LUK 14

Jisui Tüngpü Shennyak Hük Meihüpü

1Chem Jisui Pharisee am mübü hükei shemei Sabbath nyih hahyinghen dai, hatü jomi büpa kü mük shahshi veiyei nyu. 2Hatouei büpa shelei lakhila poukei tüngpü shennyak hük Jisu touei pei. 3Jisui Pharisee hatü shahkung nyuhbüthü kü, “Sabbath nyih shennyakthü tüngpü meihühen shahkungi mongpü vaila?” shei phe. 4Shejao jomphong jek neshei. Hanangkü Jisui büpa kü laki düktü meitük hatü leitük. 5Hahepak kü büpai jomphong kü, “Amphong khongkü naü hük nevaijü mohohbaong hük nyupü Sabbath nyih yungkukei vüei chongküjü ammi shüshülangi büpa tukei anüla?” shei phe, 6hatü jomi ha kü meheyao shahnyok neshuoh-aok.

Maanpü Leiyei Nenteiaokpü

7Peipü yenthüi dhüm kohpü meipü uoshing jeyei uopü eeyei büpai jomphong kü shahlap hük e. 8“Mechem hanei ami am kü yiükjing molei nyükphahenshang, dhüm kohpü uoshingei te-uo; üpai nying, am mao nyeinya longpü am mo shembüi nyükei nyuhen aokpeih, 9hatü anjiphen nyükpü mo shembü heih-ei nüng kü, ‘Nüng uopü uoshing hapa shennyak kü shuohtuh’ shei ephüjü nüng veüyaki yaongei daiyei phangpa uoshing kü uohen. 10Shejao mechem nüng kü nyükhenshang, daiyei peü mü phangpa uoshing kü uotuh, shejüang nüngei mo shembü peiyei büpai nüng kü, ‘Mongjem, uoshing shaopülei aongkei’ shei ejü nüng mü nükdülei uopüthü peü touei nüng dhüm kohshi uohen. 11Mehenangkü üami laophü nyingi longpü leinya, maanpü leidaihen, hatü üami laophü nyingi maanpü leinya, longpü leihen.”

12Büpai büpa kü nyükpüba kao eteke: “Mechem nüngi hahyinghen nyükhenshang, nüngi nüngei küphüthü, jeihinaüthü, shem am nevaijü shemmei chingyowthü kü tenyük. Nüngi hapakei nyükjema, jomiyao nüng kü hapakei nyükhen hatü jomi nüng kü ha shemphahen. 13Shejao mechem nüngi mo hük ühhen, taopathü, lakholana, hatü mükphüngpathü nyüktuh. 14Nüng moihimanhen; mehenangkü jomi nüng kü nyokei neshemphahen; mehenangkü daülangpüthü yangei leishingkü nüng kü ha shemphahen.”

Mo Longpü Hüki Shahlappü

(Mt. 22:1–10)

15Hahyinghen peipü yen hüki ha danei büpa kü, “Kahvang ongching kü hahyinghen moihiman!” shei e. 16Hahepak kü Jisui büpa kü, “Hanei ami hahyinghen longi nyük. 17Hahyinghen hepak kü büpai nyükpüthü touei büpalei chongphobü shomei, ‘Peikütuh, lemphü temteke’ shei ehen shom. 18Shejao jom peüi aihük mü keülem linghen pang. Shongpübai büpa kü, ‘Ngei kahdok hük shakpeih, ngei ha kü veinüng daihen khih; ngei kü mongtemang’ shei e. 19Lebü hüki, ‘Ngei mohohbaong jora nga shakpeih, ngei hathü dokei veihen daihen khih; ngei kü mongtemang’ shei e. 20Lebü hüki, ‘Ngei shaang-üng shem yemei tempeih, hanangkü ngei nepeiaok-ü’ shei e. 21Hanangkü chongphobü nyokei leiyei shembü kü ha shahom aokteke. Hahepak kü shem shembüi mongshih-ei büpa chongphobü kü, ‘Chingshong hatü lemnyüshong peüei daituh, hatü haleipü taopathü, lakkholano, mükphüngpathü müei leikei’ ” shei e.

22Chongphobüi, “Longpüba, nüngi mehe e, ha düktepih, hatü shao-üng shing aoei nyüke” shei e. 23Hahepak kü shembüi chongphobü kü, “Lemnyüshong peüei daiyei shennyakthü nyükei leikei, shejüang ngelei shem mahen khih. 24Mehenangkü ngei am kü enyeih, ngei thongpüthü üpaiyao ngei tempü hahying nehahhen” shei e.

Nanglom Hük Leihen Laphen

(Mt. 10:37–38)

25Shaang khongnyü longpü büpa mü daiyei nyu; hatü büpai yaakei leiyei jomphong kü e, 26“Üpai ngei touei peinya, büpai laophü pa, nyü, nyüha hapeüthü, jeihinaü nyahinaüthü, hatü laophülei yangnyu kü bampü kü nyeishi ngei kü nebamjema, büpa ngelei nanglak vainüng neaok. 27Üpai shophang paitü ngei phei nemü ngelei nanglom vainüng neaok. 28Amphong khongkü üpai shangdü vehen deihtü hapa temaoküla shei uotü bhei itei neveinya? 29Hei nevaijema, büpai chongnyiam lingtü ha netemaokjema, ha eepü peüi büpa kü yaüei, 30‘Hapa shennyakü vehen pangtü netemaokpü khih’ shei ehen.”

31Nevaijü üpa ongpai lebü ong hük mü hokhen daiyei büpa mü nyupü veshan haja ani büpa khüei peipü veshan haja kukha mü ne-aokhen hi aokhen shei uotü deih-ei neveinya? 32Büpai neaokükhih shei deihjema, mih tailei nyushi lembü shomei chingmei linghen phenyüke. 33Hanangkü ammi ammei mophimo kemei netuhphongjema amphong üpaiyao ngelei nanglom nelei-aokpih.

Hüm Homei Shahlap

(Mt. 5:13; Mk. 9:50)

34“Hüm meiangpeih, shejao ha hüm kü hapalei vüngpü mahdaijema, mekei etü ha vünghühen? 35Hayü kahcheü vaihenao nemei, nevaijü kahcheü shüngei tuhpü toueiyao nemei; hayü yaktükhen. Banghen dhaong nyupü peüi bangtuh!”

Currently Selected:

LUK 14: PHOMBSI

Highlight

Copy