MARK 6

Nazarethlei Jisu Neyahpü

(Mt. 13:53–58; Lk. 4:16–30)

1Büpai hapa shing tuhtü jomei chingei lei, hatü nanglomthü büpa phei müei lei. 2Sabbath nyih büpai Sinagoglei nyuhhen pang, hatü büpai nyuhpü danpüthü peü yashan. Jomi, “Hapa shennyaki hathü meleipü danghahpa yo? Yashanyalepü douthü dükhen mü büpa kü menüng keipü kihikon shuohpa yo? Büpai mekeipü yashanyale douthü düknya? 3Hapayü Marylei cheha mistripa, Jakob, Joseph, #Büpa kü “Joses” sheiyao eehen. Judas hatü Simon hathülei chejei nevaipü je? Büpalei chenaü nyühathü jen mü nenyupü je?” shei etei. Jomi büpa nangkü huluh shuoh.

4Jisui jomphong kü, “Laophülei ching, jeihinaü hatü shem am mü lenei thibü hük dhüm neshiüi nenyunyih” shei e. 5Büpai tüngpüthü maani mon kü laki düktü meitükshuohpü mü lenei büpai halei yashanpü dou nedük. 6Jomi hingnelempü kü büpa yashan.

Anpünyi kü Kangpü

(Mt. 10:5–15; Lk. 9:1–6)

Hapheikü büpai shinpü chingthü kü nyuh-ei dai. 7Büpai anpünyi kü nyükei nyi nyi shomhen chongpang hatü jomphong kü mang laanghathü shak kü wong shuoh. 8Büpai jomei yendai kü lenshuoh hük yahpü mü lenei hahying, khoungha hatü lop nekohen ngeükhüam shuoh, 9shejao lathuh thuhhen hatü bhagthuh nyi nethuhhen eteke. 10Büpai jomphong kü, “Am üamei shemei ngoihenshang manglei thahshi halei nyutuh. 11Shing haneilei am mongongshi yen neyahjema hatü ammi epü kü nebangjema, am leidaishingkü jom khüpü denpü hük vaishi ammei la kübü kübhih kaongphongtuh” shei e.

12Hanangkü jom daiyei peü mong leptuh shei chongven. 13Jomi mang laanghathü longi changtük, tüngpüthü kü mainga-i phuei meihü.

Johan Baptükbü Dipü

(Mt. 14:1–12; Lk. 9:7–9)

14Shaang Herod ongpai ha jung dan; mehenangkü Jisulei men peüi nyingdai. Hanei ami, “Johan baptükbü yangei leiteke, hanangkü hapalei ngani büpa kü dou düknyu khih” shei e. 15Shejao hanei ami, “Hapayü Elijah khih” shei e, hatü lebüthüi, “Hapayü shongpü thibüthü hük keipü khih” shei e. 16Shejao mechem Herodi ha danpa, büpai, “Hapayü ngei sho showei jütükpü Johan yangei leipü khih” shei e.

17Mehenangkü Herodi Johan yephen shennyak shom, chenaü Philipei chenyüha Herodias nangkü büpa yepei shatü khoklatei tuh; mehenangkü Herodi pinnyü mü shem yemteke. 18Mehenangkü Johani Herod kü, “Nüngi anaülei nyüha yahhenü shahkung kü nejiüangpih” shei eshuohteke. 19Herodias-i büpa khüei ten deihshi nyu hatü jütükhüei deih, shejao nejüaok; 20mehenangkü Herodi Johan kü nyem; mehenangkü büpayü daülangpü hatü shennyakmei shei büpai nyingei nyu; hanangkü yangei tuh. Mechem büpai epü danhenshang büpa longi üathamateke, shejao büpai epü kü Herodi banghüteke.

21Shejao mechem Herodi büpa angpü nyih kü büpalei lakchongbüthü, veshan mübüthü hatü Galil kü mübüthü kü mo ühpa, bhüh yemhen hepak mei dang. 22Mechem Herodiaslei yiükha peiyei oei phaukteipa, pinnyüi Herod hatü peipü yenthü mongmeihü; hanangkü ongpai hapa nela kü, “Nüngi mehe nanya, ha yütuh, hatü ngei ha shuohhen” shei e. 23Büpai pinnyü touei vangei, “Nüngi mehe mehe yühen, ngei nüng kü shuohhen, ngelei ongching hükkei bhaoei vaijao shuohhen” shei e.

24Hanangkü nelanyüi chenyü touei heih-ei, “Ngei mehe yüshuohhenang?” shei phe. Pinnyüi, “Johan baptükbülei shangjing yütuh” shei e.

