KAHBHAO 32

Jakobi Esau mü Pongteihen Tempü

1Jakob leishingkü Kahvang phongshan büpa mü pong. 2Mechem Jakobi hathü eepa, büpai, “Hapayü Kahvangei baümtap!” shei e. Hanangkü büpai hapa shing kü Mahanaim#Mahanaim lappü, “Baümtap nyi” shei epü nyüke. shei men.

3Jakobi büpa shekü Edom kahmük Seirlei chejei Esau mü pongnüng phongmokbüthü shom. 4Büpai hathü kü, “Amphongi ojei Esau kü hapakei etuh, nüng chongphobü Jakobi hapakei enyüke: ‘Ngei Laban mü benha kei nyuei shinnyih thahpeih, 5ngei mohoh, gadu, mi, nyüha hatü baha aathü longi nyüpeih, hatü ngei ngelei shembü touei nüngi shinshangei nyemdeihpha shei hapa ehen shompeih’ ” shei ehen eteke.

6Phongmokbüthü Jakob touei leiyei, “Hamphong anjei Esau touei peitih hatü büpa mü shennyak kho ali mütü nüng mü pongteinüng heihkünyüke” shei e. 7Hahepak kü Jakob longi nyemei mongshang, hatü büpai büpa mü nyupü shennyak, mi, mohoh, utthü kemei khong nyi vaishi hanteke, 8mehenangkü büpai, “Esau-i khong hük touei peiyei jütükjao hükpa payü aokahen shei deih.”

9Hapheikü Jakobi, “Oh ngelei opa Abraham Kahvang, hatü Isak Kahvang, ngei kü, ‘Nüngei kahmük hatü jeihinaü touei leituh hatü ngei meipü dükphahen hih’ shei epü Oh Shembüpa, 10nüngei chongphobü kü nüngi bampü hatü shahhing epü khongkü maanpü hükao ngei yahhen neshangangpih. Ngei lenshuoh mon notü Jordan yungdang homei daipeih, shejao shaang ngei khong nyi leiteke. 11Ojei Esaulei lak kübü ngei yangshih; büpa peiyei ngei hatü nyühihathü peü jütükhen khih shei nyemnyüke. 12Shejao nüngi, ‘Ngei nüng dahüshehühen, hatü nüngei hühihathü ienüng neaoki yungching bhihhiphang keiha leihühen shei epeih’ shei büpai phop.”

13Büpai ha ya halei paüm, hatü büpai angpü kübü büpai chejei Esau kü thintho shuohhen jeteke; 14yum chenyü kho nyi, chebaong kukha, mi chebiha kho nyi hatü chebaongha kukha, 15ut chenyü cheha omshi kukha, mohoh chenyü pinyi, hatü mohohbaong an, hatü gadu chenyü kukha hatü chebaong an jeteke. 16Büpai hathü peü büpalei chongphobüthüi veihen yemlem laolao khongtü shuoh-ei büpai eteke, “Ngei shekü kamtuh hatü yemlem khong hi khong aa kü khaatteishi mütuh” shei e. 17Büpai peü mü sheleipü khongkü, “Mechem ojei Esau am mü pongei, ‘Ammei shembü üpaang? Am melei dainya? Hatü am mü nyupü yemthü üamei ang?’ shei phephüjü, 18amphongi, ‘Hathüyü nüngei chongphobü Jakobei yemthü khih, hatü hathüyü ngelei shembü Esau kü thintho shompü khih hatü büpayü ham ngaümpheilei nyüpeih’ shei etuh” shei e. 19Büpai hapakei nyipabü jempabü hatü hapheikü müpüthü peü kü, “Amphongi Esau pongjü aihük mü etuh, 20hatü ‘Nüng chongphobü Jakobü ngaümpheilei nyüpeih’ shei etuh” shei e. Mehenangkü büpai, “Ngei hathü thintho ngei shekü leishihpai, hatü hapheikü ngei büpa mü pongteipai büpa mongonghühen hatü büpai ngei mongongshi yahhen” shei deih. 21Hanangkü büpa shekü thintho shomei leishihtü büpa ha ya baümtapei paümteke.

Jakobi Penielei Bhowpü

22Ha ya-üng büpai chenyüha nyi, aa lanyü nyi, hatü hapeüthü jom anpühük mütü Jabbok yungyen homei dai. 23Büpai hathü yah-ei yung homei shom, hatü lemphü shomtük. 24Jakob büpa monha nyu, hatü shennyak hüki vangngaipü thahshi büpa mü bhowteke. 25Mechem hapa shennyaki Jakob mü bhowpü neneüaokhen khih shei nyingpa, büpai shüng kü bheitü shüng jeihtük. 26Hapheikü hapa shennyaki, “Vangngaikünyüke, ngei lüdainyeih” shei e. Shejao Jakobi, “Nüngi ngei kü moihiman mangshuoh thahshi ngei-i nüng nedeishihpih” shei e. 27Hanangkü büpai büpa kü, “Nüngei men mekeiang?” shei phe. Büpai, “Ngelei menü Jakob” shei e. 28Hahepak kü hapa shennyaki, “Nüng kü hajük kü Jakob shei nenyükhen shejao Israel#Israel lappü, “Kahvang mü bhowpü shennyak” shei epü nyüke. shei nyükhen; mehenangkü nüngi Kahvang hatü hangku mü bhowei neütükteke” shei eteke. 29Hahepak kü Jakobi, “Chingmeilemlingei nüngei men eshih” shei e. Shejao hapa shennyaki, “Nüngi mehekei ngelei men phenya?” shei e, hatü halei büpai büpa kü moihiman. 30“Hanangkü Jakobi hapa shing kü Peniel#Peniel lappü, “Kahvangei dhe” shei enyüke. shei men; mehenangkü büpai ngei Kahvang dhe dhe gongei eetepih shei e, shejao ngelei yangnyu yangei nyüpeih” shei e. 31Büpai shüng kü tüngei khoyaki Peniel homei daishingkü vanghe aong. 32Hanangkü shinnyih thahshi Israel ami shüngbaong kübü hak nehahnyih; mehenangkü büpai Jakob kü shüngbaong kübü hakbhom kü bheiteke.

Currently Selected:

KAHBHAO 32: PHOMBSI

Highlight

Copy