LUK 21

Vaümnyü Hükei Moila

(Mk. 12:41–44)

1Büpai ngangei veishingkü shemmeithüi jomei moila lop shuohshingei shuoh-ei e; 2büpai taopü vaümnyü hükiyao poisa pha nyi shuoh-ei ee. 3Ngei am kü hingmei eshah, hapa taopü vaümnyüi amphong peü mao nyeishi shuohteke; 4mehenangkü jom peüi longi nyeishi angpü kübü shuohteke, shejao pinnyüi taoyaki pinnyüi hahhen nyupü peü shuohteke.

Jisui Phopshem Manghen Nang Epü

(Mt. 24:1–2; Mk. 13:1–2)

5Phopshem kü mekei nethe meipü yaongthü shihpa, hatü Kahvang kü shuohpü thinthothü jung büpalei nanglomthü hanei eteiyei nyu. Shejao Jisui, 6“Ammi hatouei mehe eenya, hathü yaong hük shangkü hük nenyuhen nyihthü ngoikahen; peü noei yaktükkemhen” shei e.

Shangpong hatü Shüveidoidei

(Mt. 24:3–14; Mk. 13:1–13)

7Jomi büpa kü, “Nyuhbü, ha mechem vamhen, hatü hapa vamhen nyangeihepü mehe nyuhen?” shei phe. 8Büpai e, “Am lemnyong kü nemühen lituh; mehenangkü longshi shing ngelei men kü, ‘Ngeiyü büpa hih’ hatü ‘Hepak ngoiteke’ shei eshi peikahen. Ammi jom phei tedai.”

9“Mechem ammi vehok hatü mophicheü vampü danhen, tenyem; mehenangkü hathü dou shong vamkahen, shejao hapheikü müshi dohpü nepeiküpih.”

10Nedoh-i büpai jomphong kü e, “Jati jat khüei, ongchingi ongching khüei yaonghen; 11Pedi vükpü nyuhen, hatü shing longilei shaühile, hatü chamhilem, hatü vangsholei nyembenüng douthü hatü nyangeihepü nyukahen.”

12“Shejao hathü peü vamshekü jomi amphong yepei shüveiphahen; jomi amphong Sinagoglei hatü khoklatei tuhhen, hatü ngelei men kü jomi am ongthü hatü governorthü touei müei deihen. 13Hapai am kü denpü shuohhen hepak mei shuohhen. 14Hanangkü ha kübü mekei yanghen shei shaang mebü mongshangei nenyuhen temei nyutuh; 15mehenangkü ammei vepa üamiyao am mü nekhangteihen nevaijü shah nedakteihen mü ngei am kü shahthü hatü kihikon shuohhen. 16Nyühipai hatü jeihinaüthüi, shem ami hatü küphüthüi dangkao amphong yuhahhen; hatü jomi amphong hanei jütükhen. 17Ngelei men kü peüi amphong kü jiühitphahen. 18Shejao ammei shangjing leipü shokuk hükao nemahdaipih. 19Am munenpai ammei laangha yanghen” shei e.

Jerusalem Manghen Yeih-ei Epü

(Mt. 24:15–21; Mk. 13:14–19)

20Mechem ammi Jerusalem shinei veshanthü eehenshang, hapa lavüngtoiyei tuhhen hepak ngoiteke shei nyingtuh. 21Hahepak kü Judealei nyupüthü kahshangei nyaidaituh, hatü chingei nyupüthüi ha tuhtü nyaidaituh, hatü chingnyü haolei nyupüthüi halei teshü. 22Mehenangkü hathüyü nyangei nyupü peü jiüei bhüh yempü nyih. 23Hathü nyih kü üam büm nekongi nyu, hatü naü kü kainaipüthü onyükei! Mehenangkü kahdoknyü shanghah longpü nyuhen, hatü hathü nanglak kü mongshihpü nyuhen. 24Jomphong yani mahhen, hatü jatthü peü touei wüpküpei müei daihen, hatü Jerusalemü Kung amei hepak mangngoi thahshi Kung ami la-i shouptükhen.

Shennyak Ha Yiüpü

(Mt. 24:29–31; Mk. 13:24–27)

25“Vanghe, lennyü hatü lithathü kü nyangeihepü nyuhen, hatü kahdoknyülei yungching yungmok ngüngpai jatthü pongnepaüi mongshang nyuhen. 26Shennyakthüi nyempai hatü kahdoknyü kü mehe vamnya, ha eeyei shomeiyinghen; mehenangkü vangsho nganthü jenhen. 27Hahepak kü jomi Shennyak Ha ngan hatü müknyinshekhang kü phum shang kü yiüpü eehen. 28Shaang mechem hathü dou vamhen chongpangkahen, yaongtuh, hatü ammei ngaüm ngangei aongtuh; mehenangkü am yemleihen yopailei peikünyüke.”

Adhapüi Shahlappü

(Mt. 24:32–35; Mk. 13:28–31)

29Hapheikü büpai jomphong kü shahlap hük e: “Adhapü hatü püthü peü kü veituh. 30Mechem hathü kü nien neenhenshang, ammi laophü nyingi shao yopailei ngoikünyüke shei nying. 31Hapa keiha mechem ammi hathü dou vamei eehenshang, Kahvang ongching yopailei nyüke shei nying. 32Hingmei ngei am kü enyeih, hathü dou peü mangvam thahshi hapa denhivan peih-ei nedaihen. 33Vangsho hatü kahdok peihdaihen, shejao ngelei shah nepeihdaihen.”

Mükpaonathahen Epü

34“Lishi nyutuh, hei nevaijema mop dameihupü, yiü chokpü hatü yangnyu mongshangi ammei mong vihhen, hatü hapa nyih nüngi nenyingpü kü taikoni keiha nüng manlanghen. 35Mehenangkü hapayü kahdok shak kü nyupüthü peü touei peikahen. 36Hepak peü kü am mükpaonathaei nyutuh, hatü vamkahen nyupü douthü kübü yanghen, hatü Shennyak Ha touei yaongaokhen mü phopei nyutuh.”

37Nyihjeih büpai phopshemei nyuh-ei nyu, hatü yanüng büpa Olive Kahshang shei epülei aongei paümteke, 38hatü shennyak peüi büpai phopshemei nyuhpü banghen dhomi lomi paohamteke.

Currently Selected:

LUK 21: PHOMBSI

Highlight

Copy