NÜCHEHCHO 10
10
Khengqu
1Hütsüde Abüdongba-nü Mosa te yocho, “Wüng ko Farao shirüng; Ihnü arüh yola thsayahiya hiri nguchide yangthsaba ko abi thsazirü lasih müküpsohcho, 2ko nührünü nührü tsuzarü ko shümtsurü te thsayahiya hiri nguchide Ihnü khüta Ijiprü dohsohcho, hütsüri yosohnung shulüm nührü atümungnü Ih tsü Abüdongba epü müdhenung.”
3Achotsü Mosa e Aron nyühnü wü Farao te yocho, “Abüdongba, Ibrirü Tsingrang-nü hita yore, ‘Nühnü khütoi nyahli I yocho mühnyinung? I nyitsarünü Ih mübünung shulüm arüh wüsohng. 4Nühnü imohdukhang, Ihnü nü yanglih la atu khengqu müthehchünung. 5Arüh khütango ronü alih lüptinung. Shurünü müp-pü anyingcho singdong miinü arühnü tsukhangnung. 6Arühnü nü yangthsaba kuh ko nü thsazirü kuh ko müyurü kuh apüm jengnung. Arüh tsü nührü jümürünü ngucho apüm tenü amütsaba thsanung.’” Hütsüpü Mosa-nü yangthsaba tenü ximüla tsicho.
7Yangthsaba thsazirünü abi te yocho, “Hiba nyitsarünü khütoi nyahli Ihsa khyang chongcha jünung? Israelrünü wü arüh Tsingrang Abüdongba mübünungthsa arüh wüsohng. Ijip thsangnyang liba hi nühnü müngurü mah-o?”
8Achotsü yangthsaba yanglang Mosa e Aron nyüh nüli rocho ko abinü anyüh te yocho, “Nührü wünü nührü Tsingrang Abüdongba mübünung kohle. Ta yujeba sürü wünungo?”
9Mosa-nü lalingcho, “Ihrü tsuzarüti ko azirüti ihrü apüm wünung. Ihrü tsurü ko tsularüti, San ko miza ko misüti nünung, tunüo Abüdongba nengla thsüti khüdu linung.”
10Yangthsabanü yocho, “Khingkurü azarülü khodesü münüsohnungepü Ihnü Abüdongba nengla yuchümre. Nührünü nyümnung rah külüpcho tsidsa ngure. 11Nührünü mübünyükhang, adhrerü du wü Abüdongba mübünung kohle.” Hütsüta yopü Mosa e Aron nyüh yangthsaba tenü iipehcho.
12Hütsüde Abüdongba-nü Mosa te yocho, “Ijip lih la khengqu pohsohnung nü kheh dhimüsung. Shurü iha lanü nyingcho ko chicho apüm tsukhangjünung.” 13Hütsünü Mosa-nü aja dhimüsucho, ko Abüdongba-nü nyüchürolangnü nyübong chürosoh hütsü nyümong ko hütsü romang müyüp füsohcho. Nyangnyü khüulü hütsünü khengqu pohchehsohcho. 14#Mis 9.2-3Arüh atii atiinü ro alih apüm mülümphacho. Hiba khengqu atii tsü atsichola müngudhingcho ko müngudhingnung arangcheh licho. 15Alih tsü arühnü nyahthrüm lüpticho; shurünü müpnying apüm ko singdong chah singsih apüm zeh arühnü tsukhangcho. Ijip lih apüm la singdonglidong tuchahsü amüyah tusü münyingjücho.
16Hütsüde yangthsabanü dhsüdhsa Mosa e Aron nyüh dsinü yocho, “Ihnü nührü Tsingrang Abüdongba ko nüh nyüm amünyi shitpahko. 17Adesü I münyi pehjüng ko nührü Tsingrang Abüdongba te I chahnü hiba asüba akhingchi khyümüinung kihchijüng.” 18Mosa-nü yangthsaba tenü za wü Abüdongba te kihchicho. 19Ko Abüdongba-nü nyüchüro nyübong tsü nyüzüdu nyübong khütang zi kangsoh khengqu tsü fübülung Amoh Kihdi la füyohchücho. Ijip lih apüm la khengqu khüdusü nying mülicho. 20Ta Abüdongba-nü yangthsaba lasih müküpsoh, Israelrü tsü mütsisohcho.
Amarürah
21 Abüdongba-nü hütsüde Mosa te yocho, “Ninglangthring nü kheh dhimüsung ko Ijip lih apümlang amarürah khüdunü shütinung.” 22#N. Khi 105.28; Mis 16.10Mosa-nü ninglangthring akheh dhimüsucho ko Ijip lih apümlang nyümong asang marürah kangpehcho. 23Ijiprü arüh khüdunü khüdu müngutacho ko hütsü shikhe sünüsü abi kuh müpehjücho. Ta Israelrülü arüh lichola atsingse licho.
24Yangthsabanü Mosa dsi yocho, “Nührünü wü Abüdongba mübünung mülare: Nührü khingkurü azarü mii wünung mülare. Ta nührü san, miza ko misülü hila du pehjüng.”
25Mosa-nü lalingcho, “Dhing, ihrünü Abüdongba khyang kangmübü ko trüp-mübünung shulüm nühnü kanglungrü jüng. 26Ihrü kanglungrü ihrü yola nübae; tusü pehjü mütsinung. Ihrü Tsingrang Abüdongba mübünung ihrü jangjangthsa kanglungrü tsü thronungbae. Ko ihrü wü hütsü müchide, kangmübü khütari khyo abi mübünungnang ihrünü mii mümüdhe.”
27 Abüdongba-nü yangthsaba tsü lasih müküpsoh, abinü arüh mütsisohcho. 28Abinü Mosa te yocho, “I tenü shehkhu tsieng! I khyang nü tsah thali tüngusoh! Ihnü khüi nyümong nüh ngunang, nüh sünung!”
29Mosa-nü lalingcho, “Nühnü yocho kyo, nühnü khodesü Ih thali müngunung.”
Currently Selected:
NÜCHEHCHO 10: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
