LUK 11

Dangkhidangnang Thsingyucho

(Mat 6.9-13; 7.7-11)

1Nyümong khüdu Jisu-nü müdüm-o chah dangkhidangnang licho. Khode abi thümcho, amono yola nyüh khüdunü abi te yocho, “Abüdongba, Johan-nü amonoti te thsingyucho kyo ihrü te dangkhidangnang doung.”

2Jisu-nü arüh te yocho, “Nührünü dangkhidangnangde hiroh-i young:

“Uwa:

Nü neng amüsa hechisohng;

Nü yanglih rosohng.

3Ihrü khyang nyümong mükhu tsuyongnung khülo.

4Ihrü te thsamehrü khyang Ihrünü mülang pehjücho roh-i,

Ihrü mülang pehjüng.

Ko ihrü athsadsü yang tünü.”

5Ko Jisu-nü amonoti te yocho, “Nührü yola nyüh khüdunü shangrü kuh khüdu yang yürüptülungla wü abi te yonung, ‘I müyang, I khyang hümdhse asang nyasohng. 6Ade shilangnü I müyang khüdu lung lile, ko abi khyang tüpnung tu mühle!’ 7Ko nü müyang tsünü kuh yonglangnü hita lalingnung, ‘Ih tülongmüzi! Kuh zipehko, ko I tsurüti yola Ih yüpjole. Ih shemüsu nü khyang tusü müjücheh.’ 8Hütsütakhang khütanung? Ihnü nührü te yore, nüh abi shangrü thsachonü abinü shemüsu nü dhsütah müjühnye, ta nühnü müshahpü ching du chingcho nengdang abinü shemüsu nü dhsütah atümung jünung.

9“Hütsüeko Ihnü nührü te yore: Ching, ko nührü khyang jünung; yangching; ko nührünü ngunung; drongdrongching, ko nührü khyang khangthrujünung. 10Tunüo achingrü müipi khyang jünung, ko ayangchirü müipinü ngunung, ko adrongdrongchirü müipi khyang khangthrujünung. 11Nührü aurüti khürünü nührü tsurünü ngu chingde mürü jürü mah-o? 12Mahkhang hünakyü chingde khakikoh jürü mah-o? 13Nührü roh-i amütsanü mii, nührü tsuzarüti khyang atsa jünung müdhekhang, ninglang liba Aunü abi te chingrü khyang Anbü Amüsa khütoi alaa jünung!”

Jisu ko Beelzebul

(Mat 12.22-30; Mrk 3.20-27)

14Jisu-nü adohrü khüdu chahnü amünyi nbü iichehchüpehchi yacho; ko khode amünyi nbü tsü tsipehcho, nyitsarüba tsünü yu chonung dikeh, sühdinü nyemüyangcho, 15ta khürünü yocho, “Amünyiti yola ayingba, Beelzebul-nü abi khyang arüh iipehnung zii jüre.”#Mat 9.34; 10.25

16Aparünü Jisu xohsohnyü, abi Tsingrangba chahnüepü müdhenung nengdang thsayahiya khüdu nguchingpü arühnü abi te tsingdhingcho.#Mat 12.38; 16.1; Mrk 8.11 17Ta Jisu-nü arüh lümcho richeh ngu arüh te yocho, “Yanglih khüibanü palu jangjangthsa changnah khatanang hütsü changnung; ko changnahba kukhi khülure. 18Hütsü roh-i Satan yanglih la amülung khüdunü khüdu te khatakhang, hütsü khüta yachehnung? Ihnü amünyi nbü iipehba tsü Belzebul ziinü nguchisohrepü nührünü yore. 19Hütsüta Ihnü arüh iipehrükhang, nührü khanglang rorüh nüsü arüh khüta iipehnung? Nührü khanglang iirorütinü nührü amüthsalangepü yuzi jüre! 20Mah, ta hiba hi Tsingrangba zii khu Ihnü amünyiti iipehre ko hi khunü Tsingrangba yanglih tsü nührü yola ropehkopü yuzi jüre.

21“Khode rezeh nyitsarü khüdunü abi thsunohrü thsachehpü apu kuh nyahro, abi kohro apüm khümchore. 22Ta khode re azeh-ubanü abi dhsükehpü kohnang, abüdongrü alongdi thsunohrü apüm zang tsire ko arüh changtare.

23“Sü I lahpi müyaro, abi Ih nyümre; khyübülungla mütrokhang, abinü shupehre.#Mrk 9.40

Amünyi Nbü Thalicho

(Mat 12.43-45)

24“Khode nyüh khüdu chahnü amünyi nbü tsinang, abinü kunglikungsa la kumünyi chah yangchire. Abinü süsü müngukhang, abinü apu te yore, ‘Ihnü I kulang thali wünung.’ 25Hütsüta abinü thalirü ko kuh tsü müsakhüti athsalangnü ngure. 26Hütsüde abinü wü apu tenü amütsauba anbü dhünyeh nororü, ko arüh züro hütsüla lire. Hütsükonülü, hütsüba nyitsarü tsü akhudi tenü amütsauba suro kangre.”

Yuje Akünyang

27Jisu-nü hi yode, sühdi la tsünü khingkurü khüdunü abi te yocho, “Nüh longla hitpü ko nüh nümüsutpü khingkurü tsü khütoh-i amüwanung!”

