LUK 19

Jisu hatü Zakhaeus

1Jisu Jerikolei peitü homei dai. 2Halei Zakhaeus shei menpü shennyak hük nyu; büpayü lat thaibü longpü hatü shemmeipa nyu. 3Büpai Jisu-ü üpaang shei veihen khe, shejao khongnyü longi nyupü nangkü büpai ne-eeaok; mehenangkü büpayü shaohi-ang shohshi nyu. 4Hanangkü büpa she philei mokei heih-ei büpa kü veinüng shei bhukpü hükei aong; mehenangkü büpa hapa lemei peih-ei daihen nyuteke.

5Mechem Jisu hapa shing ngoijapa, büpai ngangei veitü büpa kü “Zakhaeus, shülangi shühkei; mehenangkü ngei nüngei shemei ngoihen hih” shei e. 6Hanangkü büpa shülangi shühteke, hatü büpa mongongshi yah. 7Ha eepüthü peüi nümnümei, “Büpayü mang shennyakei shemei yen vaihen ngoidaitih” shei etei.

8Zakhaeus yaongei Shembüpa kü, “Veituh, Shembüpa, ngelei mop hükkeishing taopathü kü shuohhen hih, hatü ngei hanei am kü lueilemei lemhük dangkao yah-ei nyujema, ngei shing ali nyeishi shemhen hih” shei e. 9Hahepak kü Jisui büpa kü, “Shinnyih hapa shemei yemleipü peiyei nyüke; mehenangkü büpaao Abrahamei ha. 10Mehenangkü Shennyak Hayü mahdaipüthü yemhen hatü yanghen peipeih” shei e.

Hon Lopthüi Shahlappü

(Mt. 25:14–30)

11Jomphong hapa kü bangei nyushingkü büpai nedoh-i shahlap hük e; mehenangkü büpa Jerusalem yopailei nyu, hatü Kahvang ongchingü shülangi peikahen vaaishang shei jomi deih. 12Hanangkü büpai, “Longhivang hük tailu kahdokei laophü shing ong hükei wong yah-ei leihen dai. 13Büpai büpalei chongphobüthü jom an nyükei hon lop anbaong shuohtü jomphong kü e, ‘Ngei mangleikei thahshi hapai bhei leih-ei chongkei.’ 14Shejao laophülei nanglaki büpa kü jiühit, hatü büpa pheikü phongmokbüthü shomei, ‘Hami hapa shennyak ham shak kü vanglem lemkahen nenanyih’ ” shei e.

15Mechem büpa ong vaitü nyokei leipa, büpai lop shuohpü chongphobüthü kü jomphong bhei leihpai mehe nanglei dangpa ha henghen büpai jomphong kü ngeükhüam shuoh.

16Shongpüba peiyei, “Shembüpa, nüngei lop shao lop an nyeinya dapeih” shei e.

17Büpalei shembüi “Meiteke, chongphobü meipü! Mehenangkü nüngi maanpü dou kü mong shuohpü nangkü nüngi chingnyü an kü veituh” shei e.

18Nyipabü peiyei, “Shembüpa, nüngei lopi shao nga nyeishi dapeih” shei e. 19Büpai büpa kü, “Nüngi chingnyü nga shak kü vanglem lemtuh” shei e.

20Hapheikü hükpa peiyei, “Shembüpa, nüngei lopü ha khih. Ngei ha ashaki meishi jümtü tuhpeih; 21mehenangkü ngei nüng kü nyemei deihpeih; mehenangkü nüngü shihmangpü shennyak; nüngi melei thaiyei netuh, haleipü yahnyüke, hatü nüngi mehe nehai, haleipü vetnyüke” shei eteke.

22Büpalei shembüi büpa kü, “Nüngei shah kü-üng ngei nüng shahphenhen, nüng nemeipü chongphobü! Nüngi ngeiyü shihmangpü shennyak; ngei melei nethai haleipü yahnyeih, hatü melei nehai, haleipü vetnyeih shei nyingei nyüke. 23Shejema mehekei nüngi ngelei lop lop jaoshingei netuhpa? Hapakei vailangmeyü ngei leijü lop kü lop bhüpü omshi danghen vaipeih” shei e.

