LUK 20

Jisulei Wong kü Chengpü

(Mt. 21:23–27; Mk. 11:27–33)

1Nyih hük büpa phopshemei nanglakthü kü nyuh-ei shahjang meipü chongvenei nyushingkü ngongpathü hatü shahkung nyuhbüthü, hatü behethü peiyei, 2büpa kü, “Nüngi mepa wong homei hathü dou düknya? Nüng kü ha wong shuohpeyü üpaang ha ham kü eshih?” shei e.

3Jisui jomphong kü, “Ngeiyao amphong kü shah hük pheshah, hatü amphongiyao ngei kü ha eshih: 4Johani baptükpeyü vangsho leipü peipü hi hangku leipü vampa?” shei phe.

5Jom jom shah shükteiyei, “Jeni mehe ehenang? Jeni ‘Vangsho leipü’ shei eshuohjü büpai jen kü, ‘Shejema mehekei ammi büpa kü hingnelemnya?’ shei ephahen. 6Shejao jeni, ‘Hangku leipü’ shei ejü hatouei nyupü khongi jen kü yaongi shükphahen; mehehangkü jom peüi Johanü thibü shei nyingei nyüke” shei etei.

7Hanangkü jomphongi ha meleipü peipa nenying shei jangei e. 8Hahepak kü Jisui jomphong kü, “Ngeiyao mepa wongi hathü dou düknya ne-ephapih” shei e.

Kah Phuoei Lingpü Shahlap

(Mt. 21:33–46; Mk. 12:1–12)

9Büpai nanglakthü kü hapa shahlap ehen chongpang: Shennyak hüki nyalingngupai kah lingtü hapa kah kah phuoei lingpü am kü shuohphong, hatü hepak luangi nyuhen shingvaishi lebü kahmükei dai. 10Mechem dühü ngoipa, büpai kah phuopüthü touei kah kübü vampü jomei phaihan yahhen shingvaishi chongphobü shom, shejao kah phuoei lingpüthüi büpa kü üptü lakkong leishih. 11Büpai shao lebü chongphobü hük shom, shejao jomi büpa kao üptü veüshi ling hatü lakkong leishih. 12Shao-üng büpai jempabü shom; jomi büpa kü ma shahü hatü shüei shüktük.

13Hahepak kü kah shembüi, “Ngei mehe dükhenang? Ngei bampü ngelei hapeü shomshah; jomi büpa kü dhüm shuoh-aipih” shei e. 14Shejao mechem kah phuopüthüi büpa eepa, jomi ha jung etei. Jomi, “Mükjüp yahhenü büpa hih. Jeni büpa jütükshah, hatü hapa mükjüpü jenei vaidaihen” shei eteiteke. 15Hanangkü jomi kah haolei büpa shüei shüktü jütük.

“Shejema kah shembüi jomphong kü mehe linghenang? 16Büpa peiyei kah phuopüthü jütüktü hapa kah lebüthü kü shuohtükhen.” Mechem jomi ha danpa, “Hapakeiyü nevaiküpih!” shei e. 17Shejao büpai jomphong kü veitü, “Lai kü nyangei nyupü hapayü mehe lappüang?”

“Shem vepüthüi yaktükpü yaong

shemshouk kü shongnyü yaong leipeih.”

18“Üpai hapa yaong shangkü vühen, khih mü nihdaihen, hatü üpa kü hapa yaong vühenshang ngümtükhen” shei e.

19Mechem shahkung nyuhbüthü hatü ngongpathüi hapa shahlapü jomphong kü epü khih shei nyingpa, jomi büpa kü hapa hepak kü-üng lak shihhen yem, shejao jomi nanglakthü kü nyem.

Lat Shuohhen Nangkü Phepü

(Mt. 22:15–22; Mk. 12:13–17)

20Hanangkü jomi büpa kü mükhingshi vei, hatü hingshangpüthü keiha yawhdou shuohtü büpai epü shah kü mang yephen hatü jomi büpa governorlei wong kü lanei shuohhen gühshukpüthü shom. 21Hanangkü jomi büpa kü, “Nyuhbü, nüngi epü hatü nyuhpü jiüangke shei hami nyingnyüke, hatü nüngi üpa kao baong hanei nenonyu, shejao shahhing kü Kahvangei lem nyuhnyüke. 22Hami ongpa kü lat shuohhenü shahkungi mongpü hi nemongpa?” shei phe. 23Shejao Jisui jomei kon nyingei büpai jomphong kü, 24“Ngei kü poisa hük hushih. Hapa kü üpalei shangjing hatü men nyüke?” shei e. Jomphongi, “Ongpalei” shei e. 25“Shejema ongpa kü shuohhen jiüpü ongpa kü, hatü Kahvang kü shuohhen jiüpü Kahvang kü shuohtuh” shei e.

