NÜCHEHCHO 11

Akhu suroba Rümra

1Hütsüpü Abüdongba-nü Mosa te yocho, “Ihnü adelü Ijip la Farao ko müyurü chah akhingchi khüdu du jünung. Hütsü khanglang abinü nührü tsisohnung. Yutsatsa, abinü nührü hilanü iipehnung. 2Ade Israelrü te chotang ko arüh atümung te, arüh kurümrü te hon ko taripi kohro chiingpü young.” 3Ijiprünü Israelrü jengreng drüsohnung Abüdongba-nü nguchiko. Yutsatsa, thsazirü ko müyurünü Mosa tsü nyitsarü dee amülah-epü khichire.

4Mosa-nü hütsüde yangthsaba te yocho, “Abüdongba-nü yore, ‘Yürüptülungla Ih Ijip lih lahkhunung, 5ko Ijip la aukhuba atümung sünung, yangthsaba pümji mülihnung thsiking khyüba yangthsaba tsurü chahnü dikehpü ayularü tsurü fürü thsürü miinü. Akhu mütrücho kanglungrü apüm sünung. 6Ijip lih apüm la khodesü mütikehcho ko mütikehnung trakhitrayo amülah linung. 7Ta Israelrü ko arüh kanglungrü chahlü füzanü mii mühungchinung. Hütsüde Ih, Abüdongba-nü Ijiprü ko Israelrü kahla, changcheh külüpjüchoepü nührünü müdhenung.’” 8Mosa-nü zika yocho, “Nührü thsazirü atümungnü I jingte ro mükhukehnung ko I müyurü nüpü tsipehng pü Ite kihchinung. Hütsü khanglang, Ih tsinung.” Hütsüpü Mosa-nü khütang zichüro yangthsaba pehjü tsicho.

9 Abüdongba-nü Mosa te yocho, “Ijip la Ihnü thsayahiya alaa nguchisohnung Farao-nü mütozahnü yocho mühnyinung.” 10Mosa e Aron nyühnü yangthsaba bete thsayahiya hiri apüm nguchicho, ta Abüdongba-nü Farao lasih müküpsohcho ko abi lih lanü Israelrü mütsisohcho.

Currently Selected:

NÜCHEHCHO 11: SANGBSI

Highlight

Copy