KAHBHAO 30

1Mechem Racheli Jakob kü naü hükao nebühja shei veiaokpa, pinnyüi chenya kü mükhakei deih. Hanangkü pinnyüi Jakob kü, “Ngei kü naü yahshih, hei nevaijema ngei didaihen hih” shei e. 2Jakobi Rachel kü mongshih-ei, “Nüngi hapeü nekohen mü shümei tuhhen mü ngeiyü Kahvang je?” shei e.

3Hapheikü pinnyüi, “Ngelei aa lanyü Bilhah ha khih. Nüngi pinnyü mü jemtuh, hatü pinnyüi ngei shing naü nyembühkei, hatü ngeiyao pinnyü homei hapeü danghen” shei e. 4Hanangkü pinnyüi büpa kü Bilhah deiyei nyüha vaihen shuoh, hatü Jakobi pinnyü mü jem, 5hatü Bilhah büm nekongi lei, hatü Jakob kü yeshang hük bühjateke. 6Hahepak kü Racheli, “Kahvangi ngei dah shakhüteke; büpai ngei khümpü danei yeshang hük shuohteke” shei e. Hanangkü pinnyüi naü kü Dan#Dan lappü, “Büpai ngei dahshakhüteke” shei epü nyüke. shei men. 7Rachelei aa lanyü Bilhah-i shao büm nekongi lei, hatü Jakob kü yeshang hük bühjateke. 8Hahepak kü Racheli, “Ngei onya mü mangpü vehok hokpeih, hatü ha ngei neüpeih” shei e. Hanangkü pinnyüi naü kü Naphtali#Naphtali lappü, “Vehok hokpü” shei epü nyüke. shei men.

9Mechem Leah-i sheyü pinnyü hajük kü hapeü neshiü shei nyingpa, pinnyüi pinnyülei aa lanyü Zilpah deiyei Jakob kü nyüha vaihen shuoh. 10Leahlei aa lanyüi Jakob kü yeshang hük bühjateke. 11Hahepak kü Leah-i, “Meshük lashüh meipüang!” shei e. Hanangkü pinnyüi naü kü Gad#Gad lappü, “Lashüh meipü” shei epü nyüke. shei men. 12Leahlei aa lanyü Zilpah-i Jakob kü nyipabü yeshang hük bühjateke. 13Leah-i, “Ngei meshük mongongpüang! Nyüha peüi ngei kü mongongpü” nyükphahen shei e. Hanangkü pinnyüi naü kü Asher#Asher lappü, “Mongongpü” shei epü nyüke. shei men. 14Wheat hah vetpü hepak kü Reuben kahlei sha, hatü moipaipü#Hapa pü jenei kahdokei neyupü nyupü nenying; Palestine kahdokei hapa hahjü naü neshiüpüthüi naü vamnyeih shei hahhamteke. Solomonei Kesho 7:13 kü, “Yingmong chü” shei lepei shihnyüpa. dangei koei chenyü Leah kü shuoh. Hahepak kü Racheli Leah kü, “Anhai kopü moipaipü ngei kao maani yahshih” shei e. 15Shejao pinnyüi pinnyü kü, “Nüngi ngelei baha yahlangpü hapaiyao nechangang je? Nüngi ngelei hapeüi kopü moipaipü-ao yahhen je?” shei e. Racheli, “Meiteke, anhai kopü moipaipü nangjei sheya nüngi Jakob mü shituh” shei e.

16Hanangkü mechem Jakob om mü kah leipü aongjapa, Leah-i büpa mü pongteinüng heih-ei pinnyüi, “Sheya nüng ngei mü shihen; mehenangkü ngelei hapeüi kopü moipaipü shuohtü ngei nüng shaklangtih” shei e. Hanangkü ha ya büpai pinnyü mü paüm. 17Leah-i phoppü Kahvangi dan, hatü pinnyü büm nekongi lei, hatü Jakob kü ngapabü yeshang hük bühjateke. 18Hapheikü Leah-i, “Ngei ngelei aa lanyü ngelei baha kü shuohpü nangkü Kahvangi ngei kü hapa shuohpeih” shei e. Hanangkü pinnyüi naü kü Issakhar#Issakhar lappü, “Laklei” shei epü nyüke. shei men. 19Leah-i shao büm nekongi lei, hatü Jakob kü vokpabü yeshang hük bühjateke. 20Hahepak kü Leah-i, “Kahvangi ngei kü douvang thintho hük shuohteke. Sheyü ngelei bahai ngei kü dhüm kohshi nophahen; mehenangkü ngei büpa kü yeshang vok thahshi bühtepih” shei e. Hanangkü pinnyüi naü kü Zebulun#Zebulun lappü, “Dhüm” shei epü nyüke. shei men. 21Kanja angpheikü pinnyüi yiükha hük büh, hatü pinnyü kü Dinah shei men.

