LUK 10

Jisu-nü Nyührepü-anyüh Müthehcho

1Hütsüpü khanglang Abüdongba-nü apa mono nyührepü-anyüh throchehcho ko apu wünung liba yangdi ko müdüm müipi tsehleh nyüh anyüh-nyüh müthehcho. 2Abinü arüh te yocho, “Luh khütango nyi lile, ta nyükheh mühle. Hütsüeko luh Abüdongba te aluh maxanung nyükheh müthehng pü kihchieng.#Mat 9.37-38 3Wüng! Ihnü rangfüti yola san zati roh-i nührü müthehre.#Mat 10.16 4Thsiyohbongnye, shibhanye mahkhang jingkhümnye tu tühi; ko langla sükhyangsü salüm jünung tünyehli.#Mat 10.7-14; Mrk 6.8-11; Luk 9.3-5 5Khode nührü kuh khüdula züdunang, akhu hita young, ‘Hiba kuh la atbachi lieng.’ 6Hütsüla atbachi tsurü likhang, nührü atbachi arüh chah küdung; mülikhang hütsü nührü yang thali ronung. 7Arühnü nührü khyang tu jünang hütsü tsu ko yongnü kuh hütsüla du müdong, tunüo anguchirülü palu nyükheh shi ngunung athsalang. Kuh mülichi müdong türachi.#1 Kor 9.14; 1 Tim 5.18 8Khodederü nührü yangdi khüdula züdunang ko khyüchonang, nührü khyang tu jünang hütsü tsung, 9hütsüla füdhsarü kyangjüng ko I nyitsarü te, ‘Tsingrangba Yanglih nührü amünyethsa lilepü young.’ 10Ta khodederü nührü yangdi khüdula züdunang, ko mükhyüchonang, yanglonglang chüdung ko young,#R. Ngu 13.51 11‘Nührü yangdi lanü ihrü jingchah küducho asongsong mii nührü nyüm tiipehre. Ta hi müdheing, Tsingrangba yanglih nührü amünyethsa ro lile.’ 12Ihnü nührü te ajüje yore, Yukha nyümongla Tsingrangba-nü hütsüba yangdi tenü Sodom-rü te yanglilüm alaa ngunung!#Lip 19.24-28; Mat 11.24; 10.15

Müyudsiba Yangditi

(Mat 11.20-24)

13“Nührü ahohah, Korazin! Nührü ahohah, Bethsaida! Thsayahiya khüi nührü yola nguchicho hütsü Tyre ko Sidon la nguchirelang, papadenü arühnü müyahshü khyüpü arüh chah tavi phikeh lasih thsamülapü liba thsako!#Isa 23.1-18; Ezk 26.1—28.26; Joel 3.4-8; Amo 1.9-10; Zek 9.2-4 14Yukhaba nyümongla Tsingrangba-nü nührü tenü Tyre ko Sidon-rü te yanglilüm alaa ngunung. 15Kapernaum, nührü jangjang ningchi dhimüsunyücho mah-o? Nührü mümehmi la dhiyohchünung!”#Isa 14.13-15 16Jisu-nü amonoti te yocho, “Sünü nührü te nyiro, abinü Ite nyire; sünü nührü mükhyüchoro abinü Ih mükhyüchore; ko sünü Ih mükhyüchoro abinü Ih müthehbong mükhyüchore.”#Mat 10.40; Mrk 9.37; Luk 9.48; Jhn 13.20

Nyührepü-anyüh tsü Thalicho

17Nyührepü-anyüh tsü künyangseh thalicho. Arühnü yocho, “Abüdongba, amünyi nbünü mii Ihrünü nü nengla yuzeng jüde nyiko.”

18Jisu-nü arüh te lalingcho, “Ninglangnü ningmüla roh-i Satan shohjocho Ihnü nguko. 19Nyieng! Nührünü mürü ko khakikoh michah jüchinung ko arorüh tase apüm kohnung, ko tunüsü nührü müdhsakehsohnung Ihnü nührü khyang tase jüko.#N. Khi 91.13 20Amünyi nbünü nührü yochonyichonü tükünyang; ta ninglang yanglih la nührü neng thrahcho nengdang künyang.”

