NÜCHEHCHO 8

Kheng

1Hütsüpü Abüdongba-nü Mosa te yocho, “Wüng ko Farao te Abüdongba-nü hita yorepü young, ‘Arühnü Ih mübünung nengdang I müyurü tsisohng. 2Nühnü mühnyikhang, Ihnü nü limih apüm khengnü jengsoh khingchinung. 3Nile yongkhi tsü khengnü jengnung ko hütsünü müzuhcho tsü nü kuh, nü yüpji, nü chongnong, nü pohki thsazirü ko nü müyurüti kuh, ko nü taphi ko arüh füh la mii jengnung. 4Arühnü nü chah, nü müyurü chah ko nü pohki thsazirüti chah khyakehnung.’”

5 Abüdongba-nü Mosa te yocho, “Aron te nüja tsü yongkhi, kihrü ko changtphüti michah dhimüsungting ko kheng pohcheh Ijip lih jengsohng. 6Achotsü Aron-nü yongkhiti michah aja dhimüsucho, ko kheng pohcheh limih jengcho. 7Ta amongrütinü azikeh nguchi nguchicho, ko arühnüsü limih chah kheng tsü chürosohcho.”

8Yangthsabanü Mosa e Aron nyüh dsiro yocho, “Kheng hiri khyükhusohnung Abüdongba te dangkhidangnang; wünü arühnü Abüdongba khyang kangmübü jünungthsa Ihnü nü müyurü tsisohnung.”

9Mosa-nü yocho, “Nührü nengdang Ihnü künyangseh dangkhidangnangjünung. Nüh, nü pohki thsazirü ko nü müyurü nengdang dangkhidangnangjünung bekhyah du zeng. Hütsüde nührü kheng tenü zanung ko Nile chah khu kheng mülipehnung.”

10Yangthsabanü lalingcho, “I nengdang atu” dangkhidangnangjüng!

Mosa-nü yocho, “Nühnü tsingdhingcho kyo Ihnü nguchinung ko hütsüde ihrü Tsingrang Abüdongba kyo tu tsingrang mühlepü nühnü müdhenung. 11Nüh, nü pohki thsazirüti ko nü müyurü kheng tenü zanung ko Nile yongkhi la chah khu apalang mülinung.” 12Hütsüpü Mosa e Aron nyühnü yangthsaba tenü zacho ko Mosa-nü Abüdongba te kheng mülisohnung dangkhingdangnangcho. 13Abüdongba-nü Mosa-nü kihchicho laling kuh la, kekhüm la, ko akungaselih la kheng tsü sücho. 14Ijiprünü hütsü abhüm abhüm wohbülungcho ko limih apüm asüh xümcho. 15Khode yangthsabanü kheng sükhangko pü müdhe alasih kyahshangcho, Abüdongba-nü yocho kyo ahongzi kangcho, ko Mosa e Aron nyüh te mühnyicho.

Bhifü

16 Abüdongba-nü Mosa te yocho, “Aron te ajanü alih la xüpm pü young, ko Ijip lih apüm la asongsong tsünü Bhifü kangnung.” 17Achotsü Aron-nü ajanü alih la xüpcho, ko alih asongsong apüm tsünü bhifü kangcho ko nyitsarü ko kanglungrü apüm lüpticho. 18Amongrütinü arüh ziinü bhifü chürosohnung müküpcho, ta mükohcho. Apümlang bhifü chürocho, 19#Luk 11.20ko amongrütinü mii yangthsaba te yocho, “Tsingrangba-nü hi nguchiko!” Ta yangthsaba tsü ahongzi Abüdongba-nü yocho kyo, Mosa e Aron te mühnyicho.

Sümüza

20 Abüdongba-nü Mosa te yocho, “Atunyang mütoh, yangthsaba yongkhilang wüchi yade wü abi shirüng, ko abi te Abüdongba-nü hita yorepü young, ‘Ih mübünung shulüm I nyitsarü wüsohng. 21Nühnü arüh müwüsohkhang, nü chah, nü thsazirüti chah ko nü müyurüti chah Ihnü sümüza mütheh khingchinung. Ijiprü kuh ko alih apüm sümüzanü jengnung. 22Ta I nyitsarü liba Goshen lih lalü sümüza mümüthehnung Ihnü pathsa yohpünung. Hiba lih la Abüdongba-nü nguchile pü nührünü müdhesohnung Ihnü hi nguchinung. 23Ihnü I nyitsarü ko nü nyitsarü kahla changcheh kangsohnung. Thsayahiya hi atu tikehnung.’” 24Abüdongba-nü yangthsaba kuh la ko abi thsazirü kuh la sümüza atii atii müthehcho; Ijip lih apüm sümüzanü thsangnyangjücho.

25Hütsüde yangthsabanü Mosa e Aron nyüh dsinü yocho, “Wüng, nührü Tsingrang khyang kangmübü tsü hiba lih la jüng.”

26Mosa-nü lalingcho, “Hütsüta nguchinung athsalang mah; tunüo ihrünü Abüdongba ihrü Tsingrang khyang kangmübüba tsünü Ijiprü shulüm athrünyinung lile. Arühnü thrünyiba tu liro, hütsüri arüh bete ihrünü kangmübü bichi ngusohde, arühnü ihrü mümüpsehnung ang? 27Hütsünü, abinü ihrü khyang yuzengjücho kyo, Abüdongba ihrü Tsingrang khyang kangmübü jünung ihrünü lipilih lang tsü nyümong asang tseh wübae.”

28Yangthsangbanü yocho, “Abüdongba Tsingrang khyang kangmübü jünung, nührü dunü ashu mütsikhang, Ihnü nührü wüsohnung. I nengdang dangkhidangnangjüng.”

29Mosa-nü lalingcho, “Ih wüying, Abüdongba te atunü sümüzatinü nü thsazirüti ko nü nyitsarüti pehjüsohng pü dangkhidangnang jünung. Ta nühnü du ihrü kihyochü adesü müyurüti Abüdongba khyang kangmübü jünung wünung lanü tüyati.”

30Mosa-nü Farao tenü zacho ko Abüdongba te dangkhidangnangcho, 31ko Mosa-nü kihchicho kyo Abüdongba-nü nguchicho. Sümüza tsünü yangthsaba, abi thsazirüti ko abi müyurü pehjü khüdusü münying tsikhangcho. 32Ta adesü yangthsaba tsü ahongzi kangcho, ko müyurü tsü müwüsohcho.

Currently Selected:

NÜCHEHCHO 8: SANGBSI

Highlight

Copy