KAHBHAO 29

Jakob hatü Labanei Yiükha

1Hapheikü Jakobi nedoh-i büpalei yenlem kü daiyei heong nanglakthülei kahdok ngoi. 2Halei büpai yungkuk hük ha yopailei mi jem lemshi ee; mehenangkü mithü kü hapa yungkuk leipü yung yinghamteke. Hapa yungkuk kü küppü yaong longshi nyu, 3hatü mechem halei mithü thaihenshang, mi yombüthüi hapa yaong ngowtüktü yung yingtü shao hapa yaong leiyei yungkuk kü küphamteke.

4Jakobi mi yombüthü kü, “Ngelei jeihinaüthü, am meleipü peiküpa?” shei phe. “Hamü Haran leipü” shei jomphongi e. 5Büpai jomphong kü, “Amphongi Nahorlei chehü Laban nyingnyüla?” shei phe. Hathüi, “Nyingnyeih” shei e. 6Jakobi hathü kü, “Büpa meishi nyüla yo?” shei phe. Jomphongi, “Büpa meishi-üng nyüpeih, hatü hatouei büpalei yiükha Rachel mithü müei shaei nyüpeih” shei e. 7Büpai, “Vanghe longi nyüke; shaangü mithü om leihen hepak nevai; hanangkü yung yingtü het hahnüng deishihtuh” shei e. 8“Mithü peü thaihütü yungkuk leipü yaong mangngowtük thahshi hami ha düknüng neaokpih. Hapheikü mon hami mithü kü yung yingnyeih” shei hathüi e.

9Mechem Jakobi hathü mü shah eteiyei nyupa, Racheli mithü mütü pei; mehenangkü pinnyüao mi yombü nyuteke. 10Mechem Jakobi cheko Labanei yiükha Rachel, hatü mithü eepa, büpai yungkuk leipü yaong ngowtüktü chekolei mithü kü yung yingteke. 11Hahepak kü Jakobi Rachel kü om kü jüptü wong mü thep. 12Büpai Rachel kü ngeiyü ampalei shem am hatü Rebekahlei hapeü hih shei e. Hanangkü pinnyüi mokei leiyei chepa kü e.

13Labani chenaüei hapeü Jakob jung danhinüng büpai büpa mü pongnüng mok; büpai büpa kü khaaitü om kü jüptü shemei müei lei, hatü Jakobi Laban kü lemphüli ejateke. 14Labani büpa kü, “Nüngü ngelei hapeü hatü ngelei iy” shei e. Jakob büpa mü lenyang hük nyuteke.

Jakobi Nyüha nangkü Laban Chongphopü

15Labani Jakob kü, “Nüngü ngelei shem am vaipai shei meheyao nevaipü kü dou dükei nyuhen je? Nüngi mehe lat yahhahhüpa ngei kü eshih” shei e. 16Shaang Labanei yiükha nyi nyu; hashongnyü-ü Leah hatü naü-eenyü-ü Rachel nyu. 17Leah-ü mük wong nekoh-i nyu, shejao Rachelü veijü bamhüshi hatü nela meishi nyu. 18Jakobü Rachel mü bamteiyei nyu, hatü büpai, “Ngei nüngei yiükha naü-eenyü shing bong nyet ngei nüng chongphohen hih” shei e.

19Labani, “Mih kü shuohlei meyü pinnyü-ü nüng kü shuohpüüng meihen; hanangkü ngei mü nyutuh” shei e. 20Hanangkü Jakobi Rachel yahhen nangkü bong nyet thahshi chongphoei nyu, shejao büpai pinnyü kü bampü nangkü nyih maani mon keiha peihdai.

21Hapheikü Jakobi Laban kü, “Ngei kü nyüha yahshih, ngei pinnyü mü shem yemhen hih; mehenangkü itteipü nyih ngoiteke” shei e. 22Hanangkü Labani shennyakthü peü kü nyükei yiükjing mo ühteke. 23Shejao mechem om dhüpa, büpai cheha Leah müei deiyei Jakob kü shuoh, hatü büpai pinnyü mü paümteke. 24Labani cheha chongphohen shingvaishi nyüha aa Zilpah shuoh. 25Mechem shin paoei veipa, hapayü Leah vaidaitü nyu. Hanangkü Jakobi Laban kü, “Nüngi ngei kü mehe lingphopa? Ngeiyü Rachel yahhen nangkü nüng chongphopeih, vaila? Mehekei nüngi ngei kü lueilemnya?” shei e.

26Labani, “Hamei vanglemi nya vaipü doi kü mangdai-i naüpeü shong doi daihen vanglem neshiüpih. 27Hapa yiük yahpü hatyang peihhütuh; hapheikü ngei nüng kü Rachel shuohhen hih, hatü ha nangjei shao bong nyet nüngi ngei chongphotuh” shei e.

28Jakobi hapakei chongphoei nyu. Büpai Leah mü hatyang hük peihpheikü Labani büpalei yiükha Rachel Jakobei nyüha vaihen shuoh. 29Labani cheha Rachel chongphohen nyüha aa Bilhah shuoh. 30Jakobi Rachel mü nyuei dai, hatü büpai Leah mao Rachel kü nyeishi bam. Büpai shao bong nyet thahshi Laban chongphoei nyu.

31Mechem Shembüpai Leah kü nebamnyu shei veiaokpa, Shembüpai Leahlei naü uoshing ap, shejao Rachelü nyülan leitükhü. 32Leah büm nekongi lei, hatü yeshang hük büh. Pinnyüi naü kü, Reuben#Reuben lappü, “Bahanaü kü veituh” shei epü nyüke. shei men. Mehenangkü pinnyüi, “Shembüpai ngelei mongshang eepü nangkü hingmei shaangü ngelei bahai ngei kü bamphahen” shei e.

33Shao pinnyüi büm nekongi lei, hatü yeshang hük büh, hatü pinnyüi, “Ngei kü nebamnyu shei Shembüpai danpü nangkü büpai hayao ngei kü shuohpeih” shei e. Hanangkü pinnyüi naü kü Simeon#Simeon lappü, “Büpai dannyeih” shei epü nyüke. shei men.

34Shao pinnyüi büm nekongi lei, hatü yeshang hük büh, hatü pinnyüi, “Sheyü ngelei bahai ngei mü-üng nyeinya shepei khaaiyei chongkahen; mehenangkü ngei büpa kü yeshang jem büh-ei shuohtepih” shei e. Pinnyüi naü kü Levi#Levi lappü, “Shepei khaaipü” shei epü nyüke. shei men.

35Shao pinnyüi büm nekongi lei, hatü yeshang hük büh, hatü pinnyüi, “Shinnyihpü shan keyü ngei Shembüpalei men longhen” shei e. Hanangkü pinnyüi naü kü Judah#Judah lappü, “Menlongtuh” shei epü nyüke. shei men. hajük kü pinnyüi hapeü ne-angi dohdai.

Currently Selected:

KAHBHAO 29: PHOMBSI

Highlight

Copy