Jisu Künyangcho

(Mat 11.25-27; Mrk 13.16-17)

21Hütsü shikhela Jisu Anbü Amüsanü jengpü künyangnü yocho, “Uwa, ning ko alih Abüdongba! Ihnü nü nengsere, tunüo nühnü amüdherü ko lümlong lirü tenü rang yohpücho amümüdherü te ngusohko. Ho, Uwa, hiba hi nühnü lümchobae. 22I U-nü I khyang lüpcho jüko. Atsudhre tsü sünang Au chah khu sünüsü mütsüp, ko atsudhre chah khu ko sürüte atsudhrenü abi mishanung throchehcho arüh chah khu sünüsü Au mümüdhe.”#Jhn 3.35; 10.15

23Hütsüpü Jisu-nü amono yanglang ximüla rangnü yocho, “Nührünü ngubati ngunung tsü khütoi amüwanung. 24Ihnü nührü te yore, azikehrüti ko yangthsarütinü nührünü nguba tsü ngunyücho, ta arühnü müngucho, ko nührünü yuchiba tsü yuchinyücho, ta arühnü müyuchicho.”

Atsa Samaria Yukitacho

25Yuzeng dorü khüdu shemüsu Jisu xohsohnung müküpcho. Abinü tsingdhingcho, “Athsingyurü, müchangkaba akang ngunung Ihnü tu nguchinung?”#Mat 22.35-40; Mrk 12.28-34

26Jisu-nü abi te lalingcho, “Amüsa yunü tu yoro? Nühnü khüta nyichehro?”

27Nyitsarübanü lalingcho, “‘Nü lasih apümnü, nü nbü apümnü, nü tase apümnü ko nü lümlong apümnü Abüdongba nü Tsingrang müing; ko nü kurümrü abürü roh-i müing.’ ”#Lev 19.18; Azk 6.5

28Jisu-nü lalingcho, “Nühnü yuje lalingko,” “hütsü roh-i nguching ko nüh akang linung.”#Lev 18.5

29Ta yuzeng adoba tsünü apu langnyo Jisu te tsingdhingcho, “I kurümrü tsü süo?”

30Jisu-nü lalingcho, “Nyüh khüdu Jerusalem lanü Jeriko lang jowüchiyade fükhohrüti dhsükeh abi jengki khoh khyüjücho ko xüpnahcho ko sünungthsa pehjüpü tsicho. 31Hütsüba langla bebürü khüdu jowüchiya detingcho; ta khode nyitsarüba tsü ngucho, abinü müri tsicho. 32Hütsü roh-i Levirü khüdu rocho ko khode nyitsarüba tsü ngucho, abinüsü müri tsicho. 33Ta Samariarü khüdu sü hütsüba langla tsü wüyacho, abinü nyitsarüba tsü chii rocho, ko khode abinü abi ngucho, abinü müi lümcho.#2 Roh 28.15 34Abinü abi yang wücho, ko iha la tsü tuji ko cikih yohjüpü rümjücho; hütsüpü abinü apu gadu chah pümsohpü shilang kuh khüdu lang nowünü abi rükucho. 35Nyümong khüu abinü thsi anyüh khyücheh shilang kuh nyahba khyang jücho. Abinü shilang kuh nyahba te yocho, ‘Abi rükung, Ih khode thali ronang, abi nengdang nühnü khütoi alaa pehnang Ihnü nü khyang jünung.’ ”

36Jisu-nü yocho, “Hiri asang yola fükhohrü te dhsükehba nyitsarü te khüibanü kurümrü roh-i bichichoepü nühnü lümro?”

37Yuzeng dobanü lalingcho, “Sünü abi te müicho, hütsüvie.”

Jisu-nü yocho, “Wüng, ko hütsü roh-i nguching.”

Jisu-nü Martha ko Mary Xodhingcho

38Jisu ko amonoti arüh langla wüyade, yang khüdula rocho ko khingkurü khüdu anengnü Martha-nü abükyü kuh la abi nüyohcho.#Jhn 11.1 39Ani khüdu anengnü Mary licho sü Abüdongba jingte pümpü abinü docho nyicho. 40Martha-nü anguchi khütango nengdang longbümcho, achotsü abükyünü ro yocho, “Abüdongba, Inilatpünü nguchi apüm I khyang du pehjüba hi nühnü mülümjürü ang? Abükyü te ro Ih troung pü young!”

41Abüdongba-nü abükyü te lalingcho, “Martha, Martha! Nüh nguchi khütango nengdang longbüm lümtpanare, 42ta nüh lango dhsütahle. Mary-nü atsauba tsü throchehko, ko hütsü abükyü chahnü mühitsijünung.”

Currently Selected:

LUK 10: SANGBSI

Highlight

Copy