MARK 5

Mang Laanghai Yeppü Jisui Meihüpü

(Mt. 8:28–34; Lk. 8:26–39)

1Jomi yungdang homei Gerasenes kahdokei heih. 2Mechem büpa ai mongeipü vamjapa, ngangahük kü mang laanghai yeppü shennyak hük mahngchong leipü vamei daijapü büpai pong. 3Büpa mahngchongei mon nyu; üpaiyao büpa nyiamvü shentao yepei netuh-aok; 4mehenangkü büpa düngei yepei shatü hatü nyiamvüi shenei tuhhamteke, shejao büpai nyiamvü phentük, shapü khih mü phenei tükhamteke, hatü üpa wong kohpaiyao büpa neneüaok. 5Nyihnüng yanüng ne-e-i mahngchong hatü kahshangthülei düngei lenei hatü yaongnah yah-ei vethah-ei nyu.

6Mechem büpai tailulei Jisu eepa, büpa mokei heih-ei büpa touei ammei khüm; 7hatü büpai üng mahshi lenei, “Nüngi ngei kü mehe dükphanüngang, Jisu, Chaipüba Kahvang Ha? Ngei Kahvang men kü khümnyeih, ngei kü teshüveipha” shei e. 8Mehenangkü büpai büpa kü, “Hapa shennyak leipü vamdaituh, nüng mang laangha” shei eteke. 9Hapheikü Jisui büpa kü, “Nüngei men üpaang?” shei phe. Büpai, “Ngelei menü Legion#Rom am veshan haja vok khong kü hapakei nyükteke. hih; mehenangkü ham longi nyüpeih” shei jangei e. 10Büpai hathü hapa kahmük kübü nechangtükhen büpa kü khümei e. 11Shaang shangching philei ook khong hük het hah-ei nyu; 12hatü mang laanghathüi büpa kü khümei, “Ham ookei shühen shomtuh” shei e. 13Hanangkü büpai mongshuoh hatü mang laanghathü vamei ookthü kü shü, hatü ookthü bhei-ie haja nyi hükshing yungching yungkung vakei vüei yungei langdaikem.

14Hapa ook yombü mokei leiyei chingnyü hatü kahmük peü kü baong. Hahepak kü shennyakthüi mehe vampa shei veinüng pei. 15Jomphong Jisu touei peishingkü mang laanghai yeppü hapa shennyak büm-ow yahtü bümei leiyei hatouei uoshi eeyei jom nyemteke. 16Üami ha ee, hathüi shennyakthü kü mang laanghai yeppü shennyak hatü ookthü kü mehe vampa, ha jung ejateke. 17Hahepak kü jomi Jisu kü jomei kahmük kübü lüdaishih shei khümei e. 18Büpa ai mongei shüdai-i nyushingkü ha mang laanghai yeppü shennyaki büpa mü daihen hih shei khümei e. 19Shejao Jisui nemong, hatü büpa kü, “Nüngei küphüthü touei shemei leituh, hatü Shembüpa i meshük thahshi nüng kü dükpa, hatü büpai nüng kü phahji hupa, ha jung etuh” shei e. 20Büpa leiyei Jisui meshük thahshi büpa kü dükpa ha Dekapolislei baonghen chongpang, hatü peüi thamateke.

Jairuslei Yiükha hatü Nyüyong Hük Meihüpü

(Mt. 9:18–26; Lk. 8:40–56)

21Mechem Jisu nyipabü ai kü uoei yungdang hükei heihpa, khongnyü longpü hük büpa shonei thai, hatü büpa yungei nyu. 22Hahepak kü Sinagog leipü mübü hük, Jairus shei menpü peiyei mechem büpai Jisu eepa, büpalei la tüngei khümei, 23büpa kü nedoh-i khümei, “Ngelei yiükha maanpü hük dihen mü nyüpeih. Pinnyü meiyei yanghen shingvaishi peiyei nüngei laki pinnyü kü hongshih” shei e. 24Hanangkü büpai büpa mü dai. Khongnyü longpü hük büpa phei mü, hatü büpa touei shüngteke.

25Shaang hatouei bong anpünyi iy yenei tüngpü nyüha hük nyu. 26Pinnyü meli nyingpüthü longi touei daiyei junghah hatü angpü peü damtük, shejao meipü nedangi nemeipüba lei. 27Pinnyüi Jisu jung danei khong chi kü büpa phei müei heih-ei büpalei ashakjung kü hong. 28Pinnyüi, “Ngei heih-ei büpalei ashakjung kü hongjema ngei meishasha” shei e. 29Pinnyüi honghinüng iy yenpü dohdai, hatü pinnyülei büm kübü din meidaiteke shei nying. 30Ngangahük kü büpa leipü wong daiteke shei nyingei Jisui khong chi kü yaakei leiyei, “Üpai ngelei ashak kü hongpa?” shei phe. 31Büpalei nanglomthüi büpa kü hajükpü khongnyü nüng touei hungtei hungteitü heihjü, “Ngei kü üpai hongpa shei mekei ekünya?” shei e.

32Üpai hongpa shei büpai peü lemei shinei vei. 33Shejao hapa nyühanyüi pinnyü kü mehe vampa, ha nyingei nyemei kheüyaki heih-ei büpa touei aümei shatü hapa shahhing peü büpa kü eteke. 34Jisui pinnyü kü, “Lamei, nüng hinglempai nüng meidaiteke; nyiushemmei kü leituh, hatü nüngei din meidaituh” shei e.

35Mechem büpai shah eyei nyupa, shennyak hanei Jairus amei shem leipü peiyei, “Anha didaiteke. Nyuhbü kü mehekei hajük tok shuohnya?” shei e. 36Shejao Jisui jomi epü kü nebangi hapa Sinagog mübü kü, “Tenyem, hing mon lemtuh” shei e. 37Büpai Peter, Jakob, hatü Jakobei chenaü Johan mü lenei üpayao büpa phei nemühah. 38Mechem jomphong Sinagoglei vanglem lembü Jairuslei shem ngoipa, büpai shennyakthü theppü hatü vaüpü-eepü eeteke. 39Mechem büpa mongei shüpa, büpai hathü kü, “Amphong mehekei vaüei-eeyei thepnya? Hapa naü dipü nevai, shejao shipü khih” shei e.

40Shejao jomi büpa kü nyishuoh. Büpai shennyakthü peü chingshelei ngaitüktü naüei chepa, chenyü hatü büpa mü nyupüthü mon mütü naü lempü shingei shü. 41Büpai pinnyülei lak kü düktü pinnyü kü, “Talitha kum” lappai, “Lamei, paotuh” shei e. 42Chemjalak kü pinnyü yaongei kamnüng chongpang (pinnyü nyübüh bong anpünyi nyuteke). Ha eeyei jomphong yashan. 43Büpai jomphong kü ha jung üpa kao tenyinghü shei ngeükhüam wong mü shuoh, hatü pinnyü kü hahhen lemhük shuohtuh shei e.

Currently Selected:

MARK 5: PHOMBSI

Highlight

Copy