KAHBHAO 19

Sodom Amei Mang

1Hapa vangsho phongshan nyi om mü Sodom ngoi, hatü Lot-ü chingnyü penyüsha touei uoshi nyu. Mechem büpai henyi eepa, büpa yaongei jiji mü pongnüng heih-ei büpalei dhe aümei shatü khüm. 2“Ngelei shembü nyi, chingmeilemlingei shemei shükütuh. Lakhüh shephutü sheyayü shemei paümtü nepnüng lomi layaongei daituh” shei e. Jijinyi-i, “Anyoh, henjiyü chingshongei kamteiyei paümhen” shei e.

3Shejao büpai ahshi-üng nyeanei epü nangkü jiji shem mongei büpa mü shüteke. Büpai daw neshih-i aan lingei hahying tem, hatü jijinyi-i ha hah. 4Jomphong shihen shekü Sodom chingnyü leipü behe hashih peü thaiyei shem shonteke. 5Jomi Lot kü nyüktü, “Sheya am shemei peipü shennyak nyi melei daipa? Hami jiji kü douten dükhen chingshelei anshih” shei e.

6Lot-i sha küpphongtü vamei jom touei heih-ei, 7“Tahma, ngelei küphüthü, henüng keipü douten tedükküma. 8Veituh, chemao baha mü mangjempü yiükha nyi nyüpeih. Ngei jiji ngaiphanüng hatü ammi mongpükei jiji kü dükeishuoh, shejao hapa shennyak nyi kü meheyao tedük; mehenangkü jijiyü ngelei shemdhümei peidaiteke” shei e.

9Shejao jomphongi, “Nüngdaituh, hapa shennyakü hatouei benha vaiyei peipeih, shejao shaang shahphenbü kei ehen je? Hapa shennyak nyi mü nyeishi nüng kü nemei-i dükhen” shei e. Jomphongi nedoh-i Lot kü hungei sha benei shühen heih. 10Shejao mongeipü shennyak nyi vamei Lot shüei shütü sha latlang. 11Hapheikü jijinyi-i chingshelei yaongpü behe hashih peülei mük phüngtükpü nangkü jomi shaden nenyingaok.

Lot-i Sodom Tuhpü

12Hapheikü hapa shennyak nyi-i Lot kü, “Halei nüngei shem am yiükhathülei baha, hapeüthü, yiükhathü nevaijü shem am hanei hapa chingnyülei nyujema hapa shing leipü müei lüdaituh. 13Hami hapa shing mahtükhen; mehenangkü hapa nanglak khüei thaüvaüpü Shembüpai danteke, hatü Shembüpai hapa shing mahtükhen ham shompeih” shei e.

14Hanangkü Lot daiyei yiük phepüthü kü, “Shülangi hapa shing kübü lüdaishah; mehenangkü Shembüpai hapa chingnyü mahtükhenja” shei e. Shejao yiükhathülei bahathüi nyienei enyeih shei deih.

15Mechem vangngaipa, vangsho phongshan nyi-i Lot kü, “Anyüha hatü yiükha nyi müei lomi lüdaituh, hei nevaijema hapa chingnyü mahpü mü amphongao mahhen” shei e. 16Büpa jü-üei nyushingkü hapa shennyak nyi-i büpa, chenyüha hatü yiükha nyilei lak kü düktü hapa chingnyü peih-ei müei ngailang; mehenangkü Shembüpai jom kü phahji. 17Mechem jijinyi-i hathü ching haolei müei deipa, jijinyi-i, “Yanglem yemei nyaidaituh, ngaümpheilei yaakei tevei nevaijü kahjilei metoueiyao teyaong; kahshang lemei aongdaituh, hei nevaijema amao mahhen” shei e. 18Shejao Lot-i, “Oh, anyoh ngelei shembü nyi! 19Anjilei chongphobü kü longi bamei ngelei yangnyu yangphüteke, shejao kahshang lemei ne-aongaokhen khih; mehenangkü hapa vongshüh pongpü eeyei ngei dihen khih. 20Veituh, antepa ching maanpübalei nyaiyei daihen yopüba nyüke. Ngei hapa maanpü shingei daishah, shejüang yanghen khih” shei e. 21Büpai, “Hayao meiangke; nüngi epü hapa ching ngei nemahtükpih. 22Shülangi yiütuh; nüng hapa shing mangngoi thahshi ngei meheyao nedükpih” shei e. Hanangkü hapa ching kü Zoar#Zoar lappü, “Maanpü” shei epü nyüke. shei nyük. 23Lot halei ngoipü thahshi vanghe aongdaitü nyu.

24Hapheikü Shembüpai Sodom hatü Gomorrah nyi kü vangsho leipü awkaong meli hatü aw shom, 25hatü büpai chingnyü nyi, kahji, chingnyülei nyupüthü, hatü kahdokei kohpü lemphü shamtük. 26Shejao Lot-ei chenyüha yaakei vei, hatü pinnyü hüm shemnyü leidai.

27Nepphei Abrahami Shembüpa mü yaongpü shingei heih, 28Sodom hi Gomorrah hatü kahji kahdok peü kü veishingkü awbhaong kübü awshit keiha awshit vamei eeteke. 29Shejao mechem Shembüpai Lot nyupü kahji leipü chingnyü nyi mahtükpa, büpai Abraham deihpü nangkü Lot müei yanglem yemei deilang.

Moab hi Ammon am Vampü

30Shaang Lot-i Zoar chingei nyuhen nyempü nangkü haleipü daiyei shangchingei büpalei yiükha nyi mü yaongsha hükei nyu. 31Hashongnyüi chenaü kü, “Jenei pa viüdai, hatü hapa kahdoknyü vanglem kü kei ji yahhen üpayao halei neshiü. 32Kei, ji-i opa kü yiü yingshuohshah, hatü ji büpa mü shishah, hatü jenei palei li tuhshah” shei e. 33Hanangkü jijinyi-i chepa kü ha ya yiü yingshuoh, hatü hashongnyü chepa mü shi; büpai cheha mechem shi, mechem paodai nenying.

34Nyihphei hashongnyüi chenaü kü, “Veituh, meya ngei büpa mü shipeih; sheya-ao ji-i büpa kü yiü yingshuohshah, hatü jenei palei li tuhhen shangmü nüngi büpa mü shituh” shei e. 35Hanangkü jijinyi-i ha ya-ao chepa kü yiü yingshuoh, hatü chenaü heih-ei chepa mü shi, hatü büpai cheha mechem shi, mechem paodai nenying. 36Hapheikü Lot-ei yiükha nyiphen chepalei hapeüi büm nekongi lei. 37Hashongnyüi yeshang hük büh, hatü ha naü kü Moab#Moab lappü, “Pa leipü li” shei epü nyüke. shei men. Shinnyih thahshi büpayü Moab amei bü shei nyingnyüke. 38Chenaüao yeshang hük büh, hatü ha naü kü Ben-Ammi#Benammi lappü, “Ngelei nanglakei ha” shei epü nyüke. shei men. Shinnyih thahshi büpayü Ammon amei bü shei nyingnyüke.

Currently Selected:

KAHBHAO 19: PHOMBSI

Highlight

Copy