KAHBHAO 31
31
Jakob Laban Toueipü Lüdaipü
1Shaang, “Jakobi opalei mop kemei yahlangteke, hatü shaang nyupü kemei opalei mop hih” shei Labanei chehathüi eteipü Jakobi dan. 2Shao Jakobi sheleipükei Labani büpa kü nenonyu shei veiaok. 3Hahepak kü Shembüpai Jakob kü, “Ambü ampalei kahdok hatü jeihinaüthü yemei leituh, hatü ngei nüng mü nyukahen” shei e. 4Hanangkü Jakobi büpalei mi nyupü kahlei Leah hi Rachel nyi kü shakei shei shah shomei nyük, 5hatü jiji kü, “Sheleipükei ampai ngei kü bamei nenonyu shei ngei nyingteke, shejao opalei Kahvang payü ngei mü nyüpeih. 6Ngelei wong kempai ampa chongphoei nyupü anji-i nyingei nyüke, 7shejao ampai ngei kü lueilem, hatü ngelei nanglat anpa thahshi yeiyatükpeih. Shejao büpai ngei kü lak shihhen Kahvangi nehanpeih” shei e. 8Mechem ampai, “Ampünyampü yemhathü kemei nüngei vaituh” shei epa, mithü kemei ow shahngshi mon shaanteke. 9Hapa keiha Kahvangi ampalei yemhimak moihiman yahlangtü ha ngei kü shuohpeih.
10Yemhimakthü li yahpü hepak kü ngei mangh hük manghpeih hatü ha kü ngei ngangei veishingkü yum chebaong li shuohpüthü kemei nyangshi amshi hatü shahngshi eepeih. 11Kahvangei phongshani mangh mü ngei kü, “Jakob” shei nyük, hatü ngei, “Ngei hammü nyüpeih” shei e. 12Büpai ngei kü, “Veituh, li shuohpü yumbaongthü kemei nyangpü, ampü hatü shahngpü yumbaongthü mon nyüke; mehenangkü Labani nüng kü dükpü ngei eeteke. 13Ngeiyü nüngei shemnyü thiteiphuei haongpü hatü ngei kü vangpüshuwpü hük lingpü shing Bethel leipü Kahvang. Shaang hapa kahdok tuhtü nüngei nyübüh kahdok yemei leituh” shei eteke.
14Hahepak kü Rachel hi Leah nyi-i, “Opalei shemei henji shing phaihan nevaijü mükjüp meheyao aoei nyüla? 15Büpai henji kü kung am kü kei noteke. Büpai henji yutük, hatü henji shing shuohpü lop kemei notükkem. 16Kahvangi opa leipü yahlangpü mop kemei jenei, hatü hapeüthülei; shaang Kahvangi nüng kü mehe e, hapakei düktuh” shei e.
17Hanangkü Jakobi nyühihathü kemei ut kü uohü, 18hatü yemhimak kemei mütü büpai Paddan-Aramei nyushi yowpü mop kemei kotü Kanan kahdokei chepa Isak yemei leihen layaong.
19Shaang Labani mimum japhen dai, hatü Racheli chepalei shem kahvang lajei güh-ei lüdai. 20Shao Jakobi Aram am Laban kü luteke, ha lappai, büpai büpa kü jom nyaidaihen jung ne-eshuoh. 21Hanangkü büpai angpü peü kotü Euphrates yung homei Gilead phaüshang kahmük lemei dai.
Labani Jakob She Yeipü
22Nyih jem pheikü Jakob nyaidaiteke shei Laban kü eshuohteke. 23Hanangkü büpa mü shem am mütü nyih nyet thahshi changei daiyei Gilead phaüshang kahmükei büpa phei thah. 24Shejao Aram am Laban touei yanüng mangh mü Kahvang yiüei büpa kü, “Jakob kü ten vaituh mei vaituh shah phahükao neehen lituh” shei e.
25Labani Jakob she yeiteke. Shaang Jakobi phaüshang kahmükei ashakshem ve, hatü Labani büpalei shem am mü Gilead phaüshang kahmükei baümtap ve. 26Labani Jakob kü, “Nüngi mehe dükpa? Nüngi ngei kü luphongtü ngelei yiükhathü vehok leipü yeppüthü keiha müei deilangteke. 27Mehekei nüngi ngei luphongtü ngei kü ne-e-i joei daipa? Ngei nüngü mongongmongleshi tambourin hatü harp vüngei kesho lokei shomhah shepeih. 28Nüngi hüpeüthü kü om kü jüphen hatü ngelei yiükha nyi kü nyu-e shei ehenao nehan. Nüngi ngadou dükteke. 29Ngei nüng kü lak shihhen aokshi nyüpeih, shejao meya ampalei Kahvangi ngei kü, ‘Jakob kü ten vaituh mei vaituh shah phahükao ne-ehen lituh’ shei ephopeih. 30Shaang nüngü ampalei kahdokei leihen ongyangpü nangkü leidainyu khih, shejao nüngi mehekei ngelei shem kahvang lajei gühpa?” shei e. 31Jakobi Laban kü, “Nüngi nüngei yiükhathü aetei tuhlangphahen khih shei nyemei deihpü nangkü ngei daipeih. 32Shejao üpalei lakei nüngei kahvang nyukahenshang yemmü tetuh. Jenei jeihinaüthü nyushi nüngei douthü meheyao nyülashang veituh, chongküjema yahlangtuh” shei e. Racheli hapa kahvang lajei güh-ei yahpü Jakobi nenyingi nyu.
