NÜCHEHCHO 13

Aukhuba Müsachehcho

1 Abüdongba-nü Mosa te yocho, 2#Khi 3.13; Luk 2.23“Aukhurü adhrerü atümung I khyang müsacheh jüng, tunüo aukhurü Israelrü adhrerü atümung ko akhu mütrücho kanglungrü atümung Iyo lile.”

Bhüpza Müyohcho Hümdhse Thsüti

3Mosa-nü müyurü te yocho, “Hiba nyümong hi lümkehng; nührü ayurüthsa liba Ijip lanü nüchehba nyümong. Abüdongba-nü abi zii amülahla nührü nüchehba nyümong tsü hi. Bhüpza yohcho hümdhse mütsunung. 4Akhudiba, Abib choo,#13.4: Abib: Ibrirü Calendar la akhudiba choo aneng. Hi March awüm lanü April awüm chii würe. chünye nührünü Ijip pehjücho. 5Abüdongba-nü nührü jümürüti te Kanan-rü, Hit-rü, Amor-rü, Hiv-rü ko Jebus-rü lih hi nührü khyang jünungepü yuchüm nyengchoko. Khode abinü nührü hütsüba nyikih ko thsakukih pohyaba lih la tsü noronang, nührünü kang mükhu akhudiba choo chah hiba thsüti hi müzeh mung. 6Nyümong dhünyeh nührünü bhüpza müyohba hümdhse tsung ko dhünyeh nyümong tsü Abüdongba dhichi thsüti khüdu lieng. 7Nyümong dhünyeh nührünü bhüpza yoh külüpcho hümdhse tu tütsu; nührü lih khüdesü bhüpza mahkhang bhüpza yoh külüpcho hümdhse tülisoh. 8Khode thsüti tsü dikehnang, nührü tsuzarü te nührünü nguchiba hi nührünü Ijip lih pehjüde Abüdongba-nü tu nguchicho hütsü nengdang nguchirepü changnah young. 9Hi müzehcho khu nü kheh la, mahkhang nü kikhang chah lango rahkehpücho kyo amüdhethsa linung; hi khu Abüdongba yuzeng yangchinung ko khinung lümkehsohnung, tunüo Abüdongba-nü Abi zii amülahla nührü Ijip lih lanü nüchehko. 10Kang mükhu hiba thsüti hi athrochehcho nyümongla mung.

Aukhuba

11“Nührü ko nührü jümürüti te Abüdongba-nü yuchüm nyengchocho Kanan lih lang tsü nührü noronung. Khode abinü hütsü nührü khyang jünang, 12#Nüch 34.19-20; Luk 2.23nührünü Abüdongba khyang aukhuba tsü amübü jüng. Nührü kanglungrü chahnü akhu mütrücho apung tsü Abüdongba yo, 13ta nührünü abi chahnü thali sanza jüpü, gadu apunglü khyülinung kohle. Nührünü gadu tsü thali mülihchonyükhang, ahong tsü xisahjüng. Nührünü nührü tsurü aukhuba tsü lihchoung. 14Aronungla, hütsü tu adüzüo pü tsingdhingkhang, nühnü abi te, Ijiprü kheh la ayurü suro lanü Abüdongba-nü Ihsa khümchochoepü young. 15Khode Ijip yangthsabanü alasih müküp Ihsa mütsisohcho, Abüdongba-nü Ijip lih la, nyitsarüsü ko kanglungrüsü aukhuba müpsehcho. Hütsünü Ihsanü akhu mütrücho apung kanglungrü kangmübü jürede tsuzarü aukhurülü lihchehlire. 16Hiba hi lango alümkehnung Ihsa kheh la mahkhang kikhang chah müthsükehcho kyole; hi khu Abüdongba-nü abi zii amülah khu Ijip lanü Ihsa nüchehchoepü lümkehsohre.”

Nyükhi Dongdi ko Michang Dongdi

17Khode Ijip yangthsabanü müyurüti tsü tsisohcho; Filistia lang wüba lang tsü amünyeh-u thsanye, Abüdongba-nü hütsüba lang tsünü arüh münücho. Tsingrangba-nü lümcho, “Nyitsarütinü khata mütohde arüh lasih thsamüla Ijip lang müthalisohnyüre.” 18Hütsünü, abinü arüh Amoh Kihdi yang lipilih khu amükanglangnü nücho. Israelrü tsü khata nengdang küdangpü licho.

19 # Lip 50.25; Jos 24.32 Josef-nü Israelrü khyang yuchüm nyengchosohcho kyo, Mosa-nü Josef rüh tsü bicho. Josef-nü yocho, “Khode Tsingrangba-nü nührü khümchonang, hiba müdüm lanü nührünü Ime hitsieng.”

20Israelrünü Sukot pehjüpü ro lipilih chihpü Etham la nyehkehcho. 21Anyümong Abüdongba-nü arüh belang nyükhi dongdinü ko aromang michang dongdinü nücho, hütsünü arühnü aromang ko anyümong tsehcho. 22Anyümong nyükhi dongdi ko aromang michang dongdi tsünü müyurü tenü müzacho.

Currently Selected:

NÜCHEHCHO 13: SANGBSI

Highlight

Copy