NÜCHEHCHO 12
12
Phungkhu Thsüti
1 #
Lev 23.5; Khi 9.1-5; 28.16; Azk 16.1-2 Abüdongba-nü Ijip la Mosa e Aron nyüh te chotacho. 2“Hiba choo hi nührü nengdang kang la akhudiba choo linung. 3Israel hung apüm te hiba athülaba müdhesohng: Hiba choo adhüreu nyümong nyitsarü mükhunü abi kukhi nengdang sanza mahkhang mizaza khüdu khyüng. 4Kanglungrü tsü üpümshünü tsukhangnung kukhi tsü zarakhang, nyitsarü müipinü khütoi tsunung hütsü dükeh abi ko abi kurümrü te changtanung kohle. 5Nührünü san mahkhang miza khüdu khyünung kohle, ta hütsü kang khüdu za apung ko tu achomükeh thsanungbae. 6Hütsüpü, choo la nyümong dhüremüyüu romang tsü, Israel hung apümnü kanglungrü tsü müpsehnung. 7Arühnü kuh khüila kanglungrü tsü tsunang hütsülalü trahtri bekhüm anyüdinglang ko amunglang chah tsü ashüh khyücheh münohng. 8Hütsü romang shuh tsü ruhnung ko singvarova akha ko bhüpza müyohpü hümdhse te tsunung. 9Hütsü ashühnü mahkhang kih la chongpü tütsu, ta athah, ajing ko bohnying zeh ruhpü tsung. 10Nührünü hütsü tusü nyangnyü khüu yingcheh tüyohbü; khürü nyingkhang hütsü tahpehng. 11Nührünü hütsü dhsüdhsa tsung, tunüo nührü shitseh nengdang jingla jingkhüm ko kheh la ja binung küdangnungbae. Hiba hi Ih, Abüdongba hechinung Phungkhu Thsüti lile.
12“Hütsü romang Ijip lih bongnü nyitsarü ko kanglungrü anyüding aukhuba ko akhu mütrücho kyüsehnung, ko Ijiprü tsingrangti khingchinü lahkhu tsinung. Ih Abüdongba lile. 13Trahtri bekhüm chah ashüh tsü nührü licho amüdhethsa linung. Khode Ihnü ashüh tsü ngunang, Ihnü nührü bongkhu tsinung ko Ihnü Ijiprü khingchide nührülü müdhsakehjünung. 14#Nüch 23.15; 34.18; Lev 23.6-8; Khi 28.17-25; Azk 16.3-8Nührünü hiba nyümong hi Ih, Abüdongba-nü tu nguchicho hütsü amünbüchünung ayah nyümong kang müzeh mung. Aronung shang apüm la hi müzeh bichieng.”
Bhüpza Müyohcho Hümdhse Thsüti
15 Abüdongba-nü yocho, “Nyümong dhünyeh nührünü bhüpza yohcho hümdhse tütsu, bhüpza müyohcho hümdhse du tsung. Akhudiba nyümong nührü kuh lanü bhüpza pehng, tunüo khürünü hiri nyümong dhünyeh kahla bhüpza yohcho hümdhse tsukhang, abilü I nyitsarü yola mükhiyohnung. 16Akhudiba nyümong ko dhünyeh-uba nyümong nührünü ashimükhong lieng. Hiri nyümongla chongkyanungchah khu apa tu nguchi tünguchi. 17Hiba thsüti hi mung, tunüo hiba nyümong Ihnü nührü hung Ijip lanü nüchehcho. Aronung shang apüm la nührünü hiba nyümong hi thsüti mung. 18Akhudiba choo nyümong dhüremüyü romang tinü mükyüpü khüdu romang chii, nührünü bhüpza yoh külüpcho hümdhse tusü tütsu. 19-20Nyümong dhünyeh nührü kuh la bhüpza müyohpünungbae, tunüo abüdongrü thsanye shuparü thsanye, khürünü bhüpza yoh külüpcho hümdhse tsukhang, abilü I nyitsarü yola mükhiyohnung.”
Akhudiba Phungkhu Thsüti
21Mosa-nü Israel la azibarü atümung dsinü arüh te yocho, “Nührü kukhi la Phungkhu Thsüti müzehnung shulüm, nührü atümungnü sanza mahkhang mizaza khüdu-khüdu khyüng. 22Hyssop#12.22: Hyssop: Ava adhülüm singdong lang khüdu. Hiba ava tsü ashüh ko kih la dhsangpü mübümüyangla xahkehjü bichicho. müphung-o khyo kanglungrü shüh zehba mütpah-tbhüla tsü dhsang ko trahtri bekhüm ko athahlang tsü müyühng. Ko mütsingsede nührü süsü kuh lanü tüchüdu. 23#Ibr 11.28Abüdongba-nü Ijiprü müpsehnung Ijip lih bong tside, Abinü nührü trahtri chah ashüh tsü ngunung ko nührü mümüpsehnung. Asüba Riwürü tsü nührü kuh la müzürosohnung. 24Nührü ko nührü tsuzarütinü hiri yuzeng lede bichieng. 25Khode nührünü anyengchocho lih la tsü züdunang, hiba ayahmübü hi nguching. 26Nührü tsuzarütinü nührü te, ‘Hiba ayahmübü hi tu adüzüo’ pü tsingdhingkhang, 27nührünü hita laling, ‘Hiba hi Abüdongba dhichinung Phungkhu Thsüti kangmübü lile, tunüo abinü Ijip lih la Israelrü kuh-lü bongkhu tsicho. Abinü Ijiprü müpsehcho, ta Ihsalü rikicho.’”
