KAHBHAO 18
18
Sodom hatü Gomorrah Mahtükpü
1Nyihnüng shaampü nangkü Mamrelei longkham püchong yopai kübü büpalei ashakshem shadenei Abraham uoshi nyushingkü büpa touei Kahvang peiteke. 2Abrahami ngangei veishingkü büpa yopailei shennyak jem yaongshi ee. Büpai hathü eeyei hathü mü pongteinüng ashakshem shaden leipü mokei heih-ei kahdokei aümei shaei khüm.
3Büpai, “Oh Shembüpa, amphongi bamei deihjema, shemei nehaki tepeihdai. 4Ngei yung maani ankününg; lakhüh shephutü hapa püdhümei nyiumeituh. 5Ngei amphongi hahhen lemhük ankününg, am chongphobülei shemei peidaiphei keyü hapa hahtü wong koh-ei daituh” shei e. “Meiteke, nüngi epükei düktuh” shei jangei e.
6Abrahami shemei shüei Sarah kü, “Shülangi atta aan meipü dok jem hükshing yah-ei ngümei aan lingtuh” shei e. 7Hapheikü büpai mohoh khaokei heih-ei mohoh chebaongha meipü yah-ei büpalei chongphobü kü shülangi nemnotuh shei shuoh. 8Büpai amma cheü, amma hatü phai anei hathü kü shuoh, hatü jomphongi ha hahshingkü büpai jomphong kü ühyingei püdhümei nyu.
9Jomphongi büpa kü, “Anyüha Sarah melei nyüpa?” shei phe. “Pinnyü-ü shem mongei nyüke” shei büpai e. 10Hahepak kü hathü khongkü hüki, “Jiüpü hepak kü ngei nyokei leikahen; hahepak kü anyüha Sarah-i yeshang bühei nyuhen hih” shei e. Hahepak kü Sarahyü büpalei ngaümpheilei shadenei yaongshi nyu. 11Abraham hi Sarah nyiyü sheyü viüei bong longi lüdai; Sarahyü hapeü bühhen hepak peihdaitü nyu. 12Hanangkü Sarah-i pinnyülei mongei nyiyei deihtü, “Ngei sheyü wong kemdai, shembüpayü viüdaijü jemteihen mong kü lekahen je?” shei e. 13Hahepak kü Shembüpai Abraham kü, “Ngei hajük viüdaipheikü ngei hapeü bühhen je shei mehekei Sarah-i nyiyei enya? 14Shembüpai neaokbenüng lemhük nyüpü je? Jiüpü hepak hük kü ngei nyokei leikahen, hatü Sarah-i yeshang hük büh-ei nyuhen” shei e. 15Shejao Sarah-i nyemei, “Ngei nenyi-angpih” shei shahshem e. Büpai, “Nüng nyiphei” shei e.
Sodom Mahtükhen Epü
16Hapheikü jomphong hatoueipü layaongei Sodom eehen lemei dai, hatü Abrahamao hathü jingei dai. 17Shembüpai, “Ngei mehe dükhen nyu, ha Abraham kü johen je? 18Abrahamei hühihathüi longpü hatü wong kohpü jat hük leihen, hatü büpa homei kahdoknyü jatthü peü moihimanhen. 19Mehenangkü mehe jiüpü hatü shahhing ha dükei Shembüpalei lem kü kamhen shingvaishi büpai laophülei hapeüthü hatü shem am kü nyuhhen venhen ngei Abraham jepeih; shejüang Shembüpai Abraham kü mehe lahpa, ha koei peihen” shei e.
20Hapheikü Shembüpai, “Antepa Sodom hatü Gomorrah khüei nyembenüng thaüvaü nyüpeih, hatü jomei mang ahshi-üng longdaiteke. 21Ngei touei peiküpü thaüvaü aimü jomi nedükpü hi dükpüshang ngei yiüei veihen, hatü hapakei nevaipü vaijema, ngei nyinghahhen hih” shei e.
22Hanangkü hapa shennyak nyi Sodom lemei yiüdaitü Shembüpayü Abraham touei yaongshi nyu. 23Hahepak kü Abrahami yopailei heihtü, “Nüngi daülangpüthüao mangthü mü mahtükhen je? 24Nyingshah-i hapa chingnyü kü daülangpü shennyak jom pinyipüan nyuküjü haleipü jom pinyipüan nangkü dangkao mang netüki ha ching mahtükhen je?” shei phe. 25“Henüng keipü dou dükkahen shei nüngi tedeihhah; daülangpüthü mangthü mü aihük mü jütükhen shei nüngi tedeih. Kahdoknyü peü kü Shahphenbüi jiüpü nedükhen je?”
26 Shembüpai, “Hapa Sodom chingnyülei daülangpü shennyak jom pinyipüan dangkao nyuküjema, jomei med kü ngei hapa chingnyü yangei tuhhen” shei e.
27Shao Abrahami, “Ngeiyü bhihla keiha maanpü kong yangnyu vaijao Shembüpa touei monglongei ngei ha enyeih, 28halei paoh daülangpü shennyak jom pinyipünga nyuküjema mekei? Shennyak nga kompü nangkü nüngi hapa chingnyü mahtükhen je?” shei e. “Halei jom pinyipünga nyuküjao ngei hapa chingnyü nemahtükpih” shei büpai e.
29Shao chem büpai büpa kü, “Jom pinyi mon chongküjü mekei?” shei e. “Jom pinyilei med kü ngei ha nedükpih” shei e.
30Shao büpai, “Shembüpai chingmeilemlingei mongtemangpha, ngei shao eshah. Jom hapüan mon nyuküjü mekei vaihen?” shei e. Büpai, “Halei jom hapüan mon nyuküjao ngei ha nedükpih” shei e.
31Abrahami, “Ngei nüng kü hajük monglongshi epü kü mang tükshih. Halei jom kukha mon nyuküjü mekei vaihen?” shei e. Büpai, “Jom kukhalei med kü ngei jom nemahtükpih” shei e.
32Shao büpai, “Shembüpai chingmeilemlingei mongtemangpha, ngei shao chem mon eshah. Halei jom an mon nyuküjü mekei vaihen?” shei e. Büpai, “Jom anei med kü ngei jom nemahtükpih” shei e.
33Mechem Shembüpai Abraham mü shah eteiyei kempa, büpa lüdai hatü Abrahamao shemei leidai.
Currently Selected:
KAHBHAO 18: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
