LUK 12

Akhümmong-üm Khüei Epü

(Mt. 10:26–27)

1Mechem shennyak khongnyü longi hüki hük mü shoupteihen mü thaijapa, büpai shongei büpalei nanglomthü kü e, “Amphongi Pharisee amei daw kü lituh, hapa lappü, jomei akhümmong-üm. 2Shakei nevamhen mü meheyao küpei neshiü, hatü nenyinghen mü meheyao joshi neshiü. 3Hanangkü mehe ammi vangnyak kü e, ha vangngailei danhen, hatü mehe ammi sha küptü etei ha shem adokei lenhen.”

Üpa kü Nyemhen?

(Mt. 10:28–31)

4“Ngei am kü enyeih, ngelei mongjempathü, üami büm jütü ha mü lenei meheyao nedükaok, hathü kü tenyem. 5Shejao üpa kü nyemhen, ha ngei shahvüng shuohnyeih: Üpai jüpheikü molo awlei deishihhen wong nyu, büpa kü nyemtuh. Hih, ngei am kü enyeih, büpa kü nyemtuh! 6Poisa nyi kü ajekha nga neyunyu je? Shejao hathü khongkü hükao Kahvang touei betükei neshiü. 7Nüngei shangjing kübü sho kuk kemei ietüktü nyüke. Am tenyem; ajekha mao amphong-üng nyeinya douvang hih.”

8Shao ngei am kü enyeih, üami mih touei ngaihe-i ngei nyinghenshang, Shennyak Ha-iyao Kahvangei vangsho phongshanthü toumü büpa nyinghühen; 9shejao üami mih touei ngei nelahhen, büpa kao Kahvangei vangsho phongshanthü touei nelahhen, 10hatü üpai Shennyak Ha khüei shah ehenshang büpa kü mang tükhen, shejao üpai Laangha Daülangpü khüei ten ehenshang, mang netükhen. 11Mechem jomi am Sinagoglei, vanglem lembüthü hatü wong nopüthü touei müei deihenshang, am yanghen nangkü mekei ehen, mehe ehen shei mongteshang; 12mehenangkü hapa hepak kü-üng ammi mehe ehen Laangha Daülangpai nyuhphahen.

Nelipü Shemmeipai Shahlappü

13Khongnyü leipü hanei ami büpa kü, “Nyuhbü, ham shemei mükjüp ngei kü haneishuoh shei ojei kü etükkütuh” shei e.

14Shejao büpai büpa kü, “Mongjem, am shak kü shahphenbü, nevaijü shahphen ehen ngei üpai jeyei tuhpa?” shei e. 15Shao büpai jomphong kü, “Lituh! Maong nyeipü lemphü kübü am yanei nyutuh; mehenangkü mop changshi nyupai shennyak hük yangnyu nenyunyih” shei e.

16Hapheikü büpai jomphong kü shahlap hük e: “Shemmeipa hükei kahdok kü hahying changshi vam. 17Büpai laophü nyingi, ‘Ngei mehe dükhenang? Mehenangkü ngei hahying tuhhen shing neshiü’ shei deih. 18Hahepak kü büpai, ‘Ngei ngelei puong bentüktü longshi veshah, hatü halei ngei ngelei hahying hatü doumongthü tuhshah,’ 19hatü ngei ngelei laangha kü, ‘Laangha, bong longi shingvaishi mop changshi tuh-ei nyüke; nyiumeituh, hahtuh, yingtuh hatü mongongtuh’ ” shei e.

20Shejao Kahvangi büpa kü, “Nüng ngapa! sheya-üng nüngei yangnyu nüng kübü yülanghen. Hahepak kü nüngi laophü tempü üpa shing vaihen? 21Hanangkü laophü shing mop yowtü Kahvang touei shemmei neleipüthü hapakei nyuhen” shei e.

Mongteshang

(Mt. 6:25–34)

22Hapheikü Jisui büpalei nanglomthü kü e, “Hanangkü ngei am kü enyeih, ammi ammei yangnyu shingvaishi mehe hahhen nevaijü mehe owhen shei mongteshang. 23Mehenangkü yangnyu-ü hahying mü nyeipeih, hatü yembümü owhiai mü longpeih. 24Ashapathü kü veihümao; jomi nesheinyu nevaijü nevetnyu hatü jom puong neshiü, shejao Kahvangi jom haümnyeih. Amphongü hathü ouhathü mü meshük douvangang! 25Am mongshangpai shei ammei yangnyu hantet kü ghonda hükao üei aokhüla? 26Shejema ammi hapa keipü maanpü dou dangkao nedükaokjema ha mü lendaipü dou nangkü mehekei mongshangnya? 27Yangkheihchüthü mekei longnya deih-ei dangtuh: Jomi dou nedüknyu hatü vi nephawnyu, shejao ngei am kü enyeih, Solomoni büpalei müknyinshekhang peü kü hathü khongkü hük kei dangkao ow ne-owangpih. 28Shejao shinnyih nyutü ngenyih aw kü noei jaktükhen thüng kü Kahvangi hapakei owhüpü shejema, büpai meshük nyeishi am kü owhühen– amphong maani mon vaipüthü! 29Mehe hahhen, mehe yinghen shei deihpai mongshangei teshüktei. 30Mehenangkü hapayü kahdoknyü jatthüi hathü pheikü shükteinyüke, hatü ammei Pa-i ammi hathü napü nyingei nyüke. 31Haleimeyü büpalei ongching nangkü shükteituh, hatü hathü peü am kü yahphahen.”