24Hahepak kü büpai hatouei yaongpüthü kü, “Büpa leipü lop yah-ei lop an angpüba kü shuohtüktuh” shei e. 25Jomphongi büpa kü, “Shembüpa, büpaleiyü lop an tuhtü je” shei e.

26Büpai jangei, “Ngei am kü enyeih, üam ang, jom kü nyeishi shuohhen, shejao üpalei meheyao ne-ang, büpalei mehe nyu, hayao yahlanghen. 27Shejao ngelei vepathü üami jom shak kü ngei ong nevaihahhü, hathü hatouei deiyei ngei touei jütuh” shei eteke.

Jisui Aokpü Dangei Jerusalemei Yiüpü

(Mt. 21:1–14; Mk. 11:1–11; Jn. 12:12–19)

28Büpai ha epheikü jomphong shekü Jerusalemei aong. 29Büpai Olive Kahshang shei epü Bethphage hatü Bethany shangjing ngoi, hatü büpai nanglom nyi deishih-ei jiji kü, 30“Anji shelei eepü chingei heihtuh, hatü anji shüjajü üpaiyao chemao manguopü gadu cheha shenshi eehen hih. Hapa sheyei halei leikei. 31Hanei ami anji kü, ‘Ha mehekei shenya?’ shei ephüjü büpa kü, ‘Shembüpai ha nanyüke’ shei etuh” shei e.

32Yeihshi shompü nyi dai, hatü büpai jiji kü epükei heüteke. 33Jijinyi-i ha gadu sheyei nyushingkü hapalei shembüi jiji kü, “Mehekei anji-i gadu shenya?” shei phe. 34Jiji-i, “Shembüpai ha nanyüke” shei e. 35Hapheikü jijinyi-i ha Jisu touei müei lei, hatü gadu kü jomei ashak nyemtü hapa kü Jisu uohü. 36Büpa ha kü uoei daishingkü nanglakthüi lem kü jomei ashakviha nyemteke.

37Olive Kahshang lemei yiüpü lem ngoishingkü nanglom khongnyü kemei jomi eepü yashanyale shingvaishi mongongpü ngeüwong anei Kahvang men vihteke:

38“Shembüpalei men kü peipü ongpa moihimanpü!

Vangsholei chingmei, hatü shaopüba kü müknyinshekhang!”

39Khongnyü leipü Pharisee am hanei büpa kü, “Nyuhbü, nüngei nanglomthü kü dohtuh shei ngeükhüam shuohtuh” shei e. 40Büpai jangei, “Ngei am kü enyeih, hathü nendaijao yaongthüi lenkahen” shei e.

Jisui Jerusalem Nangkü Theppü

41Büpai Jerusalem ngoijü chingnyü eeyei ha nangkü thep, 42hatü, “Chingmei shingvaishi lingpü hapa nyih ammi dangkao nyinglang meyo– Shejao shaang hapayü ammei mük kübü jolangteke. 43Hingmei, ammei vepathüi kahdok shaokei bham linghen, hatü am kü shontü shing peü philei lünglei nemei-i khüamhen. 44Jomi am hatü ammei hapeüthü yepei kahdok kü hathühen, hatü jomi yaong hük shangkü hük dheanei netuhphonghen; mehenangkü Kahvang am touei peihen hepak ammi nenying” shei e.

Jisui Phopshem Daüpü

(Mt. 21:12–17; Mk. 11:15–19; Jn. 2:13–22)

45Hapheikü büpa phopshemei shüei halei dou yupüthü peü changtük; 46hatü büpai e:

“Ha nyangei nyüke,

‘Ngelei shemü phoppü shem shei nyükhen;

shejao ammi hayü gühpathülei dung leitükteke.’ ”

47Nyihjeih büpai phopshemei nyuh-ei nyu. Ngongpathü, shahkung nyuhbüthü, nanglak mübüthü peüi büpa jühen lem yemei nyu; 48shejao jomi dükaokhen mü meheyao nedang; mehenangkü nanglakthü peüi büpalei shah hükao ne-ami bangei nyuteke.

Currently Selected:

LUK 19: PHOMBSI

Highlight

Copy