyitsenü Yukitacho

(Mat 13.31-32; Mrk 4.30-32)

18Jisu-nü tsingdhingcho, “Tsingrangba Yanglih tsü tu kyoro? Ihnü hütsü tu te kihtanung? 19Hütsü hi kyole. Nyüh khüdunü alih la xehnyitse shucho. Hütsü singdong kangcho, ko uzatinü ajengzati chah arüh süp shücho.”

Bhüpzanü Yukitacho

(Mat 13.33)

20Jisu-nü anyüpiusü yocho, “Ihnü Tsingrangba yanglih tsü tu te kihtanung? 21Hütsü hi kyole. Khingkurü khüdunü hüm liter yüre hiro bhüpza aza te charütapü apüm jinü mülangde yohpüre.”

Akongsüm Tbükhüm

(Mat 7.13-14, 21-23)

22Jisu-nü yangditi ko yangdongti bongnü nyitsarü te donü Jerusalem lang züducho. 23Khürünü abi te tsingdhingcho, “Abüdongba, nyitsarü azikyah du khümchonung mah-o?”

Jisu-nü arüh te lalingcho, 24“Akongsüm tbükhüm khu züdunung müküpm; tunüo khütangonü züdunung müküpnung ta mükohnung. 25Kuh abüdongba-nü shemüsu trahtri tsü khangtinung; hütsüde nührünü dongkhu yapü kukhang chah drongdrongchi, ‘Ihrü khyang khangthrujüng, Abüdongba’ pü yonung, ta abinü lalingnung, ‘Nührü khüdenü rochonang Ihnü mümüdhe!’ 26Hütsüde nührünü lalingnung, ‘Nü yola Ihrünü tsuyongcho; ko nühnü ihrü yangdila thsingyucho!’ 27Ta abinü thali yonung, ‘Nührü khüdenü rochonang Ihnü mümüdhe. Nührü münyirüti atümung, I tenü shehkhung!’#N. Khi 6.8 28Nührü dongkhu iipehnung ko nührünü Tsingrangba yanglih la Abraham, Isak ko Jakob ko azikehrü atümung ngude, khütoh-i tranung ko ha mütrehkehnung!#Mat 22.13; 25.30 #Mat 8.11-12 29Nyüchürolang ko nyüzüdulangnü, ko kihku lang ko kihjinglangnü nyitsarüti ronü Tsingrangba yanglih thsütila pümnung. 30Hütsüde sürü ade akaro akhunung ko sürü ade akhuro arüh aka kangnung.”#Mat 19.30; 20.16; Mrk 10.31

Jerusalem Nengdang Jisu Amüi

(Mat 23.37-39)

31Hütsüde Farisirü khürü ronü Jisu te yocho, “Nüh hilanü shehmüi khüdenang tsibae, tunüo Herod-nü nüh müpsehnung yangchile.”

32Jisu-nü arüh te lalingcho, “Wüng ko hütsüba shirung te young: ‘Chünye ko atu Ihnü amünyi nbü iipehnü akyangjüba nguchinung, ko asangu nyümong I nguchi thümnung.’ 33Ta chünye, atu ko zidu Ipu langla tsibae; tunüo azikehrü khüdu Jerusalem chah khu apalang sünung mükoh.

34“O Jerusalem, Jerusalem! Tsingrangba-nü nührü yang müthehcho azikehrüti müpsehba, ko yusi hirüti lungnü kengsehba. Hünanü abükyü za aqo pohki nübülungcho kyo, Ihnü khüdopi nührü atümung khyahrinyücho, ta nührünü I khyang mükhyahrisoh. 35Hütsüeko nührü amübükuh pehjünung. Ihnü nührü te yore, ‘Abüdongba nengla sü roro abi müwajüng pü yonung bekhyah müchide nührünü Ih müngunung.’ ”#N. Khi 118.26; Jer 22.5

Currently Selected:

LUK 13: SANGBSI

Highlight

Copy