NÜCHEHCHO 9

Kanglungrü Sücho

1 Abüdongba-nü Mosa te yocho, “Farao yang wüng ko abi te Ih Ibrirü Tsingrang Abüdongba-nü hita yoreding, ‘Ih mübünung nengdang I müyurü wüsohng. 2Adesü nühnü arüh müwüsohpü tphahlikhang, 3Ihnü nü kanglungrü apüm— kuri, gadu, ut, misü, san ko miza chah adrünung asüba dhsara müthehnung. 4Ihnü Israelrü ko Ijiprü kanglungrü papa changchehjünung, ko Israelrü kanglungrü khüdusü müsünung. 5Abüdongba-nü alih la hi nguchinung atu bekhyah throchehko.’”

6Nyümong khüu tsü Abüdongba-nü achocho kyo nguchicho; ko Ijiprü kanglungrü apüm sücho, ta Israelrü yolü kanglungrü khüdusü müsücho. 7Atikehcho nengdang yangthsabanü tsingdhingcho, ko Israelrü kanglungrülü khüdusü müsü pü abi te yocho. Ta abi hong alaa zinü müyurüti tsü mütsisohcho.

Kii

8Hütsüpü Abüdongba-nü Mosa e Aron nyüh te yocho, “Taa lanü tavi müyo-o kang bieng; ko hütsü Farao bete Mosa-nü nyübongla sohmüthehng. 9Hütsü Ijip lih apüm shujengnung ko apümlang hütsü kii kangnung ko nyitsarü kanglungrü apüm chah hütsü madhsa kangnung.” 10Achotsü anyünü tavi aza bipü yangthsaba bete yacho; ko Mosa-nü hütsü nyübongla shu müthehde hütsünü kii chürosohcho, hütsü khu nyitsarü ko kanglungrü chah madhsa kangcho.#Mis 16.2 11Amongrütinü Mosa bete müyachehcho, tunüo arühsü aparü Ijiprü kyo kiinü tsüticho. 12Ta Abüdongba-nü Farao hongzi kangsohcho ko Abüdongba-nü yocho kyo, Farao-nü Mosa e Aron nyüh te mühnyicho.

Shurü

13Hütsüde Abüdongba-nü Mosa te yocho, “Atunyang mütoh wü Farao shirüng, ko abi te Abüdongba, Ibrirü Tsingrangba-nü hita yoreding: ‘Ih mübünung nengdang I müyurü wüsohng. 14Adelü Ihnü nü thsazirü ko nü müyurüti du mah, ta nüpu mii khingchinung, hütsüpü du Ih kyo limih la süsü mühle pü müdhenung. 15Ihnü nüh ko nü müyurü chah dhsaranü xüpnung I kheh dhimüsurelang, nührü sehseh changpehba thsako. 16Ta nüte I zii ngusohnung, ko limih apüm la I neng müdhesohnung Ihnü nü akang yohpücho.#Rom 9.17 17Ta ade yingcheh nü hongzi I müyurü mütsisohre. 18Atu hiba bekhyah Ijiprü yukheh la khodesü mütikehdhingcho shurü sühsohnung. 19Ade akang ko lüpcho jungchah licho khangtipünung yuzeng jüng. Jungchah liba nyitsarü ko kanglungrü michah shurü sühnung ko arüh apüm sünung’” 20Abüdongba-nü yochola tsü yangthsaba thsazirü khürünülü drücho ko ayurü ko kanglungrüti khangtipücho. 21Ta aparülü Abüdongba yula nangkhi müjü arüh ayurü ko kanglungrüti jungchah du yohpücho.

22Hütsüde Abüdongba-nü Mosa te yocho, “Nü kheh tsü ninglang dhimüsung, ko Ijip lih apümlang nyitsarü, kanglungrü ko rangmü la singdonglidong apüm chah shurü sühnung.” 23Achotsü Mosa-nü aja tsü ninglang dhimüsucho, ko Abüdongba-nü alih la ningki, shurü ko tsingchi jürosohcho. 24Abüdongba-nü apümlang shurü ko ningmüla tsingchi zeh khütang sühsohcho. Ijiprü yukheh la hiba hi adangchi amütsauba tikehcho.#Mis 8.7; 16.21 25Ijip lih apüm la shurü tsünü jungchah licho lüpcho nyitsarü, ko kanglungrü changsohcho. Rangmü la singdonglidong lüpcho kengsehcho. 26Israelrü liba Goshen lih la du shurü tsü mürocho.

27Yangthsabanü Mosa e Aron nyüh dsinü yocho, “Ade Ihnü amünyi shitpahko; Abüdongba yuje-e, Ih ko I nyitsarütinü thsamehko. 28Abüdongba te kihchijüng! Ningki ko shurü sühchonü ihrü kükyüko! Ihnü nührü tsisohnung; adelü nührü hila mülinung.”

29Mosa-nü abi te yocho, “Ihnü yangdi lanü chüduyeng Abüdongba te I kheh dhimüsu dangkhidangnangjünung. Ningkiba zahnung ko nührünü alimih hi Abüdongba yoepü tsüpnung shulüm shurü sühkanung. 30Ta ade yingcheh nüh ko nü thsazirütinü Abüdongba Tsingrang müdrü pü Ihnü müdhele.”

31Müyahdong ko lüdi thsangnyangcho, tunüo lüdi nyi licho ko müyahdong tsü mülongchi licho. 32Ta lihtohlü müthsangnyangcho, tunüo hütsülü aka nyire.

33Mosa-nü yangthsaba tenü za yangdi lanü chüdupü Abüdongba te akheh dhimüsu dangkhidangnangcho. Hütsüde ningki, shurü ko tsing zahpehcho. 34Khode atikehcho tsü Farao-nü ngucho, abinü thali amünyi shitpahcho. Abi ko abi thsazirüti tsü lede kyo arüh hongzi kangcho, 35ko Abüdongba-nü Mosa khu tsehleh yocho kyo, yangthsabanü Israelrü tsü mütsisohcho.

Currently Selected:

NÜCHEHCHO 9: SANGBSI

Highlight

Copy