LUK 4

Jisu kü Dokpü

(Mt. 4:1–11; Mk. 1:12–13)

1Jisu, Laangha Daülangpai maei Jordan leipü nyokei lei, hatü Laanghai büpa jahpanei müei dai. 2Halei büpa nyih pinyi kahshih-i büpa kü dok. Büpai hathü nyihyang kü meheyao nehah, hatü mechem hathü nyih peihpa, büpa aeiteke.

3Kahshih-i büpa kü, “Nüng Kahvang Ha vaijema, hapa yaong kü aan leihen eyeishuoh” shei e.

4Jisui, “Ha nyangei nyüke: Shennyaki aani mon yangnyu nenyunyih” shei jangei e.

5Hapheikü kahshih-i büpa müei an, hatü büpa kü kahdoknyü ongchingthü peü hutü, 6kahshih-i büpa kü, “Ngei nüng kü hathülei müknyinshekhang hatü wong peü shuohhen hih; mehenangkü hapayü ngei kü shuohpeih, hatü ngei hayü ngei mong hahpüba kü shuohhen. 7Nüngi ngei kü khümjema, ha peü nüngei vaihen” shei eteke.

8Jisui büpa kü, “Ha nyangei nyüke: Shembüpa, nüngei Kahvang kü mon khümtuh, hatü büpa mon chongphotuh” shei jangei e.

9Hapheikü kahshih-i Jerusalemei müei deiyei phopshem adokei müei antü büpa kü e, “Nüng Kahvang Ha vaijema, haleipü nüng nyingi laongtuh; 10mehenangkü ha nyangei nyüke:

‘Büpai nüng nangkü laophülei vangsho phongshan kü

nüng yomhen nangkü shahkung shuohhen,

11hatü nüngei la yaong kü neshouphen shingvaishi

jomi nüng jomei lakei yeplanghen’ ” shei e.

12Jisui büpa kü, “Lai-i ha enyüke: ‘Nüngi Shembüpa, nüngei Kahvang kü mong tedok’ ” shei jangei e. 13Mechem kahshih-i lemphü dokei tempa, büpai büpa kansho hük shingvaishi tuhphong.

Galilei Jisui Dousho Pangpü

(Mt. 4:12–17; Mk. 1:14–15)

14Hapheikü Jisui Laangha Daülangpai maei Galilei nyokei lei, hatü büpa jung shinpü kahmük peü lemei yanei dai. 15Büpai jomei Sinagoglei nyuhhen pang, hatü peüi büpa vihteke.

Nazarethlei Jisu Neyahpü

(Mt. 13:53–58; Mk. 6:1–6)

16Mechem büpa longpü shing Nazarethlei büpa nyokei leipa, büpalei yemya keiha Sabbath nyih büpa Sinagoglei pei, 17hatü Isaiah thibüi nyangpü laidü büpa kü shuoh. Büpai hapa laidü apshingkü hapa nyangpü shing dangteke:

18“Shembüpalei Laangha ngei kü nyüpeih,

mehenangkü büpai ngei kü taopathü kü

shahjangmei kohen thiteiphuei jepeih.

Büpai ngei khoklatei nyupüthü kü bümei baonghen,

mükphüngpathü kü mük aphen,

hatü hanghipüthü bümei leihühen,

19 Shembüpai bampü bongthü baonghen ngei shompeih.”

20Hapheikü büpai hapa laidü dütü halei chongphopüthü kü shuohtüktü uo. Sinagoglei nyupüthü peüi büpa kü hüngei veiteke, 21hapheikü büpai jomphong kü ehen chongpangei, “Shinnyih amphongi danshi ha laihing dhaümteke” shei e. 22Peüi büpa jung meishi e, hatü büpalei ju kübü vampü shahmei kü thama. Jomi, “Hapayü Josephei ha nevaipü je?” shei e.

23Jisui jomphong kü, “Hingmei amphongi ha kandok shah ngei kü ehen, ‘Meli nobü, nüng nyingi meituh!’ Hatü amphongi, ‘Nüngi Kapernaumei dükpü jung hami danpükei nüngei chingeiyao hathü dükkütuh’ shei ehen” shei eteke.