22Hapheikü Kahvangi Rachel deih-ei dang; büpai pinnyü phoppü dan, hatü pinnyülei naü uoshing apteke. 23Pinnyü büm nekongi lei, hatü yeshang hük büh, hatü pinnyüi, “Kahvangi ngei kü lohpü yahlangteke” shei e. 24Pinnyüi naü kü Joseph#Joseph lappü, “Büpai shao üphahen” shei epü nyüke. shei men, hatü “Kahvangi shao ngei kü yeshang üei nyemyahpha!” shei e.

Laban Lomoh-ei Jakob Dapüshepü

25Racheli Joseph bühpheikü Jakobi Laban kü, “Ngei ngelei nyübüh kahdok yemei leihen ngei shomtuh. 26Nyüha hapeü nangkü ngei hajük nüng chongphotükpü ngei kü hathü yahshih, hatü ngei leidaihen hih. Ngei meshük nüngei dou dükei nyüpa nüngi nyingei nyüke” shei e. 27Shejao Labani büpa kü, “Nüngi ngei kü bamei deihjema, haleiüng chongkütuh. Nüng nyupü nangkü Kahvangi ngei kü moihimanpü khih shei phongyompai nyingteke” shei e. 28“Nüngei lat meshük vam, ha ngei nüng kü shuohhen” shei e. 29Jakobi büpa kü, “Ngei nüng shing meshük dou düktepa, hatü ngei jungpü homei nüngei yemhimak meshük datepa, ha nüngi nyingei nyüke. 30Ngei peishekü nüng maani angpü sheyü longi dateke, hatü ngei melei nyu, Shembüpai nüng kü moihimanteke. Shejao shaang ngei ngelei shemong shing mechem dükhahhen?” shei e. 31“Ngei nüng kü mehe shuohhenang?” shei phe. Jakobi, “Ngei kü meheyao teyahpha” shei e. “Shejao nüngi ngei kü hapa dou hük mon dükphüjema ngei nedoh-i nüngei mithü haümei yomei nyukahen” shei e. 32“Ngei shinnyih nüngei yemthü kü veiyei daishah, hatü mi hi yum meshük kü shahngpü hatü ampünyampü ow kohshi chongkahen, hatü mi cheha nyakla kemei ngelei lat vaihen. 33Ngoikahen nyih kü ngei shahhing epü ne-epü nüngi yopai-i nyingdaihen. Nüngi shuohpü ngelei lat kü veinüng nüng peijü shahngpü hatü ampünyampü neshiüpü yum nevaijü nyakla nevaipü mi chongküjema, hayü gühpü khih shei deihtuh” shei e.

34Labani, “Oma, nüngi epükei dükshah” shei e. 35Shejao hapa nyih büpai shahngpü nevaijü ampünyampü yum chebaongthü hatü chenyüthü hatü shola ow kohpü yumthü, hatü mi nyakla kemei yah-ei chehathü kü veihen shuohtük. 36Hapheikü büpai nyih jem lem kü Jakob mebü yanei lüdai; Jakob payü aopü mithü kü veiyei nyu.

37Hahepak kü Jakobi poplar, almond hatü plane pükaothü louh-ei hapa püshuw ammeinyamei nyiuktükpü nangkü pükaothü ammeinyamei nyuteke. 38Büpai hathü yah-ei yemthü yung yingteipü shing she philei haüteke; mehenangkü yemhimakthüi yung yingnüng leijü li shuohhamteke. 39Hanangkü mechem yumthüi ha pükaothü touei cheha shaanhenshang, shahngshi hatü ammeinyamei mon shaanteke. 40Jakobi mithü kemei yum mü khaatei tuh, hatü yemthü peü shahngpü hatü ampünyampü Labanei yemthü philei meeshi tuh. Hapa keiha büpai Labanei yemthü mü nevuki büpalei mithü hayaoha tuh.

41Mechem büm meipü yemthüi cheha yahhen, Jakobi yungkukei hathü touei pükaothü haü, hatü yemthüi hatouei li yahteke, 42shejao büm nemeipü yemthü touei büpai pükaothü nehaüshuoh. Hanangkü büm nemeipü yemthü peü Labanei vai, hatü büm meipü kemei Jakobei vaiteke. 43Hapa keiha hapa shennyak longi shemmei lei, hatü yemhimakthü, nyüha baha aathü, ut hatü gadu longi angteke.

Currently Selected:

KAHBHAO 30: PHOMBSI

Highlight

Copy