KAHBHAO 17

Abrami Shuw Jappü

1Mechem Abram bong 99 nyupa, Shembüpa büpa touei peiyei, “Ngeiyü Jeiyong Kahvang; ngei touei eela nekoh-i kamtuh. 2Ji aa kü vangpüshuwpü ngei shahbhawlaongvethen hatü nüngei hühihathü longi dahühen” shei e. 3Hahepak kü Abrami aümei sha, hatü Kahvangi büpa kü, 4“Ngei nüng mü vangteipeyü ha hih: Nüngü jat longilei pa vaihen. 5Nüng kü hajük kü Abram#Abram lappü, “Longei aongpü pa” shei epü khih. shei nenyükhen; nüngei menü, Abraham#Abraham lappü, “Jat longilei pa” shei epü khih. vaihen; mehenangkü ngei nüngü jat longilei pa leihütepih. 6Ngei nüngei li longi dahühen; ngei nüng kübü jat longi linghen, hatü nüng kübü ongthü vamhen. 7Ji aa kü hatü nüngei hühihathü ngoikahen denshem peü kü ngei nüngei Kahvang hatü nüng pheilei nüngei hühihathü kü jomei Kahvang vaihen ngei nüng mü vangteipeyü nedohnetenpü vangpüshuwpü leihühen. 8Kanan kahdok kempü, melei nüng shaang benha kei nyunya, hayü ngei nüng hatü nüng phei kübü nüngei hühihathü kü den shing vangei shuohhen, hatü ngei jomei Kahvang vaihen” shei e.

9Kahvangi Abraham kü, “Nüng hatü nüng phei kübü ngoikahen hühihathüi ngelei ha vangpüshuwpü jiüshi düktuh. 10Hapayü ngei nüng hatü nüng phei kübü hühihathü mü vangteipü nyüke; ammi ha jiüshi düktuh. Am bahathü kemei shuw japtükhen. 11Ammi shuw japtükhen, hatü hapayü ji aa kü vangpüshuwpü nyuhen. 12Ngoikahen den peü kü nüng mü nyupü bahanaü peü nüngei shemei bühpü vaijao, kung am nüngei li nevaipü lop shuohtü shakpü vaijao nyih shetpabü kü shuw japtüktuh. 13Shemei bühpü aa vaijao, lop shuohtü shakpü vaijao jomei shuw japtüktuh. Nüngei büm kü ngei vangteishuwteipeyü nedohnetenpü vangpüshuwpü vaihen. 14Baha üpai shuw nejaphen, büpayü ngelei nanglak khong kübü yaktükhen; mehenangkü büpai vangpüshuwpü mangtükteke.”

15Kahvangi shao Abraham kü, “Anyüha Sarai kü sheyü Sarai shei nenyükhen; shaang mü leitü Sarah#Sarah lappü, “Onglanyü” shei epü khih. shei nyüktuh. 16Ngei pinnyü kü moihimanhen, hatü ngei pinnyü homei nüng kü yeshang hük shuohhen. Pinnyü jat longilei nyü leihen nangkü ngei pinnyü kü moihimanhen; pinnyü kübü nanglakthülei ongthü vamhen” shei e.

17Abrahami aümei shatü büpa nying nyiyei, “Bong kho hük pajei hüki hapeü anghen je? Bong 90 lomdaipü Sarah-i naü bühhen je?” shei e. 18Abrahami Kahvang kü, “Ishmael pa-ang ngelei mükjüp vaihen moihimanshih!” shei e.

19Hahepak kü Kahvangi, “Nevai, shejao anyüha Sarah-i yeshang hük bühkahen, hatü nüngi ha naü kü Isak#Isak lappü, “Büpai nyingnyüpeih”. shei mentuh. Ngei büpa mü vangpüshuwpü hük linghen, hatü hapayü büpa phei kübü hühihathü shing nedohnetenpü vangpüshuwpü vaihen. 20Ishmael shingvaishi nüngi phepü ngei danphei: Hingmei ngei büpa kü moihimanhen; ngei büpa kü hapeü longi shuoh-ei hühihathü dahühen. Büpayü ong anpünyilei pa vaihen, hatü ngei büpayü jat longpü hük leihühen. 21Shejao ngüvang shaangkei Sarah-i bühkahen nyupü anha Isak mü mon ngei vangpüshuwpü linghen” shei e. 22Mechem büpai Abraham kü ha eyei kempa, Abraham toueipü Kahvang aongdai.

23Ha nyih-üng Abrahami cheha Ishmael, hatü shemei bühpüthü hatü lopi shakpüthü peü kü Kahvangi epükei shuw japteke. 24Abrahami shuw jappü hepak kü büpa bong 99 nyu, 25hatü cheha Ishmael-ü bong anpüjem nyu. 26Abraham hi Ishmael nyi jemi nyih hük kü shuw japteke, 27hatü shemei bühpü, kung am lopi shakpüthü peü büpa mü shuw japteke.

Currently Selected:

KAHBHAO 17: PHOMBSI

Highlight

Copy