24Büpai jomphong kü nedoh-i e, “Ngei am kü shahhing enyeih. Üpa thibüao laophülei chingei vihshi neyahnyih. 25Ngei hingmei enyeih, Elijahlei hepak kü Israel kü vaümnyü longi nyu; hahepak kü vangsho küplangtü vang nekei-i vangbong jem mü bhaoei nyu, hatü kahdok peü kü münghishaü nemei-i nyuteke; 26shejao Sidon kahmük Zarephath leipü vaümnyü touei shompü mü lenei Elijah üpa toueiyao neshom. 27Elisha thibü hepak kao Israel kü ngombüthü longi nyu, shejao Syria am Naaman mü lenei üpayao nemeihü.”

28Mechem jomi ha danpa, Sinagoglei nyupüthü peüi mongshih. 29Jom yaongei ching leipü büpa changtük, hatü jomei ching nyupü shangchingei deiyei yaongvak kü vütüknüng shei müei dai. 30Shejao büpa jomphong chi yamei lükei lüdai.

Mang Laangha Kohpü Shennyak

(Mk. 1:21–28)

31Galil kü chingnyü hük Kapernaumei büpa yiü, hatü Sabbath kü jom kü nyuh-ei nyu. 32Büpai nyuhpü kü jom thama; mehenangkü büpai wong kohshi nyuhteke. 33Sinagoglei shennyak hük mang laanghai yeptü nyu, hatü büpai ngeüwong anei, 34“Ah, Nazareth am Jisu, nüngi hamphong kü mehe dükhüpa? Nüngi hamphong mahtükhen peiküpü je? Nüng üpashang hami nyingnyeih– Kahvangei Daülangpü Hük!” shei e.

35Shejao Jisui büpa kü loh-ei, “Nenmü nyutuh, hatü büpa kübü vamdaituh” shei e. Hahepak kü kahshih-i jomphong touei büpa dowei shükphongtü büpa ma neyahhüi vamdai. 36Shennyakthü peüi thamaei hüki hük mü, “Hapa nyuhpüvenpeyü meheang? Wong hatü ngani büpai mang laangthü kü ngeükhüam shuohjü jom vamei lüdainyüke” shei etei, 37hatü büpa jung moidoi shinpü kemeilei shahjang yanei dai.

Simonei Shemei Meihüpü

(Mt. 8:14–17; Mk. 1:29–34)

38Büpai Sinagog tuhtü daiyei Simonei shemei shü. Shaang Simonei chenyühalei chenyü mihbheüi tüngei nyu, hatü jomi pinnyü nang Jisu kü ejateke. 39Hahepak kü büpai pinnyü touei yaongtü hapa mihbheü kü loh, hatü tüngpü meidai. Pinnyü hahepak kü-üng paoei jomphong kü nemnoei shuoh.

40Vanghe shüdaiyaki dinlem laolaoi tüngpü shennyakthü peü büpa touei müei dei, hatü büpai jom ieyei kü laki shüngei jom peü meihütük. 41Anyei vaishi shennyak longi kübü mang laanghathüi, “Nüngü Kahvang Ha” shei lenyaki vamei dai. Shejao büpai hathü kü loh, hatü shah ehen nehan; mehenangkü jomphongi büpayü Khrista#Messiah. shei nyingei nyu.

Jisui Sinagoglei Chongvenpü

(Mk. 1:35–39)

42Mechem vangngaipa, büpai vüngmakpü shing hükei dai. Nanglakthüi büpa yemei nyu, hatü mechem jomi büpa nyupü shingei peipa, jomi büpa yanei nedeishihhen khe. 43Shejao büpai jomphong kü, “Ngei lebü chingnyüthü kao hapa Kahvang ongching shahjangmei baonghen vongbong; mehenangkü ngeiyü hapa mükhong kü shompeih” shei e. 44Hanangkü büpai Judea#Lai haneilei Galil shei eehen. kübü Sinagogthülei nedoh-i shahjangmei baongteke.

Currently Selected:

LUK 4: PHOMBSI

Highlight

Copy