32Am tenyem, miha khong; mehenangkü am kü ongching shuohhenü ammei Pa-i mongpü dou hih. 33Ammei mopthü yutü taopathü kü shuohtüktuh. Ammi laophü shing chang neleibenüng loptuw linghahtuh, gühpa yopailei nepei, thepi nehahpü vangsholei mechemao nemahnemenhen mop jaotuh. 34Mehenangkü melei nüngei mop nyu, halei nüngei mongao nyuhen.

Mükpaonathapü Chongphobü

35“Dou dükhen temtüktü nyutuh, awdük jakei tuhtuh. 36Amphongü laophülei shembü yiükjing mo leipü leiyei sha kü khunghinüng sha aphen danpükei nyutuh. 37Shembü nyokei leishingkü mükpaonathaei nyupü chongphobüthü moihiman; hingmei ngei am kü enyeih, büpai laophülei shüngshep wonghen, hatü jomphong ühyinghen uohühen, hatü büpai jomphong kü nemnoshuohhen. 38Büpa nyak jiam kü leijao, pibom kü leijao mükpaonathaei nyupü chongphobüthü moihiman.”

39“Shejao ha nyingtuh: shem shembüi paoh mepa hepak kü gühpa peihen nyinglang meyü büpai yomei nyuhah shepeih hatü shem nebenhühen vaipeih. 40Amphongao temei nyutuh; mehenangkü ammi nedeihpü hepak kü Shennyak Ha yiükahen.”

Hinglempü hatü Hingnelempü Chongphobü

(Mt. 24:45–51)

41“Shembüpa, nüngi hapa shahlapü hamphong shing enyu hi peü shing enya?” shei Peteri phe. 42Jisui e, “Laophülei shembüi büpalei aathü kü hepak jiüshi jomphong kü hanpü hahying shuohhen dousho hanhen mü hingshangpü hatü kon kohpü kheipa üpa nyüpa? 43Laophülei shembü leiyei ngoishingkü dou dükei nyupü chongphobü-ü moihiman. 44Hingmei ngei am kü enyeih, büpai hapa shennyak büpalei mop shangkü khei vaiyei tuhhen. 45Shejao hapa chongphobüi, ‘Ngelei shembü pheishi leikahen’ shei etü lebü chongphobüthü, nyüha, baha kü üpei pangjema, hatü hah-ei yingei yiüi chokjema, 46hapa chongphobülei shembü büpai nedeihpü kü, hatü nenyingpü hepak kü nyokei leihen, hatü büpa khih mü dehtükhen hatü hingnelempüthü mü tuhhen.”

47“Hapa chongphobüi büpalei shembüi mehe nanya, ha nyingtükphei kü büpai ha netem hatü napükei nedükjema, büpa kü longi üpei hanghihühen. 48Shejao chongphobü üpai shembüi napü nenying shejao bheihahhen mü lemhük dük, büpa kü maani bheihen. Üpa kü nyeishi shuoh, büpa leipü nyeishi yühen; hatü üpa kü maani nyeishi shuoh, büpa leipü longi nyeinya yühen.”

Jisui Baong Hanpü Vamhüpü

(Mt. 10:34–36)

49“Ngei kahdoknyü kü aw vamhühen peipeih, hatü ha bahdaitü nyulangmeyü meshük meihen shepa! 50Shejao ngei baptükpü hüki baptükhen nyüpeih, hatü ha mangpeih thahshi ngei meshük shangpongnya! 51Ngei kahdoknyülei chingmei koei peipeih shei ammi deihnyu je? Nevai, ngei am kü enyeih, hanteipanteipü! 52Shaang mü leitü shemong hük kü pa nga nyujü hüki hük khühen; jemi nyi khüei, hatü nyi-i jem khüei yaonghen. 53Jom hanteihen, pa-i ha khüei, hatü hapeüi pa khüei, nyüi yiükha khüei, hatü yiükhai nyü khüei, chenyei-i cheli khüei, cheli-i chenyei khüei yaonghen.”

Hepak Vangpan Nyinghen Nang

(Mt. 16:2–3)

54Büpai khongnyü kao eteke, “Mechem amphongi heshü philei phum vamei eehenshang, ammi lomi, ‘Vang keikahen khih’ shei enyüke, hatü hapakei vamnyüke. 55Shao mechem ammi apsha vanglük lükei eehen, ‘Longi shaamkahen khih’ shei enyüke, hatü hapakei vamnyüke. 56Am akhümmong-ümthü! Ammi kahdok hatü phumshang kü veiyei baihivang nemeihen meihen tetnyüke, shejao mekei etü hapa denhivan hepak netet-aoknya?”

Nüng mü Khüpüba mü Chingmei

(Mt. 5:25–26)

57Ammi laophü shing mehe jiü, ha shahphen mehekei neyahnya? 58Mechem nüngi khetpü mü shahphenbü touei daihen, nüngi lemei chingmei lingdaihen khetuh, hei nevaijema nüng shahphenbü touei deihen, hatü shahphenbüi nüng lakchongbü kü shuohhen, hatü büpai nüng khoklatei küphen. 59Ngei nüng kü enyeih, nüngei mopnyü mopha kemei bomei mangshuoh thahshi nüng halei küpshi nyuhen.

Currently Selected:

LUK 12: PHOMBSI

Highlight

Copy