33Labani Jakobei ashakshemei shüei yem; hapheikü Leahlei ashakshem hatü aa lanyü nyilei ashakshemei shü, shejao büpa ha nedang. Büpai Leahlei ashakshem leipü vamei Rachelei ashakshem mongei shü. 34Racheli hapa shem kahvang lajei yah-ei ut dokshang uoshing phangei hütü ha kü pinnyü uodai. Labani ashakshem yiukeiyatei yem shejao nedang. 35Pinnyüi chepa kü, “Ngei nüng touei neyaongaokpü kü mongtemang; mehenangkü ngei hangha tenei nyüpeih” shei e. Hanangkü büpai peü yemjao büpalei shem kahvang lajei nedang.
36Hahepak kü Jakobi Laban kü mongshih-ei, “Ngei mehe nejiüi dükphopa? Ngei kü hapakei mongshih-ei ngei kü changhen mü ngei mehe mang nyüpa? 37Nüngi ngelei dou kemei kü yemjao nüngei dou meheyao dangla? Ji aa kü üpa jiü, üpa nejiüpüshang lekei nyinghen shangmü nüngei shennyak hatü ngelei shennyakthü hatouei yaonghütuh. 38Bong kukha thahshi ngei nüng mü nyuteke; nüngei mi hi yumthüi cheha neshaani nenyu hatü ngei nüngei mi cheha hükao jüei nehah. 39Phaüyemi nüngei yem hahtükjao, hapa kü ngei-i mon shemhampeih; hapakei mahpü khih shei ngei nüng kü ha jung eyei nenyuham. Nyakhingai kü gühlangpü kemei kü nüngi ngei kü shemtuh shei ehampeih. 40Ngei hapakei ponghah-ei nyupeih: Nyihnüng shaampai, hatü yanüng wohongpai hanghipeih, hatü ngei meishi neshinechongi nyupeih. 41Bong kukha thahshi ngei nüngei shemei nyupeih; bong anpüali thahshi nüngei yiükha nyi nangkü chongpho, hatü bong vok thahshi nüngei mithü veipeih, shejao nüngi ngelei lat anpa thahshi yeiyahüpeih. 42Ngelei opalei Kahvang, Abraham Kahvang nenyulangmeyü hingmei nüngi ngeiyü lakkong leishihshah shepeih. Shejao Kahvangi ngei ponghahpü hatü ngei nyiueinangei dükpü eeyei meya büpai nüng kü lohpü khihma” shei e.
Jakob hi Laban Nyi Vangteipü
43Hapheikü Labani Jakob kü, “Yiükha nyiyao ngelei yiükha, naüthüao ngelei naüthü, yemhimakthü hatü eepü kemei ngelei, shejao ngelei yiükha nyi hatü jijinyi-i bühpü hapeüthü nang ngei shinnyih mehe dükaoknüng? 44Kei, ji shinnyih vangpüshuwpü hük lingshah, hatü hapai ji aa kü denpü hük vaihen” shei e.
45Hanangkü Jakobi yaong hük yah-ei shemnyü vaishi haong, 46hatü Jakobi büpalei nanglakthü kü, “Yaong thaituh” shei e, hatü jomi yaong thaiyei shüngtü hatouei hahying. 47Labani hapa kü Jegar-Sahadutha#Aramaic shah mü Jegar Shahadutha lappü, “Denpü yaong khong” shei enyüke. shei men, shejao Jakobi ha kü Galeed#Hebrew shah mü Galeed lappü, “Denpü yaong khong” shei enyüke. shei men. 48Labani, “Shinnyih hapayü ji aa kü denpü yaong khong” shei e. Hanangkü hapa kü Galeed shei men. 49Hapa kü Mizpah#Mizpah lappü, “Veihen shangdü” shei epü nyüke. shemnyü sheiyao men; mehenangkü büpai, “Ji yanei nyujao Shembüpai ji kü veishi nyemnyu. 50Nüngi ngelei yiükha nyi kü nemei-i dükjü nevaijü jiji mü lenei shao nyüha yahjü ngei ha nenyingjao Kahvangü ji aa kü denbü shei deih-ei dangtuh” shei e.
51Hahepak kü Labani Jakob kü, “Hapa yaong khong kü hatü hapa shemnyü ngei ji aa kü tuhpü kü veituh. 52Hapa yaong khong hatü shemnyü-ü denpü hük; ngei hapa yaong peih-ei nüng mü hoknüng neheihhen, hatü nüngiyao hapa yaong peih-ei ngei mü hoknüng neheihhen. 53Ji aa kü Abraham Kahvang hatü Nahor Kahvangijijilei chepalei Kahvangi shah nyemphen” shei e. Hanangkü Jakobi chepa Isaki khümpü Kahvang men kü, 54büpai hapa shangtaolei jakpü moila shuoh, hatü shem am kü halei hahyinghen nyük, hatü jomi halei hahyingtü vangnyakpü thahshi phaüshang kahmükei nyu.
55Nepnüng lomi Laban paoei yiükha nyi hatü hüpeüthü kü om kü jüptü moihiman shuohtü yanei shem yemei leidai.
Currently Selected:
KAHBHAO 31: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
