LUK 13

Mong Leptuh Nevaijü Mahhen

1Shaang hatouei hapa hepak kü nyupü hanei ami Jisu kü Galil amei iy Pilati jakpü moila kü vukpü jung ejateke. 2Jisui jomphong kü, “Hathü Galil ami hapakei ponghahpü nangkü lebü Galil am mü jomphong nyeinya mangthü shei ammi deihnyu je? 3Ngei am kü enyeih, nevai! Shejao amphong mong nelepjema ammao hapakei mahhen. 4Nevaijü Siloam shangdü laamshingkü mahpü jom anpüshetü Jerusalemei nyupü lebüthü mü nyeishi pungpükei ammi deihnyu je? 5Ngei am kü enyeih, nevai! Shejao amphong mong nelepjema amphongao hapakei mahhen” shei e.

6Hapheikü büpai ha shahlap eteke: “Shennyak hük nyalingngupai kahlei adhapü sheishi nyu, hatü büpai betjük yemei heih, shejao hükao nedang. 7Hanangkü büpai nyalingngupai kah lingbü kü, ‘Bong jem thahshi ngei hapa adhapü kübü betjük yemei peihampeih, shejao hükao nedangang. Ha agtüktuh! Mehekei kahdok shing yah-ei tuhhen?’ shei e. 8Shejao büpai, ‘Longpüba, shao bong hük shing tuhphongtuh; ngei ha shinei kahdok shoei kahcheü shih-ei tuhshah. 9Ngüvang hapai betjük jükküjema meitei, nejükjema agtükhen’ shei jangei eteke.”

Jisui Lakhopü Nyüha Hük Meihüpü

10Shaang büpa Sabbath kü Sinagog hükei nyuh-ei nyu. 11Hahepak kü bong anpüshet thahshi lakhohüpü mang laangha kohtü nyüha hük pei. Pinnyü kaokdaitü lanei neyangaoki nyu. 12Mechem Jisui pinnyü eepa, büpai pinnyü kü nyüktü, “Nyüha, nüng tüngpü kübü meitüknyeih” shei e. 13Mechem büpai pinnyü kü laki shüngpa, ngangahük kü pinnyü lanei yaong, hatü Kahvang menvih.

14Shejao Sinagog mübüi Jisui Sabbath nyih meihüpü nangkü mongshih-ei khongkü, “Dou dükhen nyih vok nyüpeih, hathü nyih kü peiyei meihütuh, shejao Sabbath nyih nevai-i” shei nedoh-i eteke.

15Shejao Shembüpai büpa kü, “Am akhümmong-ümthü! Am peüi Sabbath nyih yung yinghen shingvaishi khaok leipü mohoh hatü gadu sheyei nedeinyu je? 16Shejema hapa nyüha, Abrahamei yiükha, kahshih-i bong anpüshet thahshi shashi tuhpü kübü Sabbath nyih pinnyü laiyei nedeishihhen je?” shei e.

17Mechem büpai ha epa, büpa khüpüthü peü veü dang, shejao khongnyü kempai büpai dükpü yashanpü douthü kü mongong.

Haoyang Vangi Shahlappü

(Mt. 13:31–32; Mk. 4:30–32)

18Hanangkü büpai e, “Kahvang ongchingü mehe leangke? Hatü mehe kü hapa sheteiphenhen? 19Hapayü hanei ami haoyang vang yah-ei laophülei pemongei sheipü leshi nyüke; ha longei pü hük lei, hatü shangouthüi hapalei kaothü kü jep ling.”

Daw-i Shahlappü

(Mt. 13:33)

20Hapheikü shao büpai e, “Mepa kü ngei Kahvang ongching sheteiphenhenang? 21Hapayü nyüha hüki daw yah-ei atta aan#Greek kü satas jem lappai dok 22 hükshing vaihen. kü ha mangpaai thahshi vukpü leangke.”

Shaden Shawshippü

(Mt. 7:13–14, 21–23)

22Jisui jila hatü ching hük pheikü hük shei Jerusalemei leilem kü nyuh-ei dai. 23Hanei ami büpa kü, “Shembüpa, maani mon yemleihen je?” shei phe. Büpai jomphong kü jang, 24“Shaden shawshippülei shühen nyakeikentuh; mehenangkü longshi shing, ngei am kü enyeih, shününg khehen shejao ne-aokpih. 25Shem shembüi yaongei sha küplang pheikü amphong chingshelei yaongtü sha kü khungei, ‘Shembüpa, ham kao apshih’ shei ejü büpai am kü jangei, ‘Amphong meleipü peipa ngei nenying’ shei ephahen. 26Hahepak kü ammi, ‘Hami nüng mü hah-ei yingei nyuhampeih, hatü nüngi hamei chingyangshongei nyuhhampeih’ shei enüng chongpanghen. 27Shejao büpai, ‘Am meleipü peipa ngei nenying; ngei toueipü lüdaituh, amphong ten dükpüthü!’ shei ehen.”

28Mechem ammi Abraham, Isak hatü Jakob hatü thibüthü peü Kahvang ongchingei eehenshang halei theppü hatü bha vükpü nyuhen, hatü am noei shüktükhen. 29Hahepak kü nanglakthü heong heshü, apsha pehe leipü peiyei Kahvang ongching kü hahyinghen. 30Shaang üam shomnya, jom-ang shongpü vaihen, shaang üam shongpü vainya, jom-ang shompü vaihen.

Jerusalem kü Youngpü

(Mt. 23:37–39)

31Hahepak kü-üng Pharisee am hanei peiyei, “Haleipü lüdaituh; mehenangkü Herodi nüng jühenja” shei büpa kü e. 32Büpai jomphong kü, “Amphong daiyei ha mahu kü etuh, ‘Ngei shinnyih hatü ngenyih mang laangha changhen, hatü tüngpü meihühen, hatü nyih jempabü kü ngei ngelei dou temhen. 33Shejao shinnyih, ngenyih hatü hingnyih ngei leipü lemei nyuhen; mehenangkü thibü hük Jerusalem mü lenei lebü haolei jühen neaok’ ” shei eteke.

34“Oh Jerusalem, Jerusalem, thibüthü jüpü hatü halei shompüthü kü yaongi shükei jüpü chingnyü! Meshükpa ngei ounyüi ouhathü pinnyülei yang phangei thaiyei tuhpükei ammei hapeüthü thaiyei tuhhen kenpa, shejao ammi ha nemong! 35Veituh, ammei shem am kü lavüngtoiyei tuhphünyeih. Ngei am kü enyeih, ‘Shembüpalei men kü peipüba moihiman’ shei ehen hepak mangngoi thahshi ammi ngei ne-eepih.”

Currently Selected:

LUK 13: PHOMBSI

Highlight

Copy