Israelrünü mükhukeh mübücho. 28Ko arühnü wü Abüdongba-nü Mosa e Aron nyüh te yuzengjücho kyo nguchicho.
Akhu Suroba Sücho
29Yürüptülungla Abüdongba-nü Ijip la aukhurüti atümung, yangthsaba pümji khyünung liba yangthsaba tsurü chahnü dikeh shukuh la arangyoh la lirü tsurü miinü müpsehcho ko akhudiba mütrücho kanglungrüsü apüm müpsehcho. 30Hütsü romang, yangthsaba, abi thsazirü ko Ijiprü atümung jesucho. Ijip lih apümlang trakhitrayo amülah licho, tunüo kuh khüdula dusü aukhuba mümüpsehpü mülicho. 31Hütsü romang tsünü yangthsabanü Mosa e Aron nyüh dsiro yocho, “Tsipehng, nüh ko nührü Israelrüti! I limih pehjüng; nührünü tsingdhingcho kyo, wüng ko nührü Abüdongba mübüng. 32Nührü san, miza ko misüti nüpü tsieng. Ko I nengdangsü dangkhidangnangjüng.”
33Ijiprünü arüh limih pehjüpü dhsüdhsa tsinung kihchicho; arühnü yocho, “Nührü mütsikhang ihrü atümung sükhangnung.” 34Achotsü müyurütinü Bhüpza müyohcho hüm ko hüm ruhfüh arüh shü lanü tümpü arüh pünurü chahnü dhicho. 35Israelrünü Mosa-nü yocho kyo nguchicho, ko Ijiprü te arüh hon ko taripi kohro ko arüh jengki chingcho. 36Abüdongba-nü Ijiprü khyang nyitsarü apüm khyang jengreng jüsohcho ko arühnü chingcho apüm jüsohcho. Hütsüta Israelrünü Ijiprü kuthsi hitsicho.
Ijip Lih Pehjücho
37Israelrünü jingnü Rameses lanü Sukot yang shemüsucho. Arüh khingkurü azarü mükhipü adhrerü dunü hajar thsih dhüroh-o thsacho. 38Arüh yola aparüsü khütango ko san, miza ko misü adrong zeh wücho. 39Arühnü Ijip lanü hiba hüm la tsünü bhüpza müyohpü hümdhse külüpcho, tunüo thohdhünü arüh Ijip lanü iipehchonü arüh tsangdhi mürungnümpahcho mahkhang bhüpza yoh hüm mükülüp-pahcho.
40 #
Lip 15.13; Gal 3.17 Ijip la Israelrü kang 430 licho. 41Kang changka nyümong, Abüdongba nyitsarü atümung Ijip pehjücho. 42Abüdongba-nü Ijip lanü arüh nüchehnung jüm yaba bekhyah tsü aromang thsacho; hiba romang tsü aronung shang apüm la Israelrünü dhingyanung müsachehjücho.
Phungkhu Thsüti Yuzeng
43 Abüdongba-nü Mosa e Aron nyüh te yocho, “Phungkhu Thsüti yuzeng hiri linung: Shuparü Phungkhu Thsüti tsuyongba mütsunung, 44ta nühnü lihcho ayurünye müjüp-pehkhang, tsunung kohle. 45Amüshu lirü ko amülihcho shehsherü sünüsü hi tsunung mükoh. 46#Khi 9.12; Jhn 19.36Tsuyongnung apüm tsü achongkyaba kuh la tsünü tsukhangnung athsalang; dongkhu mühitsinung. Ko kanglungrü rüh tsü tusü tüthsangnyang. 47Israel hung apümnü hiba thsüti hi müzehnung, 48ta amümüjüp-pehrü sünüsü hi tsunung mükoh. Nührü yola lirü shuparü khüdunü Phungkhu Thsüti müzehla zehnyükhang, nühnü arüh kukhi la adhrerü atümung akhu müjüp-pehjüng. Hütsüpü du abi tsü Israelrü shutsakhung kyo khiyohnung ko thsütila tsü zehnung kohle. 49Hiba yuzeng akyokyo tsü shutsakhung Israelrü ko nührü yola shuparü chah bichinung.” 50Israelrü atümungnü Abüdongba-nü Mosa e Aron nyüh te tu yocho hütsü nyi bichicho. 51Hütsü nyümong Abüdongba-nü Ijip lanü Israelrü yucho nüchehcho.
Currently Selected:
NÜCHEHCHO 12: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
