LUK 5

Jisui Shongpü Nanglom Nyükpü

(Mt. 4:18–22; Mk. 1:16–20)

1Nyih hük mechem Jisu Gennesaret Shemyungei yaongshi nyupa, büpa shinei khongnyü longpü hük Kahvang shah banghen pei. 2Büpai hapa shemyung yungkungei ai nyi leipü nyah yeppü am vamei jomei shang paüei ee. 3Büpai ai nyi khongkü Simonei ai kü uotü yungphaang leipü maani yanei hungshih shei büpai e. Hahepak kü büpa halei uotü khongnyü kü ai leipü nyuhteke. 4Mechem büpai shah eyei kempa, büpai Simon kü, “Yung chüpülei heihtuh, hatü shang sheptuh” shei e.

5Simoni, “Shembüpa, hamphong vangnyak shang shepei paümpeih shejao meheyao neyepangpih. Shejao nüngi epü nangkü ngei shang shepshahma” shei e. 6Mechem jomi shang sheppa, jomi nyah longi manpü nangkü shang shaakdaihen mü nyu. 7Hanangkü jomi lebü ai leipü küphüthü kü peiyei sheühshih shei e, hatü jomphong peiyei ai nyiphen kü nyah maei shihpü nangkü yungmongei hüngdaihen mü nyuteke.

8Mechem Simon Peteri ha eepa, büpai Jisulei la tüngei aümei shatü, “Ngei toueipü lüdaishih, Shembüpa, ngeiyü mang shennyak!” shei e. 9Mehenangkü büpa hatü büpa mü nyupüthü peü jomphongi yeppü nyah kü thama; 10hapa keiha Simon mü nyupü Zebedeelei ha Jakob hi Johan nyiyao nyuteke. Hapheikü Jisui Simon kü, “Nüng tenyem, shaang mü leitü nüng shennyak yeppü am leihühen” shei e. 11Mechem jomi yungphaangei ai müei leipa, jomi lemphü tuhphongtü büpa phei mü.

Jisui Ngombü Hük Meihüpü

(Mt. 8:1–4; Mk. 1:40–45)

12Mechem büpa chingnyü hükei nyupa, shennyak hük ngomma-i büm lüpei daitü pei. Mechem büpai Jisu eepa, büpai kahdokei dhe aümei shatü büpa kü, “Shembüpa, nüngi mongjema ngei meitükshih” shei khümei e.

13Jisui büpalei lak deiyei hapa shennyak kü düktü, “Ngei mongnyüpeih, nüng daüdaituh” shei e, hatü lak mü leihshi hapa ngomma meidai. 14Hapheikü Jisui büpa kü, “Üpa kao hapa jung te-e, shejao daiyei nüng nyingi ngongpa kü hueishuoh, hatü denpü hük vaishi nüng daüdaipü shing Mosai epükei moila shuohtuh” shei eteke. 15Shejao nyeinya büpa jung shahjang yanei dai, hanangkü büpai epü banghen hatü tüngpü meitükhahhen shingvaishi büpa touei pei. 16Shejao chengei Jisui vüngmakpü shingei daiyei phop.

Büm Bhaoei Didaipü Meihüpü

(Mt. 9:1–8; Mk. 2:1–12)

17Nyih hük büpa nyuh-ei nyushingkü Galil, Judea hatü Jerusalem leipü peipü Pharisee am hatü shahkung nyuhbüthü büpa yopailei uoshi nyu, hatü tüngpüthü meihühen ngan Shembüpa kü nyu. 18Shennyak hanei-i bümphi didaipü shennyak hük lüng kü lemtü paiyei Jisu touei lemhühen shem mongei shühen khe, 19shejao khong chi kü shühen lem nedangi jomphongi shem adokei aongtü khong chi kü Jisu touei adok yamtü büpa shanshihteke. 20Mechem büpai hathüi hinglempü eepa, büpai, “Mongjem, nüng kü nüngei mang tüktepih” shei e. 21Hahepak kü shahkung nyuhbüthü hatü Phariseethüi, “Kahvang eelaei epü hayü üpaang? Kahvang mü lenei üpai mang tükei aokhen?” shei phehen pang. 22Mechem jomi deihpü Jisui nyingpa, büpai jomphong kü, “Ammei mongei mehekei ammi hapakei deihnya? 23‘Nüngei mang tüktepih’ shei ehen yopü hi, ‘Yaongtuh hatü kamtuh’ shei ehen yopüba ang? 24Shejao hapai kahdoknyü kü Shennyak Ha kü mang tükhen wong nyüke shei ammi nyinghen” shei e. Büpai bümphi dipü shennyak kü, “Ngei nüng kü enyeih, nüng lüng paitü shemei leidaituh” shei e. 25Chemjalak kü jom touei büpa paoei yaong, hatü büpa lempü lüng paitü Kahvang men longei shemei lei. 26Peüi thamaei Kahvang men long. Jomphong nyempai maei, “Hamphongi shinnyih yashanbenüng dou eetepih” shei e.

Jisui Levi kü Nyükpü

(Mt. 9:9–13; Mk. 2:13–17)

27Hapheikü büpa daishingkü lat thaibü hük Levi shei mentü lat thaishingei uoshi ee, hatü büpai büpa kü, “Ngei phei mükei” shei e. 28Büpa yaongei lemphü tuhphongtü büpa phei mü.

29Hapheikü Levi-i büpalei shemei büpa shing mo longpü hük üh; halei lat thaibüthü khongnyü longpü hük mü lebüthü jomphong mü nükdülei uoshi nyu. 30Pharisee hatü shahkung nyuhbüthüi büpalei nanglomthü kü eelaei, “Mehekei amphongi lat thaibüthü hatü mangthü mü hahyingnya?” shei e. 31Jisui jomphong kü, “Meishi nyupüthü shingvaishi meli nobü napü neshiü, shejao tüngpüthü shingvaishi nadang; 32Ngeiyü daülangpüthü nevai, mangthü mong lephen nyüknüng peipeih” shei jangei e.

Shüaeiyunglehen Nang Phepü

(Mt. 9:14–17; Mk. 2:18–22)

33Hahepak kü jomi büpa kü, “Johanei nanglomthüao Pharisee amei nanglomthü kei chengei shüaeiyungleyei phopnyüke, shejao nüngei nanglomthü hah-ei yingei mon nyunyüke” shei e.

34Jisui jomphong kü, “Yiükyahpa jom mü nyupü thahshi yiükjing mo leipü yenthü nehah-i nyuhen je, vaila? 35Jomphong toueipü yiükyahpa yahlanghen nyih ngoikahen, shejüang jomphongao hathü nyih kü shüaeiyunglehen” shei e. 36Büpai shao jomphong kü shahlap hük e: “Üpaiyao ashak ja kübü shaakei ashak chang kü nethapnyih, hei nevaijema ja shaakei vamkahen, hatü ashak chang kü ja shihpai nekükahen. 37Üpaiyao phaishuw khoung chang kü yiüja neshihnyih; hei nevaijema phaishuw khoung bhaoei haleipü yiü yendainyeih, hatü phaishuw khoung mangdainyeih. 38Shejao yiüja yah-ei phaishuw khoung ja kü shihhen vongbong. 39Üpaiyao yiü chang yingpheikü yiü ja nenanyih, shejao ‘Yiü chang meipü khih’ shei enyeih.”

Currently Selected:

LUK 5: PHOMBSI

Highlight

Copy