NÜCHEHCHO 1
1
Ijip la Israelrü Sehchicho
1 #
Lip 46.8-27
Jakob tsurüti abi yola Ijip lang arüh kukhi zeh würüti tsü: 2Reuben, Simeon, Levi, Juda, 3Isakar, Zebulun, Benjamin, 4Dan, Naftali, Gad ko Asher. 5Jakob chahnü trahchocho ajowürü atümungnü arüh nyühre thsacho. Abi tsurü Josef tsülü Ijip la lijungcho. 6Lilinü Josef, amungrü ko hütsüba shangla lirüti sükhangpehcho, 7#R. Ngu 7.17-19ta arüh chahnü trahchocho Israelrü khütango kangcho ko arüh mükhilong ko rezeh sucheh Ijip lih tsü arühnü jengcho.
8 #
R. Ngu 7.18
Hütsüde Josef mümüdheba yangthsarü khüdu Ijip la yangthsaba kangcho. 9Abinü müyurü te yocho, “Israelrü hiri mükhilong ko rezeh suchehba hi Ihsa nengdang dhsürü lile. 10#R. Ngu 7.19Khata chürokhang arühnü Ihsa rorüh lahpi zeh Ihsa te khatanung ko tsipehnung. Arüh adrong mükangsohnung lang khürü yangchibae.” 11Hütsünü Ijiprünü arüh khingchi nguchisohnung arüh michah anüchirü yohpücho. Israelrünü Farao yangthsaba khyang Pithom ko Rameses yangditi shih kang külüpjücho. 12Ta Ijiprünü Israelrü alaa sehchili, arüh alaa adronguba kang yanglih jeng sohjengcho. 13Ijiprünü Israelrü drüchonü alaa du arüh khyang ayurü kangsoh arüh akang mütsa bichicho. 14Arühnü arüh tsü kuh thsabala ko luh la nguchisohcho ko müchomang arüh bichicho.
15Hütsüpü yangthsabanü Ibri-larü zatbüde trorü Shifra ko Pua nyüh te yocho. 16“Khode Ibri-larünü azarü nümüsunang, akhunga tsü adhrerü thsakhang müpsehng ko khingkurü thsakhang tümüpseh.” 17Ta atrorü tsünü Tsingrangba drüchonü yangthsaba yu tsü mühnyicho ko adhrerü suronye mümüpsehcho. 18Achotsü yangthsabanü khingkunyü tsü dsinü yocho, “Tuepü nührünü hita nguchiro, tuepü azarü tsü mümüpsehro?”
19Anyünü yocho, “Ibri-larü hi Ijip-larü roh-i mah; arühnü khütang müla surore, ko ihjü wü müchie suropehpü lire.” 20Ko atrorü khingkunyü tsünü Tsingrangba drüchonü abinü arüh müi arüh kukhi tsa yohpüjücho. 21Hütsüta Israelrü tsü mütozah sucheh ko rezeh kangcho. 22#R. Ngu 7.19Achangkathsa Farao-nü müyurüti khyang yuzengjücho “Ibrirü adhrerü surocho atümung Nile Yongkhi la müyehchüng, ta khingkurülü lisohng.”
Currently Selected:
NÜCHEHCHO 1: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