25Shülangi pinnyüi ongpa touei mokei heih-ei, “Ngei kü nüngi Johan baptükbülei shangjing shung hük kü shihtü yahshih” shei e. 26Ongpa longi mongmang, shejao büpai vangtükpü yenthü touei neshaihüpü nangkü pinnyü kü shan neleiaok. 27Shülangi ongpai yompü veshan hük kü Johanei shangjing dakei deikei shei shom. Büpa heih-ei khoklat leipü Johanei shangjing dakei, 28shung hük kü shihtü deiyei nelanyü kü shuoh. Hapheikü nelanyüi ha chenyü kü shuoh. 29Mechem Johanei nanglomthüi ha danpa, jomphong peiyei büpalei mahng yah-ei daiyei mahngchong hükei vüphong.

Haja Nga kü Ühyingpü

(Mt. 14:13–21; Lk. 9:10–17; Jn. 6:1–14)

30Phongshanthü Jisu shonei thaitü büpa kü jomi dükpü hatü nyuhpü peü büpa kü eteke. 31Büpai jomphong kü, “Amphong mon ngei mü vüngmakpü shing hükei daishah hatü maani nyiumeishah” shei e. Mehenangkü daipü leipü longi nyupü nangkü jomi hahyinghen dangkao hepak nedang. 32Hanangkü jomphong mon ai hük kü uotü vüngmakpü shing yemei dai.

33Shaang shennyak longshi shingi jomphong lüdaipü nyingei jila peü kübü la mü mokei peiyei jomphong shekü ngoidaikem. 34Büpa yungphaang ngoijajü khongnyü longpü hük büpai ee, hatü büpai jomphong kü shinshangei deih; mehenangkü jomphongü mi yombü neshiüpü mithü kei nyuteke, hatü büpai jomphong kü douthü longi nyuhhen chongpang. 35Vanghe shüdaiyaki büpalei nanglomthü peiyei büpa kü, “Hapayü phaüvüngchong khih, hatü shaangü longi pheidaiteke; 36jomi shonpü kah hatü chingthülei daiyei jomi lemhük payü shakei nyemhahnüng jom leitüktuh” shei e.

37Shejao büpai jomphong kü, “Ammi hathü kü hahhen lemhük payü shuohtuh” shei e. Jomi büpa kü, “Hamphong daiyei nangkuk haja nyilei lop yah-ei daiyei hahying shakei shuohhen je?” shei phe.

38Büpai jomphong kü, “Amphongei aan meshük nyüpüshang heih-ei veituh” shei e. Jomi ha dangei, “Aan pha nga, hatü nyah nyi nyüke” shei e.

39Hahepak kü büpai nanglakthü peü kü khong khong thüngkon shangkü uohen ngeükhüam shuoh. 40Hanangkü jomi kho hük hatü pinyipüan shei khong lingei uoteke. 41Aan pha nga, nyah nyi yah-ei vangsho philei veitü moihiman, hatü aan bhaoktü nanglakthü kü bhehen shingvaishi büpai nanglomthü kü shuoh; hatü büpai nyah nyi yah-ei jom peü kü han. 42Peüi hahtü mohmei; 43hatü jomi aan hatü nyah aopünyeipü phuohinu mühdow anpünyi maei thai. 44Hapa hahpü bhei-ie baha jom haja nga nyu.

Jisui Yung Shangkü Kampü

(Mt. 14:22–33; Jn. 6:15–21)

45Büpai khong yantüktü shülangi büpai nanglomthü ai kü uohütü büpa shekü Bethsaidalei yung homei deishih. 46Jomphong kü nyu-e shei etü büpa kahshangei phopnüng aong.

47Mechem om dhüpa, aiyü yung jiamei heihdaitü nyu, hatü büpa monha yungphaangei nyu. 48Vanglük nyong philei lükpü nangkü jomi longi wongshi ai yatpü ee; büpa dhom mü jomphong philei yung shangkü kamei heihjateke. Büpa jomphong touei heih. 49Shejao mechem jomi büpa yung shangkü kampü eepa, jomi hapayü laangha hük khih shei deih, hatü len; 50mehenangkü jom peüi büpa eetü nyem. Shejao lomi büpai jomphong mü shah etei hatü, “Mong yangtuh, hayü ngei hih; tenyem” shei e. 51Hapheikü büpai jomphong mü ai mongei shü hatü vanglük dohdai. Jomi longi yashan; 52mehenangkü jomi aan yah-ei haja nga ühyingpü meheang ha nyingei neaok; jomei mongi ha yah-ei neaoki mong vaanteke.

Gennesaretlei Jisui Tüngpü Meihüpü

(Mt. 14:34–36)

53Mechem jomi yung homei heihpa, jomphong Gennesaret kahmük ngoiyei halei ai shenphong. 54Mechem jomphong ai leipü vamjapa, nanglakthüi büpa nyingei, 55kahmük peü lemei jom mokteiyei büpa melemei nyu, halei tüngpüthü lüng kü lemshi paiyei pei. 56Chingthü, jilathü nevaijü kahthülei büpa melemei dai, jomi bhei leihshingeiyao tüngpüthü lemtü jomi büpalei ashakjung kü dangkao honghen hih shei khüm, hatü ha kü hongpü peüi meitükpü dang.

Currently Selected:

MARK 6: PHOMBSI

Highlight

Copy