26Büpai epü shah kü nanglakthü touei jomi meheyao neyep-aok; büpalei shah kü jom thama hatü jek neshei.

Dipü Kübü Yangei Leipü Nang Phepü

(Mt. 22:23–33; Mk. 12:18–27)

27Hahepak kü yangei neleinyih shei epü Sadduke am hanei büpa touei peiyei, 28büpa kü, “Shennyak hük nyüha tuhtü hapeü netuhphongi didaijü büpalei cheihinaü hanei hapa nyüha mü shem yemhen, hatü didaipü shennyak shing hapeü nyuhühen shei Mosai ham kü nyangteke. 29Shaang cheihinaüthü jom nyet nyu; shongpübai nyüha hük mü shem yem, shejao hapeü netuh-i didai; 30hapheikü nyipabüi hatü 31jempabüi pinnyü mü shem yem, hatü hapa keiha jom peüi pinnyü mü shem yemtü hapeü netuhphongi didaikem. 32Shompülei hapa nyühaao didai. 33Shejema yangei leishingkü hapa nyühayü üpalei shembünyü vaihenang? Mehenangkü jom peüi pinnyü mü shem yemteke” shei phe.

34Jisui jomphong kü, “Hapa den kübü shennyakthüi shem yemnyeih hatü doi deishihnyeih. 35Shejao üamphong ngoikahen den kü yangei leipü kü hean yahhen shangei nyu, yangei leishingkü jom shem neyemhen, nevaijü doi nedeishihhen. 36Jom hajük kü nedihen; mehenangkü jomphongü vangsho phongshanthü kei nyuhen. Jomü yangei leipülei hapeüthü vaipü nangkü jomü Kahvangei hathü. 37Aw bahpü pünien kübü büshah homei Mosai dipü kübü yangei leinyeih shei denpü shuohnyüke; mehenangkü büpai Shembüpa kü, ‘Abraham Kahvang, Isak Kahvang, Jakob Kahvang’ shei enyüke. 38Shaang büpayü dipü amei Kahvang nevai; mehenangkü büpa kü peü yemmü nyüke” shei e. 39Hahepak kü shahkung nyühbüthü hanei ami, “Nüngi meishi eteke” shei e. 40Hajük kü jomi büpa kü shah pheteihen mong nelong.

Messiah Jung Phepü

(Mt. 22:41–46; Mk. 12:35–37)

41Hapheikü büpai jomphong kü, “Mekei etü jomphongi Messiahyü#Khrista Davidei ha shei eaoknya?” shei e. 42Mehenangkü Davidi louphü nyingi Menvih Kesho kü hapakei enyüke:

Shembüpai ngelei Shembüpa kü,

43“Ngei nüngei vepa nüngei

la phangei mangtuh thahshi nüng ngelei lakdah philei uotuh” shei e.

44Davidi büpa kü Shembüpa shei nyük;

shejema mekei etü büpayü büpalei ha vaihenang? shei e.

Jisui Shahkung Nyuhbüthü Khüei Shahvüng

(Mt. 23:1–36; Mk. 12:38–40)

45Nanglakthü peüi danshi büpai nanglomthü kü, 46“Shahkung nyuhbüthü kü lituh; mehenangkü jomi bhagthuh lula thuhtü bheileih shing peülei mih-i selam shihhah-ei, Sinagog hatü mohitap kü meipü hatü dhüm kohpü uoshing kü uohünyüke. 47Jomi vaümnyüthülei shem bomei yahnyüke, hatü eehen shingvaishi luangi phopnyüke. Jomphong nyeinya nemeipü hanghi danghen” shei e.

Currently Selected:

LUK 20: PHOMBSI

Highlight

Copy