28Ta Jisu-nü lalingcho, “Sürünü Tsingrangba yu yuchiro ko bichiro arüh uthring khüta amüwanung!”

Thsayahiya Khüdu Chingcho

(Mat 12.38-42)

29Sühdi tsü abi mükang shibülungde, abinü yonung dikehcho, “Hiba shang nyitsarü khütoh-i amünyi-o? Arühnü thsayahiya ngunyüre ta, Jona thsayahiya chah khu apa tu müngusohnung.#Mat 16.4; Mrk 8.12 30Tu khüta Jona tsü Nineverü te amüdhethsa kangcho, hütsü roh-i Nyitsarü Tsurüsü hiba shang nengdang adüzü khüdu kangnung.#Jhn 3.4 31Yukhaba nyümong Sheba yangthsalatpünü yapü hiba shang nyitsarü mülangjünung, tunüo yangthsaba Solomon lümlong nyinung alih changka lanü abükyü rocho; ko Ihnü nührü te yore, hila Solomon tenü adiu lango lile.#1 Yang 10.1-10; 2 Roh 9.1-12 32Yukhaba nyümong Ninevi-rünü yapü nührü mülangjünung, tunüo Jona-nü thsingyucho yuchi arüh lasih thsamülacho; ko Ihnü nührü te yore hila Jona tenü adiu lango lile!#Jona 3.5

Afü Atsingse

(Mat 5.15; 6.22-23)

33“Sünüsü dsi tahkehpü lohnü mühaptipüre; ta kuh la zürorütinü atsingse tsü ngunungthsa, abinü hütsü avihpüsing chah vihpüre.#Mat 5.15; Mrk 4.21; Luk 8.16 34Nü fü nengdang nü nahtse tsü dsi khüdu kyole. Khode nü nahtse tsa liro, nü fü apüm tsingsere: ta khode nü nahtse mütsanang, nü fü apüm marürahre. 35Hütsüeko müzahng, nü chah atsingse tsü tümarürahsoh. 36Nü fü apüm tsü amarürah mülipü avisanü jengkhang, dsi avisajing nü chah tehkehcho roh-i, apümlang avisanü jeng linung.”

Jisu-nü Farisirü ko Yuzeng Dorüti Mülangjücho

(Mat 23.1-36; Mrk 12.38-40)

37Khode Jisu yu chokacho, Farisirü khüdunü abi tsuyongnung dsiyohcho; achotsü abinü yangtsunung züdu pümcho. 38Jisu-nü mütsuyongede mümütsahcho ngu Farisiba tsü nyemüyangcho. 39Achotsü Abüdongba-nü abi te yocho, “Nührü Farisirü-nü nührü shingtbhürü amichah thsütohre, ta lasih lalü shühkhatoh ko amünyinü jeng lile. 40Adohrüti! Tsingrangba sünü amichah külüpcho, abinü ayonglangsü mükülüpcho do? 41Ta nü shingtbhürü la tu liro, hütsü ailümrü khyang jüng, ko lüpcho nü nengdang müsa kangnung.

42“Nührü Farisirüti ahohah! Nührünü thungwi, nengbürang ko müyahmürah apüm lanü dhüre nohlüm jüre, ta yuje ko Tsingrangba müinunglü thrüchahchüpehre. Nührünü hirisü nguching ko apasü tüthrüchahchübeh.#Lev 27.30

43“Nührü Farisirüti ahohah! Nührünü Sinagog la pümji atsauba du khyünyüre ko yanglongla salüm jüsohnyüre. 44Nührü ahohah! Nührü nahnü münguba kong, khüi michah nyitsarünü müngupü tsehchiro, hütsü kyole.”

45Yuzeng dorü yola nyüh khüdunü abi te yocho, “Athsingyurü, nühnü hita yode, ihrü mii zeh müthsamünyüre!”

46Jisu-nü lalingcho, “Nührü yuzeng dorüsü khüta adrünung! Nührünü nyitsarü khyang bha amüling zang mühehre, ta hütsüri bhamüling tronung nührübürü müyungza khüdu mii mümüyungchüre. 47Nührü ahohah! Nührü jümürütinü müpsehba azikehrüti kong nührünü tsa külüpre. 48Hütsükhang nührü jümürütinü tu nguchicho nührübürünü nyengchoung; tunüo arühnü müpsehcho ko nührünü arüh kong külüpre. 49Hi khyanglangnü Tsingrangba lümlongnü yocho, ‘Ihnü arüh yang azikehrüti ko yusi hirü müthehnung; arühnü khürü müpsehnung ko khürü dhsümthsenung.’ 50Hütsünü limih thri du azikehrüti müpsehcho atümung, 51Abel müpsehcho tinü Zekaria, sü bholu ko amüsa müdüm nyüh kahlanü müpsehcho nengdang hiba shang nyitsarü khingchinung. Ho, Ihnü nührü te yore, arüh atümung nengdang hiba shang nyitsarü khingchinung!#Lip 4.8; Lip 24.20-21

52“Nührü yuzeng adorüti ahohah! Nührünü lümlong kuh tohtising yohpüre; nührübürüsü müzüdurü ko azüdunyürüsü yatire!”

53Jisu hütsü müdüm pehjüde, yuzeng dorü ko Farisirü-nü abi khütang mülangjünü lang adrong nengdang tsingdhing, 54abinü lango chomehsohpü mülang rangnung jümcho.

Currently Selected:

LUK 11: SANGBSI

Highlight

Copy