NÜCHEHCHO 3

Tsingrangba-nü Mosa Dsicho

1Nyümong khüdu Mosa-nü Media la bebüba, aku Jethro santi nyah lide, abinü san atii tsü lipilih khu nowücho ko Amüsa zong Sinai chii rocho. 2#R. Ngu 7.30-34Hütsüla Abüdongba-nü abi te singtrung khüdula mihmüle lanü chüro shirütacho. Mosa-nü singtrungla mihmüle ngucho ta hütsü mütahkehcho. 3Abinü lümcho, “Hilü anyekanunge. Tuepü singtrung chah tsü mütahkehro? Ihnü shündhün wü dhingnung.”

4Khode Abüdongba-nü Mosa tsü shündhün ro ngucho, singtrungla tsünü abi dsi yocho, “Mosa! Mosa!”

Abinü lalingcho, “Ih hila lile.”

5Tsingrangba-nü yocho, “Shündhünra türo. Nü jingkhüm khyüchehng, tunüo nüh yaba lih müdüm tsü Amüsa lile. 6Ih nü jümürü Tsingrang lile. Abraham, Isak ko Jakob Tsingrang.” Hütsüde Mosa-nü aromih hapticho, tunüo abinü Tsingrangba romih chah dhingkehnung drücho.

7Hütsüpü Abüdongba-nü yocho, “I nyitsarü Ijip la khüta mükhimücho bichiro hütsü Ihnü nguko; arüh sehchirü khehlanü khümchoungpü züdecho Ihnü yuchiko. Arüh adhsa apüm Ihnü müdhele, 8hütsünü Ijiprü khehlanü arüh khümchonung ko Ijip lih lanü arüh nücheh alih asu nyikih ko thsakukih pohyaba lih, ade Kanan-rü, Hit-rü, Amor-rü, Periz-rü, Hiv-rü ko Jebus-rü liyaba lih yang nowünung Ih jürocho. 9Ajüje I nyitsarünü züdecho Ihnü yuchiko ko Ijiprünü sehchicho Ihnü nguko. 10Ade Ihnü Ijip yangthsaba yang abi lih lanü I nyitsarü nüchehnung nüh müthehre.”

11Ta Mosa-nü Tsingrangba te yocho, “Farao yanglang wü Ijip lanü Israelrü nüchehnungthsa Ih süo?”

12Tsingrangba-nü lalingcho, “Ih nüte zeh linung ko khode nühnü Ijip lanü nyitsarüti nüchehnung ronang, hiba zong chah nührünü Ih mübünung. Ko Ihnü nüh müthehcho yuzi hütsü thsanung.”

13 # Nüch 6.2-3 Ta Mosa-nü yocho, “Khode Ihnü Israelrü yanglang wü arüh te, nührü jümürü Tsingrang-nü Ih nührü yang müthehchoepü yonang, arühnü Ite, ‘Abi neng süo’ pü tsingdhingnung. Hütsüde Ihnü arüh te tu yonung?”

14 # Mis 1.4, 8 Tsingrangba-nü yocho, “Ih tsü Ih.”#3.14: IH TSÜ IH LILE: Mahkhang, IH SÜNANG HÜTSÜ IH THSANUNG: Israelrünü Tsingrangba anengnü khoh dsinung tsü khütang adrünung, ko mükoh dsicho. (IH tsü ‘YAHWEH’ lile) Hütsüeko, ‘YAHWEH’ pü dsinung mülih ‘IH’ pü bichicho. Ibri yula YAHWEH pü bichi liba apüm la thrahtse adidinü ABÜDONGBA pü thsamülajüre. Apa la ‘Jehova’ püsü bichicho ngunung. Arüh te nühnü hita young: Ih ko dsiba tsünü Ih nührü yanglang müthehcho! 15Israelrü te, Abüdongba, Ih, arüh jümürü Tsingrang, Abraham, Isak ko Jakob Tsingrang-nü nüh arüh yanglang müthehchoepü young. Hiba hi lede I neng linung; aronung shangti nüsü Ite hita du dsinung. 16Wüng ko Israelrü azirüti müjang dsimükhong ko arüh te Abüdongba, Ih arüh jümürü Tsingrang, Abraham, Isak ko Jakob Tsingrang-nü nüte chüro shirükopü young. Arüh yanglang Ih ro lile ko arüh chah Ijiprünü tu nguchiro hütsü ngukopü young. 17Ihnü arüh aroto suro Ijip lanü nyikih ko thsakukih pohyaba, ade Kanan-rü, Hit-rü, Amor-rü Periz-rü, Hiv-rü ko Jebus-rü liyaba lih yang nowünung dhrongchehko pü young.

18“Nühnü tu yonang Israel zirütinü hütsü nyinung. Hütsüpü azirüti zeh Farao yanglang wü abi te young, ‘Abüdongba, Ibrirü Tsingrang-nü Ihrü te misha ngusohko. Ade lipilih lang wü Ihrü Tsingrang, Abüdongba, khyang kangmübü jünung shulüm Ihrü khyang nyümong asang mülajüng.’ 19Khingnü müthsakhang, Farao-nü nührü mütsisohnungepü Ihnü müdhele. 20Ta Ihnü I tase bichi ko thsayahiya nguchi Ijiprü khingchinung. Hütsüpü du abinü nührü tsisohnung.

21 # Nüch 12.35-36 “I nyitsarü tside arüh khehshü mütsisohnungthsa Ihnü Ijiprü khyang nührü jengreng drüsohnung. 22Israel-larü müipinü arüh kurümrü Ijip-larü yanglang wünung ko abükyü kuh la liba Ijip-larü masüte abükyü jengki, hon, taripi ko thsidi kohro chingnung. Hiri tsü Israelrünü arüh tsurü ko tsularüti khyang khyüsohnung, ko hütsüta arühnü Ijiprü kuthsi wohtsinung.”

Currently Selected:

NÜCHEHCHO 3: SANGBSI

Highlight

Copy