NÜCHEHCHO 2

Mosa Surocho

1Hiba shikhe Levi hung lanü adhrerü khüdunü arühbürü hung lanü khingkurü khüdu khyücho, 2#R. Ngu 7.20; Ibr 11.23ko abükyünü adhrerü khüdu nümüsucho. Khode abükyünü akhunga tsü tsara ngucho, abükyünü abi choo asang rang yohpücho. 3Ta khode abükyünü adelü abi rang müyohpüchehcho, abükyünü thohnü kyahcho loh khüdu hirocho ko kih müzüdusohnung münatipü ko akhunga tsü hütsüla yohpü kihbekhümla yohpücho. 4Hütsüpü akhunga afü tsü abi chah tu tikehnangpü khü ashulanü chehdhing yacho.

5Farao tsulatpü yongkhi la tsü mütsahnung zürode akulilarüti yongkhi bekhümla rachicho. Dhrongyengnü thoh yola tsü abükyünü loh khüdu ngunü hütsü throronung kulilarü khüdu müthehcho. 6Abükyünü hütsü khangthrucho ko adhrezarü khüdu ngucho. Akhunga tsünü tracho ko abükyünü abi müi lümcho. Abükyünü yocho, “Hi Ibrirü tsurü khüdue.”

7Hütsüde afü tsünü abükyü te tsingdhingcho, “Hiba akhunga xükümnung Ihnü wü Ibri-larü khüdu norojü o?”

8Abükyünü yocho, “He, norojüng.” Achotsü lazatpü tsünü wü akhunga apu atpa tsü norojücho. 9Yangthsaba tsulatpü tsünü khingkutpü te yocho, “Akhunga hi khyüng ko I khyang rükuchehjüng ko Ihnü nü khyang angang jünung.” Hütsüta abükyünü akhunga tsü khyo rükuchehjücho. 10#R. Ngu 7.21Akhanglang, khode akhunga tsü lümjingcho, abükyünü abi nowü yangthsaba tsulatpü khyang jücho, ko abükyünü atsurükhung kangsohcho. Abükyü lüm la yocho, “Ihnü kih lanü abi throchehcho, hütsüeko aneng Mosa dsijünung.”

Mosa Midian lang Rang Tsicho

11 # R. Ngu 7.23-28 Khode Mosa dhrezacho, abinü anyitsarü Ibrirü xodhingnung wücho ko arüh khingchi nguchisohcho abinü ngucho. Ijiprü khüdunü anyitsarü Ibrirü khüdu mii müpsehya abinü ngucho.#Ibr 11.24 12Abinü dhingmükangcho ko sünüsü müngucho müdhe, abinü Ijip-ba tsü müpseh lipilih la wohtipehcho. 13Nyümong khüusü abi thali wüde Ibrirü nyüh anyüh müptaya ngucho. Abinü amüthsalangba te tsü yocho, “Tuepü abürü Ibrirü lahro?”

14Nyitsarüba tsünü yocho, “Sünü nüh ihrü michah yangthsarü ko yukharü kangsohcho? Nühnü Ijip-ba müpsehcho kyo Ih mii müpsehnyürü mah-o?” Hütsükolü Mosa tsü dronü alüm la yorü, “Ihnü nguchibasü bürünü müdheko.” 15Khode Farao-nü atikehcho tsü yuchicho, abinü Mosa müpsehnung müküpcho, ta Mosa-nü Midian lang alinung rang tsipehcho.

16 # R. Ngu 7.29; Ibr 11.27 Nyümong khüdu Mosa kihkong khüdu te pümde, Media la bebürü Jethro tsularüti arüh dhünyeh, kih khanung ko aurü san ko miza khyang tihnung akongla kih tungyohnung rocho. 17Ta san nyahrü khürünü Jethro tsulatpürü iipehcho. Achotsü Mosa-nü wü arüh khümcho arüh kanglungrü khyang kih tihcho. 18Arüh au yanglang thali rode, abinü tsingdhingcho, “Chünyelü tuepü hitoi mütoh lungro?”

19Arühnü yocho, “Ijiprü khüdunü san nyahrü khehlanü ihrü khümchopü, adesü ihrü khyang kih khajüpü ihrü kanglungrü khyangsü kih kha tihchoe.”

20Abinü arüh te tsingdhingcho, “Khang abi khülo? Tuepü abi hütsüla pehjü rocho? Wüng ko abi dsiro Ihsa yola tsuyongsohng.”

21Hütsüta Mosa-nü hütsüla linung nyengchocho ko Jethro-nü atsulatpü Zippora te kukangjücho. 22Abükyünü abi khyang azarü khüdu nümüsujücho ko Mosa-nü alüm la, “Ih hiba lih la shirü khüdue, hütsüeko Ihnü aneng Gershom” pü dsijünung.

23Kang rüm-o tsipü Farao yangthsaba sücho, ta hiba bekhyah chii Israelrü ayurü surola rühchi atrorü mükhyah licho. Arüh züdecho Tsingrangba chii küducho, 24#Lip 15.13-14ko abinü arüh rühchicho yuchicho ko Abraham, Isak ko Jakob te abi azengtacho lümchehcho. 25Abinü Israelrü ayurü suro ngucho ko arüh shulüm dhsa lümcho.

Currently Selected:

NÜCHEHCHO 2: SANGBSI

Highlight

Copy